28 ناۋرىزدا نۇر-سۇلتان قالاسى اۋەجايىنداعى جەلىلىك پوليتسيا بولىمىنە اۋەجاي قىزمەتكەرى تەلەفون شالىپ, ءبىر ەر ادامنىڭ اقپارات بيۋروسىنىڭ قاسىندا قوعامدىق ءتارتىپتى بۇزىپ تۇرعانى تۋرالى حابارلاعان. ول تۇركىستان وبلىسىنىڭ 26 جاستاعى تۇرعىنى بولىپ شىقتى.
تەكسەرىس جۇرگىزگەن كولىكتەگى پوليتسەيلەر ءتارتىپ بۇزۋشىنىڭ قوعامدىق ورىندا ماس كۇيدە بولعانى, دورەكىلىك تانىتىپ, ەلەكتروندىق تەمەكى شەگىپ تۇرعانىن جانە وزىنە جاسالعان ەسكەرتۋگە ءمان بەرمەي تۇرعانىن انىقتادى. ەر ادام سونداي-اق قۇقىققورعاۋ ورگانى قىزمەتكەرىنىڭ تالابىنا باعىنبادى.
مەديتسينالىق كۋالاندىرۋ قورىتىندىسىنا سايكەس, ونىڭ ورتاشا دارەجەدە ماس كۇيدە بولعانى انىقتالدى. ۇستالعان ازاماتقا قاتىستى قر اكىمشىلىك قۇقىق بۇزۋشىلىق تۋرالى كودەكسىنىڭ 440-بابى 1-ءبولىمى, 441-بابى 1-ءبولىمى جانە 667-بابى 1-ءبولىمى بويىنشا بىردەن ءۇش اكىمشىلىك ماتەريال تولتىرىلعان. وعان 20 اەك كولەمىندە ايىپپۇل سالىندى. ءتارتىپ ساقشىسىنىڭ زاڭدى تالابىنا باعىنباۋعا قاتىستى ماتەريال پروتسەسسۋالدىق شەشىم قابىلداۋ ءۇشىن نۇر-سۇلتان قالاسىنىڭ مامانداندىرىلعان اۋدانارالىق اكىمشىلىك سوتىنا جولداندى.
