«وسى جىلدىڭ 29 ناۋرىزىنداعى جاعداي بويىنشا الماتى, قىزىلوردا جانە تۇركىستان وبلىستارىندا اۋىل شارۋاشىلىعى داقىلدارىن ەگۋ جۇمىسى ءجۇرىپ جاتىر. اتاپ ايتقاندا, 67,7 مىڭ گەكتارعا جازعى ماساقتى ءداندى داقىلدار, 6,5 مىڭ گەكتارعا كارتوپ, 10,3 مىڭ گەكتارعا كوكونىس داقىلدارى, 18,7 مىڭ گەكتارعا كوپجىلدىق ءشوپ ەگىلدى. وبلىس اكىمدىكتەرىنىڭ اقپاراتىنا سايكەس, بۇگىندە 2,4 ملن توننا تۇقىم قۇيىلعان. بۇل جوسپاردىڭ 100,2 پايىزى», دەدى مينيستر.
ءمينيستردىڭ ايتۋىنشا, 2021 جىلى تۇقىم شارۋاشىلىعىن قولداۋعا 11,8 ملرد تەڭگە ءبولىندى. بۇل ەليتا تۇقىمدارىن قولدانۋ مولشەرىن 7,4 پايىزعا ارتتىرۋعا مۇمكىندىك بەرەدى.
«مينەرالدى تىڭايتقىشتار ساتىپ الۋدى سۋبسيديالاۋعا وبلىستاردىڭ جەرگىلىكتى بيۋدجەتىنەن 26,1 ملرد تەڭگە كوزدەلگەن. وسىنىڭ ارقاسىندا مينەرالدى تىڭايتقىشتار قولدانۋ مولشەرى 3,3 پايىزعا ارتتى. وبلىس اكىمدىكتەرىنىڭ جەدەل اقپاراتى بويىنشا بۇگىندە رەسپۋبليكا ديقاندارىنا كوكتەمگى دالا جۇمىستارىن جۇرگىزۋ ءۇشىن 117,6 ملن توننا مينەرالدى تىڭايتقىش جەتكىزىلگەن. قازىرگى ۋاقىتتا الماتى, قوستاناي, جامبىل, تۇركىستان وبلىستارىندا سۋبسيديالاۋعا ارنالعان ءوتىنىم قابىلدانىپ جاتىر. جاقىن ارادا ءوتىنىم قابىلداۋ باتىس قازاقستان جانە سولتۇستىك قازاقستان وبلىستارىندا باستالادى. قالعان وبلىستاردا سۋبسيديالار تىزبەلەرى مەن نورمالاردى بەكىتۋ جۇمىستارى اياقتالىپ قالدى», دەدى ول.
ساپارحان وماروۆتىڭ دەرەگىنشە, بيىل پەستيتسيدتى سۋبسيديالاۋعا وبلىستاردىڭ جەرگىلىكتى بيۋدجەتىندە 30,6 ملرد تەڭگە كوزدەلگەن. بۇل بىلتىرعى جىلعا قاراعاندا 15,8 پايىزعا كوپ جانە قولايلى فيتوسانيتارلىق جاعدايدى قامتاماسىز ەتۋگە مۇمكىندىك بەرەدى.
