الماتىدا ىندەتتىڭ ءورشۋى جاڭا شتامداردىڭ تابىلۋىمەن بايلانىستى ەكەنى دالەلدەندى. بىراق قالانىڭ ەپيدەميالىق احۋالى ايتارلىقتاي قيىن بولسا دا, الاڭسىز جۇرگەن حالىق كوپ. وعان قوسا مەگاپوليستە ءالى دە قوعامدىق كولىكتەردىڭ جەتىسپەۋشىلىگى بايقالادى. بۇل اۆتوبۋستارداعى ادامداردىڭ تاڭەرتەڭ جانە كەشكىلىك كولىكتەردى سىعىلىسىپ جۇمىسقا بارىپ-قايتۋعا ماجبۇرلەپ وتىر. سوندىقتان ساقتىق شارالارىن كۇشەيتۋدىڭ كوكەيكەستىلىگى ساعات سايىن ارتىپ كەلەدى.
ءوز كەزەگىندە قالالىق موبيلدىلىك باسقارماسى, كولىك حولدينگى مەن قۇقىق قورعاۋ ورگاندارى قىزمەتكەرلەرىنەن قۇرالعان مونيتورينگ توپتارى جولاۋشىلاردىڭ سانيتارلىق ەرەجەلەردى ۇستانۋىن بۇرىنعىدان دا قاتاڭ تەكسەرۋگە كوشتى. قالانىڭ بارلىق مارشرۋتتارىن كەزەكپەن تەكسەرۋ جوسپارلانعان.
بۇعان دەيىن قوعامدىق كولىكتە تەك باسقارما قىزمەتكەرلەرى رەيد جۇمىستارىن جۇرگىزىپ, تەك ەسكەرتۋ جاساي الاتىن ەدى. قازىرگى مونيتورينگ توبى سانيتارلىق ەرەجەلەردى بۇزعاندارعا ايىپپۇل سالىپ, شارا قولدانۋعا قۇقىلى.
سونىمەن قاتار قالادا جولاۋشىلاردىڭ قاۋىپسىزدىگىن قامتاماسىز ەتۋ ماقساتىندا كەشەندى ءىس-شارالار جۇزەگە اسىرىلماق. جولاۋشىلار اعىمىنا قاراي جۇكتەمەسى جوعارى 28 باعىت بويىنشا قوسىمشا اۆتوبۋستار شىعارىلىپ, ءجۇرۋ كەستەسى قايتا قاراستىرىلدى. سوڭعى ايالدامالاردا اۆتوبۋس سالوندارىنا دەزينفەكتسيا جاسالادى. سونداي-اق اۆتوبۋستار مەن مەترودا ماسكا تاعۋ قاجەتتىلىگى تۋرالى اقپاراتتىق اۋديوحابارلاما جاسالادى. جۇرگىزۋشىلەرگە جۇمىس ۋاقىتىندا مىندەتتى تۇردە ماسكا تاعۋ, ماسكاسىز جولاۋشىلاردى سالونعا كىرگىزبەۋ جانە قاجەت بولعان جاعدايدا ءتۇسىرىپ كەتۋ تۋرالى تاپسىرما بەرىلدى. كولىك حولدينگى قىزمەتكەرلەرى دە كارانتين كەزىندە سانيتارلىق نورمالاردى بۇزۋشىلارعا ەسكەرتۋ جاساپ, اۆتوبۋستان ءتۇسىرۋ تۋرالى تاپسىرما الدى.
الماتىلىقتاردىڭ قاجەتتىلىگىن تولىق وتەۋ ءۇشىن قالاعا مىڭعا جۋىق اۆتوبۋس قاجەت ەكەندىگى ءمالىم. بۇل باعىتتا جۇمىستار جالعاسىپ جاتىر. 2021 جىلى كوممۋنالدىق اۆتوپارككە 150 جاڭا گازبەن جۇرەتىن اۆتوبۋس جەتكىزىلدى. جولاۋشىلاردىڭ سۇرانىسىنا قاراي اۆتوبۋستاردىڭ ءبىر بولىگى ەسكى اۆتوبۋستاردى جاڭالاۋعا جانە مارشرۋتتاردى كۇشەيتۋگە, ال ءبىر بولىگى جاڭا مارشرۋتتار اشۋعا جىبەرىلدى. جىلدىڭ اياعىنا دەيىن تاسىمالداۋشىلار ەكى جۇزدەن اسا اۆتوبۋس ساتىپ الۋدى جوسپارلاپ وتىر.
