اقتوبە وبلىسىنىڭ پد ەسىرتكى قىلمىسىنا قارسى ءىس-قيمىل باسقارماسىنىڭ قىزمەتكەرلەرى ۇلتتىق ۇلاننىڭ ارنايى ءبولىنىسىنىڭ جاۋىنگەرلەرىمەن بىرگە جەدەل ءىس-شارالار وتكىزۋ بارىسىندا قىلمىستىق توپتىڭ ارەكەتتەرىنىڭ جولىن كەستى. پوليتسەيلەر قىلمىستىق توپ مۇشەلەرىنىڭ اقتوبە وبلىسىنىڭ اۋماعىندا اسا ءىرى كولەمدە ماريحۋانا مەن گاشيشتى تاسىمالداۋمەن, ساقتاۋمەن جانە ساتۋمەن اينالىسقانىن انىقتادى. كورسەتىلگەن ادامداردىڭ قىلمىستىق ارەكەتتەرى ايعاقتارمەن بەكىتىلىپ, باسقا دا جاسىرىن ءىس-شارالار وتكىزىلدى, ناتيجەسىندە ءتارتىپ ساقشىلارى ەسىرتكى ديللەرلەرىنىڭ ىزىنە ءتۇستى.
– وپەراتسيا وتكىزۋ تۋرالى اقپاراتتىڭ تارالۋىنا جول بەرمەۋ ءۇشىن ۇستاۋ جانە ءتىنتۋ شارالارى بىردەن بىرنەشە مەكەنجايدا وتكىزىلدى, – دەدى اقتوبە وبلىسىنىڭ پد ەسىرتكى قىلمىسىنا قارسى ءىس-قيمىل باسقارماسىنىڭ باستىعى نۋرلان تاۋشانباەۆ.
مىسالى, اعايىندى جۇبانوۆتار كوشەسىندە “Toyota-Raf4” ماركالى كولىك توقتاتىلدى. كولىك سالونىندا 54 جاستاعى ەسىرتكى جەتكىزۋشى بولدى, ونىڭ تۇرعىلىقتى مەكەنايىنان بەس كەلى گاشيش الىندى. ونىمەن بىرگە ونىڭ ەكى تانىسى بولدى. ولاردىڭ بىرىندە وزىمەن بىرگە 1 كەلىدەن استام ماريحۋانا جانە 10 گرامنان استام گاشيش بولدى, ونىڭ پاتەرىن ءتىنتۋ كەزىندە 22 كەلىدەن استام ماريحۋانا تابىلدى.
بۇدان باسقا تۇرعىلىقتى جەرلەرى بويىنشا قىلمىستىق توپتىڭ ءۇش مۇشەسى ۇستالدى. ۇستالعانداردىڭ بارلىعى بۇرىن ەسىرتكى ساتقاندارى ءۇشىن قىلمىستىق جاۋاپكەرشىلىككە تارتىلعان. پوليتسەيلەر بارلىعى 24 كەلىدەن استام ماريحۋانا جانە 5 كەلىدەن استام گاشيش الدى. مۇنداي ەسىرتكىنىڭ “قارا نارىقتاعى” قۇنى 27,2 ميلليون تەڭگەنى قۇرايدى.
