بۇگىنگى كۇنى التىن استىق وسىرەتىن قۇنارلى ءوڭىردىڭ ەڭسەسىن ەلدەن ەرەك كوتەرىپ, تولايىم تابىسىمەن ەرەكشەلەنىپ وتىرعان سەرىكتەستىكتىڭ سەرپىندى ءىسى ساتىمەن باستالىپ, ناتيجەلى ساباقتالۋدا. الدىمەن, جاقسىلىعىمەن جان جادىراتا كەلگەن جوبانىڭ الدىنا قويعان باستى ماقساتى تۋرالى ءبىر اۋىز ءسوز ايتا كەتەلىك. ول – بەلارۋستىڭ تيىمدىلىگى الدەقاشان دالەلدەنگەن, سان سىناقتان وتكىزىلگەن كوممۋنالدىق جانە اۋىل شارۋاشىلىعى سالالارىنىڭ وزىق تەحنيكالارىن ءوز ەلىمىزدە قۇراستىرىپ, ەكى ەلدىڭ اراسىنداعى ساۋدا ەكونوميكالىق بايلانىستى نىعايتۋ بولىپ تابىلادى.
سەرىكتەستىكتىڭ شىعاراتىن تەحنيكاسى قۋاتى مەن توزىمدىلىگى جاعىنان ءتيىمدى بولعان سوڭ از ۋاقىتتىڭ ىشىندە ەل ىشىندە جاقسى قىرىنان تانىلىپ, سۇرانىسقا يە بولىپ وتىر. وڭىنان وڭعارىلعان, ەلباسى نۇرسۇلتان نازارباەۆتىڭ ءداۋىر تىنىسىن تامىرشىداي تاپ باسىپ, ۋاقىتىندا قولداۋ كورسەتۋىنىڭ ارقاسىندا جاقسىلىعىمەن جۇرتشىلىققا تانىلعان سونى جوبانىڭ سوقپاعى زاڭعارلارعا باستاۋدا. بۇگىنگى بيىكتەن وتكەننىڭ ورنەگىنە كوز سالساڭ, شىنىندا دا كەڭەستىك داۋىردەن مۇرا بولىپ قالعان, بۇگىندە ساۋ تامتىعى قالماعان كونە تەحنيكانى جاڭاسىمەن, جاڭاسى بولعاندا دا جارامدىسىمەن الماستىرۋ ديقانداردىڭ قولىن ۇزارتا تۇسكەندىگى ايقىن. بۇگىنگى كۇنى وبلىستاعى ەگىستىك القاپتاردا كاسىپورىننىڭ ءوندىرىس الاڭدارىندا قۇراستىرىلعان «روستسەلماش», «كلەۆەر» اكتسيونەرلىك قوعامدارىنىڭ, AGCO-Amity JV LLC كومپانياسىنىڭ برەندتىك ونىمدەرىن كورسەڭىز, تاڭعالمايسىز. بۇلاردىڭ قاتارىندا ءدال سول ۋاقىتتا قاسقالداقتىڭ قانىنداي قات بولىپ, تاپتىرماي تۇرعان زاماناۋي استىق كومبايندارى, قۋاتتى تراكتورلار, الىمدىلىعى جوعارى ەگىس كەشەندەرى, ءارتۇرلى مودەلدەگى كوممۋنالدىق تەحنيكالار شىعارىلا باستادى. كورپوراتسيا 2019 جىلى 1464 دانا تەحنيكا شىعارسا, وتكەن جىلى 3 مىڭنان استام تەحنيكا مەن ءارتۇرلى بولشەكتەر دايىنداعان. استىقتى ءوڭىر ءۇشىن وتە-موتە قاجەت دۇنيە. توزعان تەحنيكا جاڭاسىمەن جاڭعىرتىلدى. قۋاتتى دا ونىمدىلىگى وتە جوعارى جاڭا كەشەندەر دارحان دالانىڭ تىنىسىن اشا ءتۇستى. ماڭداي تەرمەن وسىرىلگەن ءدان قاۋلاي كوكتەپ, ەل ىرىسىن مولايتتى.
