كومپانيا تسيفرلى ترانسفورماتسيا اياسىندا پوشتا-لوگيستيكالىق قىزمەت كورسەتۋ سەرۆيسىن جەتىلدىرۋگە ەرەكشە نازار اۋدارىپ كەلەدى. جۇيەلى جۇمىستاردىڭ ناتيجەسىندە «قازپوشتا» اق بيىل «كەدەندىك وكىلدەر» تىزىلىمىنە ەنگىزىلدى. ەندى كومپانيا حالىقارالىق پوشتا جونەلتىلىمدەرى مەن جۇكتەردى كەدەندىك رەسىمدەۋ قىزمەتتەرىن تولىق ۇسىناتىن بولادى. كەدەندىك وكىلدىڭ باستى ارتىقشىلىعى – كەدەندىك رەسىمدەۋ قىزمەتتەرىن ء«بىر تەرەزە» قاعيداتى بويىنشا كورسەتۋ.
– بۇل كومپانيانىڭ پوشتا-لوگيستيكالىق قىزمەت كورسەتۋدىڭ تولىققاندى مودەلىن قۇرۋ جولىنداعى نەگىزگى قادامدارىنىڭ ءبىرى جانە ونىڭ مۋلتيپليكاتيۆتى اسەرى زور بولماق. وسىلايشا, كومپانيا ەل تۇرعىندارىنا كورسەتىلەتىن قىزمەتتەر سپەكترىن كەڭەيتىپ وتىر. جەتكىزۋ مەن ساقتاۋدان باستاپ تاپسىرىستاردى باسقارۋ جانە قوزعالىستى قاداعالاۋعا دەيىن تولىققاندى سەرۆيستىك مودەلدى ۇسىنامىز. بۇل ءۇشىن كومپانيا ماماندارى ارنايى وقىتىلدى, – دەدى «قازپوشتا» اق-نىڭ لوگيستيكالىق سەرۆيس جونىندەگى باسقارۋشى ديرەكتورى اسقار ابدىكارىموۆ.
بەلگىلى بولعانداي, حالىقارالىق پوشتا جونەلتىلىمدەرى مەن جۇكتەردى كەدەندىك رەسىمدەۋ قىزمەتتەرى ازىرشە نۇر-سۇلتان جانە الماتى قالالارىندا قولجەتىمدى بولماق. كەيىن قىزمەت كورسەتۋ اياسىن كەڭەيتىپ, وبلىس ورتالىقتارىنىڭ بارلىعىن قامتۋ جوسپارلانۋدا. سونداي-اق كولىكتىڭ بارلىق ءتۇرىن قامتۋ كوزدەلۋدە.
– ەگەر جەكە تۇلعانىڭ سالەمدەمەسىنىڭ قۇنى 200 ەۋرودان, ال سالماعى 31 كيلودان اساتىن بولسا, وندا ول مىندەتتى تۇردە كەدەندىك رەسىمدەۋدەن ءوتۋى كەرەك. «قازپوشتا» كليەنتتەرىنە وسىنداي قىزمەت ۇسىنىلىپ وتىر. قىزمەت اقىلى, البەتتە. قازىر اتالعان پروتسەستى اۆتوماتتاندىرۋ جۇرگىزىلىپ جاتىر. كليەنتتىڭ قىزمەتكە ونلاين رەجىمدە تاپسىرىس بەرۋ مۇمكىندىگى قاراستىرىلۋدا, – دەپ ناقتىلادى ا.ابدىكارىموۆ.
سونداي-اق كومپانيا قازىر ۋاكىلەتتى ەكونوميكالىق وپەراتور مارتەبەسىن الۋ بويىنشا جۇمىس جۇرگىزۋدە. ول ەۋرازيالىق ەكونوميكالىق وداققا كىرەتىن مەملەكەتتەردىڭ شەكاراسىن كەسىپ ءوتۋ كەزىندە جۇكتەردى رەسىمدەۋدىڭ وڭتايلاندىرىلعان ءتارتىبىن پايدالانۋعا جول اشادى. بۇل ءوز كەزەگىندە حالىقارالىق پوشتا جونەلتىلىمدەرى مەن جۇكتەردى جەتكىزۋدى جەدەلدەتۋگە مۇمكىندىك بەرەدى.
– «قازپوشتانىڭ» 2027 جىلعا دەيىنگى دامۋ ستراتەگياسى اياسىندا كەدەندىك قىزمەتتەردى قامتاماسىز ەتۋ – كەشەندى لوگيستيكالىق قىزمەتتەردى قۇرۋدىڭ ءبىر بولىگى. بۇل رەتتە ارنايى لوگيستيكالىق سەرۆيس فيليالى قۇرىلعانىن اتاپ وتكەن ءجون. ونىڭ مىندەتى – ىشكى جانە سىرتقى نارىقتارعا كەدەندىك-لوگيستيكالىق قىزمەتتەر كورسەتۋ. سونداي-اق تاسىمالداۋ, ۋاقىتشا ساقتاۋ قىزمەتتەرىن ۇسىنۋ. لوگيستيكالىق پروتسەستەردى وڭتايلاندىرىپ ءارى جەدەلدەتىپ, قىزمەتتەردىڭ بارلىق سپەكترىن ۇسىنۋ نەگىزىندە وڭىرلىك ساياساتتى دامىتامىز, – دەيدى ا.ابدىكارىموۆ.
