جاڭا زاۋىت ماحامبەت اۋدانىنداعى سارىتوعاي اۋىلىندا سالىنادى.
شەتەلدىك قۇرىلعىلارمەن جابدىقتالاتىن زاۋىتتا بولاشاقتا ايىنا 18 مىڭ دانادان استام سۋ ەسەپتەگىش قۇرىلعىلارى شىعارىلادى.
«قازىرگىدەي كۇردەلى كەزەڭدە ءبىز ءۇشىن جۇمىس ورنى مەن ءوندىرىس وشاعى ماڭىزدى. سۋ ەسەپتەگىش قۇرالدارىن شىعاراتىن زاۋىت – ماحامبەت اۋدانىندا بوي تۇزەيتىن العاشقى وندىرىستىك ورىن. ەكونوميكاعا پايدالى مۇنداي جوبالاردى كوبەيتۋ الداعى ۋاقىتتا دا جالعاسادى» دەدى وبلىس اكىمى ماحامبەت دوسمۇحامبەتوۆ.
جاڭا زاۋىتتا 80 ادام جۇمىسقا تارتىلادى. ونىڭ 60-تان استامى ماحامبەت اۋدانىنان الىنادى. سولاردىڭ قاتارىندا سارىتوعاي اۋىلىنىڭ تۇرعىنى ازامات سۇلتاشەۆ تا بار.
«بۇعان دەيىن تەڭىز كەنىشىندە جۇمىس ىستەپ كەلدىم. اۋىلىمىزدا وتاندىق ءونىم شىعاراتىن زاۋىت اشىلاتىنىن ەستىپ, وسىندا اۋىستىم. مۇندا مەنىمەن بىرگە اۋىلداستارىم دا جۇمىس ىستەيدى. ارنايى وقۋ كۋرسىنان ءوتتىم» دەيدى ول.
ال, «Guryev» جشس-ءنىڭ ديرەكتورى جەڭىس بەكباساروۆتىڭ ايتۋىنشا, بۇل - قازاقستانداعى وتاندىق ەسەپتەگىش قۇرالدارىن شىعاراتىن العاشقى كاسىپورىن. قاجەتتى شيكىزاتتار ەلىمىزدەن اكەلىنەدى. ءارى ەكولوگيالىق تۇرعىدان قاۋىپسىز بولادى. العاشقىدا زاۋىت وبلىس كاسىپورىندارىنىڭ سۇرانىسىن قامتاماسىز ەتەدى. كەيىن وزگە وڭىرلەرگە سۇرانىسپەن جىبەرىلەدى.
«سۋ ەسەپتەگىش قۇرالدارى شەتەلدەن جەتكىزىلىپ جاتىر. سونداي-اق شەتەلدەن اكەلىنگەن بولشەكتەرى قۇراستىرىلادى. سوندىقتان بۇل زاۋىت ەلىمىز ءۇشىن وتە پايدالى ءوندىرىس بولادى دەپ كۇتىلۋدە. باستاپقىدا مۇندا مەحانيكالىق ەسەپتەگىش قۇرالدار, كەيىن ەلەكتروندى تۇرلەرى شىعارىلادى. مۇنىڭ تيىمدىلىگى اي سايىن سۋدى قانشا تۇتىنعانىن قۇرىلعى اۆتوماتتى تۇردە ەسەپتەيدى. وسى ورايدا, مۇنى ەلىمىزدە جۇرگىزىلىپ جاتقان اقپاراتتى تاسىمالداۋ جۇيەلەرىن تسيفرلاندىرۋعا دا سەپتىگى تيەتىن ەرەكشە جوبا دەۋگە بولادى», دەدى جەڭىس بەكباساروۆ.
زاۋىت باسشىلىعى ەكى كومپانيامەن مەموراندۋمعا قول قويدى. اتالعان زاۋىت قۇرىلىسى الداعى قىركۇيەكتە اياقتالىپ, وندىرىستىك جۇمىسى باستالادى.
