قىزىلوردانىڭ تۋماسى جاننۇر نيازبەكوۆا قازاق ۇلتتىق اگرارلىق ۋنيۆەرسيتەتىندە ۆەتەريناريالىق مەديتسينا ماماندىعى بويىنشا ءبىلىم العان. قازاقستان پرەزيدەنتى ستيپەندياسىنىڭ يەگەرى اتانعان. ماگيستراتۋرادا وقىپ ءجۇرىپ, قازاق ۇلتتىق اگرارلىق ۋنيۆەرسيتەتىندە پروفەسسوردىڭ اسسيستەنتى قىزمەتىن اتقارعان.
2017 جىلى «جىبەك جولى» باعدارلاماسى بويىنشا قىتاي حالىق رەسپۋبليكاسى شەنسي پروۆينتسياسى سيەنيان قالاسىنداعى سولتۇستىك-باتىس اۋىل جانە ورمان شارۋاشىلىعى ۋنيۆەرسيتەتىنە پروفيلاكتيكالىق ۆەتەريناريالىق مەديتسينا ماماندىعى بويىنشا PhD دوكتورانتۋراعا وقۋعا تۇسكەن. جاس عالىم بۇگىندە «ەشكى ءسۇتى قۇرامىنداعى ميكرورگانيزمدەردىڭ پوپۋلياتسياسى جانە ونىڭ ىشەك ميكروفلوراسىنا اسەرى» تاقىرىبىن زەرتتەۋدە.
جاننۇر وقۋمەن قاتار, قوعامدىق ومىردە دە بەلسەندى ەكەن. ول ۇكىمەت باستاعان باعدارلامالارعا قاتىسىپ, تاجىريبە جيناقتاۋعا تىرىساتىنىن ايتتى. «مەن وقىپ جاتقان ۋنيۆەرسيتەت شەنسي پروۆينتسياسىنا قاراستى جەنبا جانە حەيان اۋىلدىق وكرۋگتەرىنە كەدەيلىكپەن كۇرەسۋ جانە اۋىلداردى جانداندىرۋ ماقساتىندا كومەك بەرەدى. ۋنيۆەرسيتەت ستۋدەنتتەرى دە شاراعا اتسالىسىپ, جارتى نە ءبىر جىل بويى سول اۋىلدىڭ دامۋىنا كومەك بەرىپ, جۇمىس ىستەيدى. مەن دە 2020 جىلدىڭ ماۋسىم ايىندا ءوز ماماندىعىم بويىنشا اۋىل شارۋاشىلىعىنىڭ دامۋىنا سەلەكتسيا بويىنشا ۇلەس قوستىم. سونىمەن بىرگە اۋىل وقۋشىلارىنا اعىلشىن ءتىلىن ۇيرەتتىم. اۋىل تۇرعىندارى بۇرىن-سوڭدى شەتەلدىك كورمەگەن, سوندىقتان باسىندا مەنەن ۇيالاتىن. قىتاي ءتىلىن مەڭگەرگەنىمدى, اۋىل شارۋاشىلىعى بويىنشا ءبىلىم العانىمدى ءبىلىپ, وزدەرىن مازالاعان سۇراقتارىن قويدى. مەن اۋىل شارۋاشىلىعى – فەرمەرلەر ءۇشىن كەدەيلىكتەن ارىلۋ جانە باي بولۋ ءۇشىن ماڭىزدى سالا ەكەنىن ايتتىم. ول ءۇشىن اۋرۋدىڭ الدىن الۋ جانە وعان قارسى كۇرەس شارالارىن جۇرگىزۋ كەرەك. ەگەر دە مال ينفەكتسيالىق اۋرۋلارعا شالدىعاتىن بولسا, ول ەكونوميكالىق شىعىنعا اكەلەدى. ال ونى بولدىرماۋ ءۇشىن ەشكى قورالارىن, ازىق قويمالارىن تازا جانە قۇرعاق ۇستاۋ, ۇنەمى تازالاپ وتىرۋ, ەكولوگيالىق-سانيتارلىق مەنەدجمەنتتى رەتتەۋ كەرەك», دەيدى جاننۇر.
