شارۋالاردىڭ ەگىس ناۋقانىنا دايىندىعى تۋرالى اۋىل شارۋاشىلىعى ءمينيسترى ساپارحان وماروۆ, جانار-جاعارماي ماتەريالدارىمەن قامتاماسىز ەتىلۋى تۋرالى ەنەرگەتيكا ءمينيسترى نۇرلان نوعاەۆ, وڭىرلەردەگى احۋال تۋرالى تۇركىستان وبلىسىنىڭ اكىمى ومىرزاق شوكەەۆ, قوستاناي وبلىسىنىڭ اكىمى ارحيمەد مۇحامبەتوۆ, سولتۇستىك قازاقستان وبلىسىنىڭ اكىمى قۇمار اقساقالوۆ, اقمولا وبلىسىنىڭ اكىمى ەرمەك مارجىقپاەۆ باياندادى.
بيىل 22,7 ملن گا جەرگە ەگىن ەگۋ جوسپارلانعان, بۇل 2020 جىلعا قاراعاندا 186,6 مىڭ گا ارتىق. ءداندى داقىلدار مەن ءداندى بۇرشاقتى داقىلدار 15,8 ملن گا (ونىڭ ىشىندە بيداي – 12,1 ملن گا), مايلى داقىلدار – 3 ملن گا, ماقتا – 116,5 مىڭ گا, قانت قىزىلشاسى – 21,8 مىڭ گا, كوكونىس جانە كارتوپ – 489 مىڭ گا, جەمشوپ داقىلدارى 3,4 ملن گا جەرگە ەگىلەدى.
كوكتەمگى دالا جۇمىستارىن جۇرگىزۋ ءۇشىن 380 مىڭ توننا ديزەل وتىنىنا قاجەتتىلىك انىقتالدى. اۋىل شارۋاشىلىعى تاۋارلارىن وندىرۋشىلەر ءۇشىن ونىڭ ورتاشا باعاسى شامامەن ليترىنە 165 تەڭگەنى قۇرايدى.
ەلىمىزدە 141,7 مىڭ تراكتور, 73,2 مىڭ تۇقىم سەپكىش, 221,2 مىڭ توپىراق وڭدەۋ قۇرالى, 4,3 مىڭ ەگىس كەشەنى بار. 2021 جىلعى 29 ناۋرىزداعى جاعداي بويىنشا اۋىل شارۋاشىلىعى تەحنيكاسىنىڭ كوكتەمگى ەگىس جۇمىستارىن جۇرگىزۋگە دايىندىعى 97% قۇرايدى.
اگروونەركاسىپتىك كەشەن سۋبەكتىلەرىن قولداۋ ءۇشىن «اگرارلىق نەسيە كورپوراتسياسى» اق رەسپۋبليكالىق بيۋدجەتتەن 70 ملرد تەڭگە كولەمىندە بيۋدجەتتىك كرەديت ءبولدى. تۇپكى قارىز الۋشىلار ءۇشىن سىياقى مولشەرلەمەسىنىڭ جىلىنا 5%-دان اسپايدى. بولىنگەن قاراجات 3 ملن گا ەگىس القابىن قامتي وتىرىپ, 2400 اوك سۋبەكتىسىن قارجىلاندىرۋعا مۇمكىندىك بەرەدى.
بيۋدجەتتىك كرەديت بەرۋمەن قاتار, بيىلعى جىلى اۋىل شارۋاشىلىعى ونىمدەرىن فورۆاردتىق ساتىپ الۋدى جۇزەگە اسىرۋ ءۇشىن بولىنگەن قاراجاتتىڭ كولەمى 24,5 ملرد تەڭگەدەن 45,3 ملرد تەڭگەگە دەيىن ارتتى.
«كوكتەمگى ەگىس جۇمىستارىن ساپالى ءارى ۋاقتىلى جۇرگىزۋ ەلدىڭ ازىق-ت ۇلىك قاۋىپسىزدىگىن قامتاماسىز ەتۋدىڭ ماڭىزدى فاكتورلارىنىڭ ءبىرى. بىلتىر پاندەمياعا قاراماستان ەگىس جۇمىستارى وتە جوعارى دەڭگەيدە جۇرگىزىلدى. اگروتەحنولوگيالار ءدال ساقتالىپ, تىڭايتقىشتار مەن وسىمدىكتەردى قورعاۋ قۇرالدارى ۋاقتىلى سالىندى. بۇل مول استىق جيناۋعا مۇمكىندىك بەردى. بيىلعى جىلى ۇكىمەت كوكتەمگى ەگىستى قارجىلاي جانە ماتەريالدىق-تەحنيكالىق قامتاماسىز ەتۋ بويىنشا بارلىق قاجەتتى شەشىمدەردى قابىلدادى», دەدى ا. مامين.
پرەمەر-مينيستر ەكولوگيا مينيسترلىگىنە اۋىل شارۋاشىلىعى مينيسترلىگىمەن جانە اكىمدىكتەرمەن بىرلەسىپ, رەسپۋبليكانىڭ وڭتۇستىك وڭىرلەرىندەگى اۋىل شارۋاشىلىعى ءونىمىن وندىرۋشىلەردى سۋارمالى سۋمەن, ونىڭ ىشىندە ۇزاق مەرزىمدى پەرسپەكتيۆادا تۇراقتى قامتاماسىز ەتۋ بويىنشا شارالار قابىلداۋدى تاپسىردى.
وڭىرلەردىڭ اكىمدەرىنە اۋىل شارۋاشىلىعى ءونىمىن وندىرۋشىلەر ءۇشىن تىزبەلەر مەن سۋبسيديالار نورمالارىن بەكىتۋ جۇمىسىن ءبىر اپتا ىشىندە اياقتاۋ, ەنەرگەتيكا مينيسترلىگىنە بەكىتىلگەن كەستە مەن باعالار بويىنشا ەگىس جۇمىستارىن جۇرگىزۋ ءۇشىن ديزەل وتىنىنىڭ قاجەتتى كولەمىن جەتكىزۋدى قامتاماسىز ەتۋ تاپسىرىلدى.
«اۋىل شارۋاشىلىعى مينيسترلىگى وبلىستاردىڭ اكىمدىكتەرىمەن بىرلەسىپ, ەگىس الاڭدارىنا جۇرگىزىلىپ جاتقان ءارتاراپتاندىرۋ شەڭبەرىندە الەۋمەتتىك ماڭىزى بار ازىق-ت ۇلىك تاۋارلارىن ءوندىرۋ كولەمىن ارتتىرۋعا ەرەكشە نازار اۋدارسىن», دەدى ا. مامين.