اقيقاتىندا, جومارت دالانىڭ توسىندە اقىق ءدان ايالاعان ديقان قاۋىم ونىمدىلىگى وتە جوعارى, جاڭا زاماننىڭ تالابىنا تولىق جاۋاپ بەرەتىن تەحنيكاعا سۋساپ وتىرعان بولاتىن. جوعارىدا اتالعان الەمدىك برەندكە اينالعان تەحنيكالارعا قوسا, «قازاقستاننىڭ اگرويننوۆاتسيالىق كورپوراتسياسى» جشس 2020 جىلى «روستسەلماش» كومپانياسىمەن ليتسەنزيالانعان ءتيىستى كەلىسىم-شارتقا قول قويدى. بۇل كەلىسىم ەكى جاققا دا ءتيىمدى بولىپ شىقتى. وسى مامىلە شەڭبەرىندە Torum استىق كومباينى مەن Buhler Versatile-3000 سەريالى تراكتورلارى جانە كەڭالىمدى جەم-ءشوپ دايىنداۋ تەحنيكالارى شىعارىلا باستادى. بۇل تەحنيكالار دا جەرگىلىكتى اگرارشىلار ءۇشىن كوكتەن تىلەگەنى جەردەن تابىلعانداي ولجا بولاتىن.
شىن مانىندە استىقتى ءوڭىردىڭ دامۋىنا جاڭا سەرىكتەستىكتىڭ زور سەپتىگى ءتيدى. جوبانىڭ العاشقى كەزەڭىن جۇزەگە اسىرۋ ءۇشىن 2014 جىلى بەلارۋستىڭ «مينسك تراكتور زاۋىتى» اشىق اكتسيونەرلىك قوعامى جانە وتاندىق «قازاقستان اگرويننوۆاتسيالىق كورپوراتسياسى» جاۋاپكەرشىلىگى شەكتەۋلى سەرىكتەستىگى بىرلەسىپ, «متز-قايك» سەرىكتەستىگىن قۇرعان بولاتىن. كەيىن بۇل جوبا اۋقىمدى ماقساتتى كوزدەگەن يندۋستريالاندىرۋ كارتاسىنا ەنگىزىلدى. وبلىستىق اكىمدىكتىڭ قولداۋىنىڭ ارقاسىندا سۋمەن, ەلەكتر قۋاتىمەن جابدىقتالىپ, ينفراقۇرىلىمدى ءتۇزۋ ماسەلەسى وڭىنان شەشىلدى. العاشقى بەتتە ىسكەرلىك بايلانىس شەڭبەرىندە وڭىرگە اسا قاجەتتى 7 ءتۇرلى تەحنيكانىڭ 500 داناسى قۇراستىرىلدى. جاقسى جاڭالىققا ەل ەلەڭ ەتە ءتۇستى. اسىرەسە, دالا ءتوسىن تۇلەتكەندەر. ويتكەنى بىرلەسكەن كاسىپورىن دايىنداپ شىعاراتىن جاڭا زامانعى تراكتورلاردىڭ باعاسى دا ديقاندار ءۇشىن قولجەتىمدى ەدى. جالعىز تراكتورلار عانا ەمەس, جۇك كولىكتەرىنىڭ, ءتىپتى ارنايى ماقساتتاعى ماشينالاردىڭ دا الدەنەشە ءتۇرى شىعارىلا باستادى.
بۇگىنگى كۇنى ىركىلىسسىز جۇمىس ىستەپ تۇرعان كاسىپورىن اۋىل شارۋاشىلىعى مەن كوممۋنالدىق قىزمەتكە ارنالعان تەحنيكالاردىڭ 5 مىڭنان استام بىرلىگىن شىعارادى. وسى قۋاتتى تەحنيكالاردىڭ ارقاسىندا ءوڭىردىڭ ءوڭى كىرىپ قالعاندىعىن ەرەكشە ەكپىن ءتۇسىرىپ ايتا كەتكەنىمىز ورىندى. قۋاتتى تەحنيكاعا قولى جەتكەننەن كەيىن اۋىل شارۋاشىلىعى ەڭبەككەرلەرىنىڭ دە ەڭبەگى جانىپ سالا بەردى. وزگەنى بىلاي قويعاندا, وبلىس شارۋاشىلىقتارى سوڭعى جىلدارى 10 مىڭعا جۋىق شەتەلدىك تەحنيكانى ساتىپ العاندىعىن, وسى قۋاتتى كۇشتىڭ ارقاسىندا جەردە ونگەن ءدان ەش ىسىراپ بولماي, قۇت قامباسىنا ۋاقىتىندا قۇيىلىپ وتىرعاندىعىن ايتا كەتكەن ءجون.