«وتكەن جىلعى ىندەت باستالعان كەزەڭمەن سالىستىرعاندا, بىلتىر شىلدە ايىندا ەپيدەميالىق احۋال شيەلەنىسىپ ەڭ كوپ – 6 372 جاعداي تىركەلسە, ءساۋىر ايىنان باستاپ جۇقتىرۋ دەڭگەيى كوبەيە باستاپ, 969 ادامنىڭ ىندەت جۇقتىرعانى انىقتالعان بولاتىن. ەكىنشى تولقىن 2020 جىلدىڭ قازان ايىندا 366 جاعدايدان باستالىپ, بيىل قاڭتار ايىندا 3 607 جاعدايعا جەتتى, اقپاندا 2 366 جاعدايعا دەيىن ازداپ تومەندەگەنىمەن, كوروناۆيرۋس ينفەكتسياسىنىڭ مۋتاتسيالانعان شتامدارىنىڭ (وڭتۇستىك افريكالىق, بريتاندىق) تىركەلۋىنە بايلانىستى ءۇشىنشى تولقىن باستالدى», دەيدى الماتى قالاسى سانيتارلىق-ەپيدەميالىق باقىلاۋ دەپارتامەنتى باسشىسىنىڭ ورىنباسارى اسەل قالىقوۆا.
اۋرۋ جۇقتىرۋدىڭ كوبەيۋى, مۋتاتسيالانعان شتامداردىڭ انىقتالۋىنا جانە ونىڭ ينكۋباتسيالىق كەزەڭىنىڭ قىسقا بولۋى سالدارىنان بارلىق جاس توپتاردىڭ ينفەكتسيا جۇقتىرعانى بايقالادى. ەپيدەميانىڭ دامۋ ىرعاعىنىڭ سوڭعى 7 كۇنگى سيپاتتاماسى: 23 ناۋرىزدا – 380 جاعداي, 24 ناۋرىزدا – 341 جاعداي, 25 ناۋرىزدا – 330 جاعداي, 26 ناۋرىزدا – 450 جاعداي, 27 ناۋرىزدا – 510 جاعداي, 28 ناۋرىزدا – 415 جاعداي, 29 ناۋرىزدا – 545 جاعداي, 30 ناۋرىزدا – 526 جاعداي, 31 ناۋرىزدا – 515 جاعداي جانە باسقا دا ينفەكتسيانىڭ تارالۋىنىڭ كوبەيۋى تىركەلدى. بۇل – مۋتاتسيالانعان كۆي شتامدارىنىڭ جۇعۋ كورسەتكىشتەرى جوعارى ەكەنىن تاعى دا راستايدى. سونىمەن قاتار سەبد دەرەكتەرى بويىنشا 20 ناۋرىزدان باستاپ قابىلدانعان ەپيدەميالىق جاعدايدى تۇراقتاندىرۋ جونىندەگى ءىس-شارالارعا باعالاۋ جۇرگىزىلدى, وندا ساۋدا نىساندارىندا جۇقتىرعانداردىڭ ۇلەس سالماعى 3%-دان استام (23,7%-دان 20,5%-عا دەيىن), ساۋدا ورتالىقتارى مەن ساۋدا ورتالىقتارىنىڭ دەمالىس كۇندەرى بازارلاردى توقتاتا تۇرۋ ناتيجەسى رەتىندە, قوعامدىق تاماقتاندىرۋ كاسىپورىندارىندا 3,5 ەسە تومەندەگەنى انىقتالدى. جۇمىس ورنى بويىنشا ناۋقاسپەن بايلانىستا بولعان كەزدە جۇقتىرۋدى 2%-عا, قوعامدىق كولىكتە 1%-عا تومەندەتۋ بويىنشا بەلگىلى ءبىر ناتيجەگە قول جەتكىزىلدى.
بارلىق ينفەكتسيالىق ستاتسيونارلاردا 5 مىڭ توسەكتىك ورىن بولسا, 2 849 ادام (107 بالا) ەمدەلىپ جاتىر, ونىڭ ىشىندە ءحالى اسا اۋىر – 45, اۋىر تۇردە – 409, جاعدايى ورتاشا 2 395 پاتسيەنت بار.
ال ۆاكتسينالاۋ ماسەلەسىنە كەلەتىن بولساق, 1 اقپاننان ساۋىرگە دەيىن ۆاكتسينانىڭ 15 750 دوزاسى كەلىپ ءتۇستى. 1 كومپونەنت بويىنشا 100% يگەرىلدى. رەۆاكتسيناتسيا ءجۇرىپ جاتىر. ەكىنشى كومپونەنت بويىنشا 3 810 ادام قابىلدادى. بۇگىن بمسك بويىنشا ۆاكتسينانىڭ 4 ترانش بويىنشا 21 860 دوزا ءبولىندى.
الماتى
