سەناتوردىڭ پىكىرىنشە, بىلتىر كاسپي تەڭىزىنىڭ قازاقستاندىق سەكتورىندا 15 ملن توننا مۇناي ءوندىرىلدى, سونىڭ 2,2 ملن تونناسى اقتاۋ پورتى ارقىلى تاسىمالداندى.
ودان باسقا, 2020 جىلى كەمەلەر اقتاۋ جانە قۇرىق تەڭىز پورتتارىنا 1 283 رەت كىرگەن, ال 2025 جىلعا دەيىن بۇل كورسەتكىش 2 ەسە ارتادى دەگەن جوسپار بار.
مۇنىڭ ءبارى كاسپي تەڭىزىنىڭ لاستانۋ قاۋپىن ارتتىرادى جانە قازىر بەلسەندى شارالار قابىلداۋ اسا ماڭىزدى. وسىنداي شارالاردىڭ ءبىرى تەڭىزدەگى جەدەل-قۇتقارۋ قىزمەتىن قۇرۋ بولۋعا ءتيىس.
«كاسپي تەڭىزىنىڭ لاستانۋىنىڭ نەگىزگى قاتەرى ءوندىرۋ جانە تاسىمالداۋ كەزىندە مۇناي جانە مۇناي ونىمدەرىنىڭ توگىلۋى بولىپ سانالادى. سوندىقتان تەڭىز بەتىنىڭ لاستانۋ ايماعىنىڭ ۇلعايۋىنا جول بەرمەۋ ءۇشىن مۇناي داقتارىن وقشاۋلاۋ جانە جويۋ ۇلكەن ۇيىمداستىرۋشىلىق, تەحنيكالىق, تەحنولوگيالىق كۇش جىگەردى قاجەت ەتەدى. وكىنىشكە قاراي, بۇگىنگى تاڭدا قازاقستان رەسپۋبليكاسىندا بەلگىلەنگەن تارتىپپەن اتتەستاتتالعان, ارنايى تەحنيكامەن, ماتەريالدارمەن جاراقتالعان, بىلىكتى جانە تاجىريبەلى مامانداردىڭ, قۇتقارۋشىلاردىڭ جەتكىلىكتى سانى بار بولىمشە جوق», دەدى سۇيىندىك الداشەۆ.
سۇيىندىك الداشەۆتىڭ ايتۋىنشا, مۇنداي قىزمەتتى قۇرۋدىڭ تاعى ءبىر سەبەبى, سۋداعى تەحنوگەندىك قاۋىپسىزدىكتى قامتاماسىز ەتۋ بويىنشا الەمدىك تاجىريبەدە قولدانىلاتىن ادىستەر قۇرعاقتاعى ءىس-شارالاردان تۇبەگەيلى ەرەكشەلەنەدى.
ال ەلدىڭ توتەنشە جاعدايلار مينيسترلىگى جۇيەسىندەگى كۇشتەر مەن قۇرالدار, سونىڭ ىشىندە جەدەل-قۇتقارۋ جاساقتارى ونداي مىندەتتەردى ورىنداي المايدى. سەناتور سونداي-اق مۇنداي ارنايى تەڭىز جەدەل-قۇتقارۋ قىزمەتتەرى كاسپي ماڭىنداعى باسقا ەلدەردە, اتاپ ايتقاندا ازەربايجاندا, رەسەيدە جانە تۇرىكمەنستاندا قۇرىلىپ, جۇمىس ىستەپ جاتقانىن ايتتى.