جاڭا تەحنيكامەن جاراقتانعان ديقاندار اۋا رايى قۇبىلمالى سولتۇستىك وڭىردە ەگىن جيناۋ ناۋقانىن كۇزگى جاۋىنعا ۇرىندىرماي, ۋاقتىلى اتقارىپ ءجۇر. بۇعان سەبەپ بولىپ وتىرعان – الىمدىلىعى جوعارى شەتەلدىك تەحنيكالار. ەلباسىنىڭ كورەگەندىگىنىڭ ارقاسىندا جاڭا ساتىعا كوتەرىلگەن اۋىل شارۋاشىلىعى سالاسىنىڭ نەگىزگى ءونىمى – كوكشەتاۋ استىعى جالعىز ءوز ەلىمىزدە عانا ەمەس, شەت ەلدەردە دە جوعارى باعالانادى. تۇڭعىش پرەزيدەنتىمىز جۇرتشىلىقپەن جۇزدەسكەندە وبلىستى ەكونوميكالىق تۇرعىدان ءارتاراپتاندىرۋدىڭ نەگىزگى دىڭگەگى اگرارلىق سەكتور ەكەنىن اتاپ وتكەن بولاتىن. سول ويدىڭ يگىلىگىن بۇگىن ەل كورىپ وتىر. ماسەلەن, نۇر-سۇلتان قالاسىن ازىق-ت ۇلىكپەن قامتاماسىز ەتۋ بەلدەۋىندە ۇزىن-ىرعاسى 100-دەن استام جوبا جۇزەگە اسىرىلۋدا. استانالىقتاردىڭ اق داستارقانىنا قويىلاتىن ادال ءدام ءتۇرى مولايىپ, ساپاسى جاقسارىپ كەلەدى. بۇل ەڭ الدىمەن ازىق-ت ۇلىك بەلدەۋىن جاساپ وتىرعان وبلىستىڭ قارىمدى قارەكەتىنىڭ ناتيجەسى. مۇنىڭ ءوزى سوڭعى 15 جىلدا 10 مىڭنان استام جاڭا تراكتور, استىق جينايتىن كومباين, ءدان سەبەتىن كەشەنمەن قارۋلانعان ديقاندار ەڭبەگىنىڭ ارقاسى. ال وعان دەم بەرگەن, وڭتايلى جاعدايىن جاساعان, دەر كەزىندە جوبانىڭ جۇزەگە اسۋىنا مۇرىندىق بولىپ قاناتتاندىرعان – ەلباسى نۇرسۇلتان نازارباەۆ.
بۇگىنگى كۇنى ءىسى وڭىنان وڭعارىلعان ۇجىم اتاق-داڭقى الەمگە بەلگىلى «ۆيراج» حولدينگىنىڭ ۇلەسكەر كومپانياسى رەتىندە وڭىرلىك يندۋستريالاندىرۋدىڭ الدىڭعى لەگىندە تۇر. كوكشەتاۋدىڭ يندۋستريالىق-تەحنولوگيالىق پاركىن قامتيتىن كورپوراتسيا ءوزىنىڭ مەملەكەتتىك قارجىلىق تەتىكتەرىن «كازاگروقارجى», «اگرارلىق نەسيە كورپوراتسياسى», «برك-ليزينگ» اكتسيونەرلىك قوعامدارى ارقىلى ىسكە اسىرىپ, ايتۋلى ونىمدەرىن ەلىمىزدىڭ 19 قالاسىنداعى نارىقتىق اينالىمعا شىعارىپ وتىر. جالعىز ءبىزدىڭ ايماق قانا ەمەس, تۇتاس ەل, بارشا جۇرت يندۋستريالىق جوبا جەتىستىگىنىڭ جەمىسىن كورۋدە.
اقمولا وبلىسى
