اقپارات جانە قوعامدىق دامۋ مينيسترلىگىنىڭ قولداۋىمەن «رۋحاني جاڭعىرۋ» قوعامدىق دامۋ ينستيتۋتى ۇيىمداستىرعان «ازاماتتىق الاڭ» جوباسىنىڭ بيىلعى ءبىرىنشى وتىرىسى «جاستاردىڭ باسەكەگە قابىلەتى: قازاقستاننىڭ الەمدىك كوشباسشىلىعىنىڭ نەگىزى» تاقىرىبىنا ارنالدى. بۇگىندە الەمدىك ارەناداعى قازاق جاستارىنىڭ جەتىستىكتەرىنە توقتالعان اقپارات جانە قوعامدىق دامۋ مينيسترلىگى «رۋحاني جاڭعىرۋ» دەپارتامەنتىنىڭ ديرەكتورى نۇرلان كۇنتۋوۆ جاستاردىڭ باسەكەگە قابىلەتتىلىگىن ارتتىرۋدىڭ ماڭىزىن اتاپ ءوتتى.
– بۇگىندە قاي سالادا بولسىن, ەلىمىزدىڭ نامىسىن حالىقارالىق ارەنادا ابىرويمەن قورعاپ جۇرگەن جاستارىمىز جەتەرلىك. بۇل سپورتقا دا, ونەرگە دە, تەحنيكا سالالارىنا دا قاتىستى. ماسەلەن, كەشە عانا وتانداسىمىز, «قازاقستاننىڭ 100 جاڭا ەسىمى» جوباسىنىڭ جەڭىمپازى يمانبەك زەيكەنوۆ ايگىلى Grammy جۇلدەسىن جەڭىپ الدى. دەگەنمەن «جاستارىمىزدىڭ باسەكەگە قابىلەتى قانداي؟», «باسەكەگە قابىلەتتى جاستارىمىزدىڭ بەينەسى قانداي بولۋى كەرەك؟» دەگەن سۇراقتار كوپشىلىكتى تولعاندىراتىنى راس. ءبىز ءبىرىنشى كەزەكتە ەلىن سۇيەتىن پاتريوت ازاماتتار تاربيەلەۋىمىز قاجەت, – دەدى نۇرلان كۇنتۋوۆ.
وتىرىس بارىسىندا «رۋحاني جاڭعىرۋ» قوعامدىق دامۋ ينستيتۋتىنا قاراستى «جاستار» عىلىمي-زەرتتەۋ ورتالىعىنىڭ ديرەكتورى ايان ساكوشەۆ قازاقستان جاستارىنىڭ پورترەتىنە توقتالدى.
– رەسمي دەرەكتەرگە سۇيەنسەك, 2020 جىلى 14 پەن 29 جاس ارالىعىنداعى رەسپۋبليكا جاستارىنىڭ سانى 3,7 ملن ادامدى قۇراعان. بۇل – جالپى حالىق سانىنىڭ 20,4 پايىزى. ولاردىڭ 56,4 پايىزى قالادا تۇرسا, اۋىلدا تۇراتىندارى – 43,6%. تاعى ءبىر ايتا كەتەرلىگى, ءدال وسى جاس ارالىعىنداعى قازاقستاندىقتاردىڭ 92,9 پايىزى ەشبىر پارتياعا مۇشە ەمەس, – دەدى ا.ساكوشەۆ.
بۇگىندە قاي سالادا بولسىن, الەمدىك ارەنادا قازاقستاننىڭ ابىرويىن اسقاقتاتىپ, ەلىمىزدى امبەگە تانىتىپ جۇرگەن جاستارىمىز – ەل ماقتانىشى. ماسەلەن, «قازاقستاننىڭ 100 جاڭا ەسىمى» جوباسىنىڭ جەڭىمپازى, ءانشى الىبەك الماديەۆ «قازاقستان داۋىسى», «حوچۋ ك مەلادزە» سىندى بايقاۋلاردىڭ ءفيناليسى بولعان.
