جاقىندا قازاقستان رەسپۋبليكاسىنىڭ پرەمەر-ءمينيسترى اسقار مامين باتىس قازاقستان وبلىسىنىڭ كەيبىر ءبىلىم بەرۋ ۇيىمدارىنا اتاۋ بەرۋ جانە ولاردىڭ اتاۋلارىن وزگەرتۋ تۋرالى ۇكىمەت قاۋلىسىنا قول قويدى
بۇل قاۋلىعا سايكەس, بۇدان بىلاي باتىس قازاقستان وبلىستىق دارىندى بالالارعا ارنالعان مامانداندىرىلعان مەكتەپ-گيمنازيا-ينتەرناتى اباي ەسىمىمەن اتالاتىن بولدى.
ايتا كەتەيىك, بۇل مەكتەپ-گيمنازيا – تۇلەكتەرى ۇبت سىناعىندا ەلىمىز بويىنشا ۇنەمى ەڭ ۇزدىك ناتيجە كورسەتەتىن ماقتاۋلى مەكتەپ.
اتاۋى جاڭارعان ءبىلىم وردالارى اراسىندا بايتەرەك اۋدانىنداعى 9 اۋىلدىق مەكتەپ تە بار. رەسەي فەدەراتسياسىمەن شەكارادا ورنالاسقان بۇل اۋداندا ەلدىمەكەن, مەكەمە-ۇيىمدار اتاۋلارى تاۋەلسىزدىك تالاپتارىنا سايكەس كەلمەيتىنى بۇرىن دا ايتىلىپ جۇرەتىن. مىنە, ەندى ۇكىمەت قاۋلىسىنان كەيىن داريان مەكتەپ-گيمنازيا-ينتەرناتى – «اباي اتىنداعى مەكتەپ-گيمنازيا-ينتەرناتى», ترەكين جالپى ورتا ءبىلىم بەرەتىن قازاق مەكتەبى – قادىر مىرزا ءالى اتىنداعى, پەرۆوسوۆەتسك جالپى ورتا ءبىلىم بەرەتىن مەكتەبى – شوقان ءۋاليحانوۆ اتىنداعى, ششاپوۆ جالپى ورتا ءبىلىم بەرەتىن مەكتەبى – باۋىرجان مومىش ۇلى اتىنداعى, باتۋرين جالپى ورتا ءبىلىم بەرەتىن مەكتەبى – تالعات بيگەلدينوۆ اتىنداعى, نوۆەنكي جالپى ورتا ءبىلىم بەرەتىن مەكتەبى – قاسىم قايسەنوۆ اتىنداعى, ۋليانوۆ جالپى ورتا ءبىلىم بەرەتىن مەكتەبى – ءىلياس ەسەنبەرلين اتىنداعى جالپى ءبىلىم بەرەتىن ورتا مەكتەپ دەپ اتالاتىن بولدى.
وسى قاۋلىدا شىڭعىرلاۋ اۋدانىنداعى بەلوگور نەگىزگى مەكتەبى – اقتاۋ اۋىلىنىڭ نەگىزگى ءبىلىم بەرەتىن ورتا مەكتەبى, پولتاۆا نەگىزگى ورتا ءبىلىم بەرەتىن مەكتەپ-بالاباقشاسى – ارداق اۋىلىنىڭ نەگىزگى ءبىلىم بەرەتىن ورتا مەكتەپ-بالاباقشاسى بولىپ وزگەرتىلگەنى دە ايتىلعان. اتالعان اۋىلداردىڭ تاريحي اتاۋىن قايتارىپ العانىنا بىرنەشە جىل بولعان ەدى.
- ءبىلىم وردالارىنا وسكەلەڭ ۇرپاققا رۋح بەرەتىن ۇلى تۇلعالارىمىزدىڭ ەسىمىن بەرۋ جۇمىستارى بولاشاقتا دا جالعاسادى. قازىردىڭ وزىندە قاراتوبە اۋدانىنداعى ەكى مەكتەپتى عاريفوللا قۇرمانعاليەۆ پەن اكادەميك قاجىم جۇماليەۆتىڭ ەسىمىمەن اتاۋ تۋرالى ۇسىنىس ءتۇستى. ورال قالاسىندا دا باۋىرجان مومىش ۇلى مەن قادىر مىرزا ءالى ەسىمىن سۇراپ وتىرعان مەكتەپتەر بار. قازىر قۇجاتتارى قاتتالىپ, ءتيىستى راسىمدەرى جاسالىپ جاتىر, دەيدى باتىس قازاقتان وبلىستىق تىلدەردى دامىتۋ باسقارماسىنىڭ باس مامانى ءىزباسار جۇماعالي.
