وبلىستىق دەنساۋلىق ساقتاۋ باسقارماسى باسشىسىنىڭ ورىنباسارى گۇلنار ءابدىراحمانوۆا وڭىرلىك كوممۋنيكاتسيالار قىزمەتى الاڭىندا وتكەن بريفينگىدە: «وسى ۋاقىتقا دەيىن وڭىرگە 9500 دوزا ۆاكتسينا جەتكىزىلسە, سونىڭ 5250-ءى – ءبىرىنشى, 4250-ءى – ەكىنشى كومپونەنت. گۇلنار ماقسوتقىزىنىڭ سوزىنە قاراعاندا, كۇنى بۇگىنگە دەيىن 5243 ادام ءبىرىنشى كومپونەنتپەن (99,9 پايىز) ەگىلىپ ۇلگەردى. سونىڭ 3027-ءسى نەمەسە 57,7 پايىزى – مەديتسينا قىزمەتكەرلەرى, 1222-ءسى (23,3 پايىزى) – پەداگوگتار, 275-ءى (5,2 پايىزى) – قۇقىق قورعاۋ ورگاندارىنىڭ قىزمەتكەرلەرى, 719-ى (13,8 پايىزى) – باسقا ادامدار», دەپ ايتىپ ءوتتى.
«ۆاكتسيناتسيا كەستە بويىنشا جۇرگىزىلۋدە. الدىمەن كوروناۆيرۋس جۇقتىرۋ دەڭگەيى جوعارى سالا وكىلدەرى ەكپە الۋدا. ءار كەزەڭ تولىق قامتىلعان سايىن حالىقتىڭ قالعان بولىگىنە كەزەك كەلەتىن بولادى», دەدى گ.ءابدىراحمانوۆا.
وسى كەزگە دەيىن وڭىردە 15250 ادام ىندەت جۇقتىرسا, سونىڭ 12367-ءسى نەمەسە 81,1 پايىزى جازىلىپ شىقتى. وبلىستا 241 ادام كوز جۇمدى. جىل باسىنان بەرى 73 ادام (قاڭتاردا – 28, اقپاندا – 15, ناۋرىزدا – 30) قايتىس بولسا, سونىڭ 39-ى – ايەلدەر, 34-ءى – ەرلەر. 61-ءى قالادا, 12-ءسى اۋدانداردا ومىردەن وزدى. قازىرگى تاڭدا 195 توسەكتىك 4 كارانتيندىك ستاتسيوناردا 11 ادام ەمدەلۋدە. ال 696 توسەكتىك 9 ينفەكتسيالىق ستاتسيوناردا جاتقاندار سانى 410-عا جەتتى. سونىڭ ىشىندە 22-ءسى جانساقتاۋ بولىمشەسىندە ەم الىپ جاتىر.
«اۋرۋدىڭ العاشقى بەلگىلەرى بايقالعان بويدا ەشقايدا بارماي, ۇيگە دارىگەردى شۇعىل شاقىرتۋ كەرەك. ويتكەنى ەمحانالاردا كەزەك كۇتكەندە, كوشەدە ينفەكتسيانى باسقا ادامدارعا جۇقتىرۋ قاۋپى جوعارى. سونداي-اق ءوزى قوسىمشا اۋرۋ جاماپ الۋى مۇمكىن. بۇل دەرتتىڭ اسقىنۋىنا, ءتىپتى ولىمگە سوقتىرۋى ىقتيمال. بەتپەردە رەجىمىن, الەۋمەتتىك اراقاشىقتىقتى ساقتاپ, ادامدار كوپ جينالاتىن قوعامدىق ورىندارعا بارۋدان اۋلاق بولىپ, سونىمەن قاتار وزگە قالالارعا ساپار شەگۋدى توقتاتا تۇرۋ قاجەت», دەدى گ.ءابدىراحمانوۆا.