ءوز جوسپارلارىمەن بولىسكەن الىبەك زاماناۋي جاستاردىڭ بەينەسىنە قاتىستى ءوز پىكىرىن ايتىپ ءوتتى.
– ۇزاق ۋاقىت رەسەيلىك «حور تۋرەتسكوگو» ۇجىمىنىڭ قۇرامىندا بولدىم. ساپارلارعا ءجيى شىعاتىنبىز. جالاقىم جاقسى بولدى. قازىرگىدەن 5-6 ەسە ارتىق اقشا تاپتىم. بىراق تابىسىمنان ءلاززات الا المادىم. ويتكەنى وزگە ەلدىڭ مۇددەسىنە قىزمەت ەتىپ جۇرگەنىمدى ىشتەي تۇيسىنەتىنمىن. سودان ەلگە ورالۋ قاجەت دەپ شەشتىم. قازىر تابىسىم ازداۋ بولسا دا, ءوز ەلىم ءۇشىن قىزمەت ەتەمىن. مەنىڭ تۇسىنىگىمدە جاستار وتانسۇيگىش بولۋى كەرەك. قايدا جۇرسەڭ دە, ءبىرىنشى كەزەكتە ءوزىڭنىڭ ەمەس, ءوز ەلىڭنىڭ اتىن اسقاقتاتۋ ءۇشىن ەڭبەك ەتكەنگە ەشتەڭە جەتپەيدى», – دەگەن پىكىرىن ءبىلدىردى ءا.الماديەۆ.
سونداي-اق Forbes Kazakshtan رەيتينگىسىنەن ورىن العان جاس ينجەنەر ماۋلەن بەكتۇرعانوۆ روبوتتەحنيكا سالاسىنداعى قازاقستان جاستارىنىڭ جەتىستىكتەرىنە توقتالىپ, «قازاقستاننىڭ 100 جاڭا ەسىمى» جوباسىنىڭ جەڭىمپازى قانداي بولۋ قاجەتتىگىن ايتىپ بەردى.
– شىنىمدى ايتسام, بۇل جوباعا قاتىسام دەگەن وي اۋەلدەن بولعان. بىراق ءوتىنىشتى مەنىڭ اتىمنان باسقالار جولدادى. مەنىڭ كىشكەنتاي دا بولسا جەتىستىگىمە قىزىعۋشىلىق تانىتىپ, ءىلتيپات تانىتقاندارى ءۇشىن ريزامىن. جوباعا قاتىسقاندار اراسىندا ەلىمىزدىڭ ابىرويىن كۇللى الەمگە اسقاقتاتىپ جۇرگەن زامانداستارىمىز دا بار. مەنىڭشە, «قازاقستاننىڭ 100 جاڭا ەسىمى» جوباسىنىڭ جەڭىمپازى وزىنە عانا ەمەس, ەلىنە پايداسىن تيگىزەر پاتريوت جانە كوشباسشىلىق قابىلەتى زور بولۋى كەرەك, – دەدى ول.
ەستەرىڭىزگە سالا كەتسەك, ماۋلەن كادىمگى قولدىڭ ءپروتوتيپىن جاساپ, مۇمكىندىگى شەكتەۋلى جاندارعا زور مۇمكىندىك بەرگەن بولاتىن. بۇل روبوتقول مي ارقىلى باسقارىلىپ, كادىمگى قولدىڭ قىزمەتىن اتقارا الادى. ەندىگى كەزەكتە جاس ينجەنەر باستاعان كومپانيا روبوتاياق جاساپ شىعارماقشى.
اقپارات جانە قوعامدىق دامۋ مينيسترلىگىنىڭ قولداۋىمەن «رۋحاني جاڭعىرۋ» قازاقستاندىق قوعامدىق دامۋ ينستيتۋتى ۇيىمداستىرعان «ازاماتتىق الاڭ» جوباسىنىڭ وتىرىسىنا قوعام بەلسەندىلەرى, مەملەكەتتىك قىزمەتشىلەر, بلوگەرلەر, جۋرناليستەر, ۇكىمەتتىك ەمەس ۇيىمداردىڭ وكىلدەرى مەن تانىمال تۇلعالار قاتىستى.