وتانداسىمىز دەزينفەكتسيا جاساۋ مەن ءارتۇرلى دەزينفەكتسيالاۋ قۇرالدارىن قولدانۋدى دا ۇيرەتىپتى. «مەن قاتىسقان كەدەيلىكتى جويۋدى ماقسات ەتكەن باعدارلاما تۋرالى كوپتەگەن بۇقارالىق اقپارات قۇرالى, سونىڭ ىشىندە سينحۋا اگەنتتىگى جازدى. ءتىپتى مەنىڭ جۇمىسىم اگەنتتىك سايتىنىڭ ءبىرىنشى بەتىنەن ورىن الدى. سينحۋا اقپاراتتىق اگەنتتىگىنىڭ VLOG-ىن ەل بويىنشا 69 بۇقارالىق اقپارات قۇرالى قايتا باسىپ شىعاردى جانە ۆيدەو 1,5 ميلليوننان استام قارالىم جينادى», دەيدى وتانداسىمىز.
جاننۇردىڭ ايتۋىنشا, ۋنيۆەرسيتەت پرەزيدەنتى ستيپەندياسىن الۋعا سول جاقتاعى مۇعالىمى سەبەپشى بولىپتى. تالاپتى شاكىرتىن لايىقتى دەپ ساناپ, ءوزى ۇسىنعان. «2020 جىلدىڭ قازان ايىندا 2020-2021 وقۋ جىلىنا ارنالعان پرەزيدەنتتىك ستيپەندياعا ءوتىنىش بەرۋ باستالعانىن بىلگەندە چەن ەسىمدى مۇعالىم مەنى ۇسىنعان بولاتىن. تالاپتار بويىنشا وقۋ ۇلگەرىمى, ياعني GPA 75 بالدان جوعارى بولۋ كەرەك, مەنىڭ GPA كورسەتكىشىم 95 بالل بولدى. تاعى ءبىر تالاپ – يمفاكت-فاكتورى جوعارى عىلىمي جۋرنالداردا ءبىرىنشى اۆتور بولىپ ماقالا جاريالاۋ. جاقىندا عانا شۆەيتساريالىق IF 2.323 «Animals» جۋرنالىندا ماقالام جاريالانعان بولاتىن. قىتاي ءتىلىن ءبىلۋ دەڭگەيىن انىقتايتىن HSK تەستى بار. سول ەمتيحاندا قاجەت دەڭگەيدى دالەلدەۋىڭ كەرەك. ۇمىتكەر ۋنيۆەرسيتەتىشىلىك جانە دە باسقا ءىس-شاراعا, حالىقارالىق كونفەرەنتسيالارعا قاتىسۋى كەرەك. مەنىڭ كانديداتۋرام بارلىق تالاپتارعا ساي كەلدى. ۋنيۆەرسيتەت بويىنشا 13 شەتەلدىك ستۋدەنت تاپسىرىپ, ەكەۋىمىز جەلتوقساندا پرەزيدەنتتىك ستيپەنديا يەگەرى اتاندىق», دەيدى جاس عالىم.
«2020 جىلدىڭ جەلتوقسان ايىندا ەل ىشىندە بەدەلدى سانالاتىن «ەڭ ۇزدىك ستۋدەنت» جۇلدەسىنە دە ءوتىنىش قابىلداۋ بولىپ جاتقانىن ەستىپ, ءبىزدىڭ ۋنيۆەرسيتەتتەن باسشىلىق جەتى ستۋدەنتتى ۇسىنعان بولاتىن. جوعارىدا تىزىلگەن تالاپتارعا قوسا, ءبىلىم بولىمىنە قىزىق ءارى ماعىنالى ءبىر ماقالا جازۋ كەرەك. «وسى جۇلدەنى ۇتتىڭ» دەگەن حات كەلگەندە ەرىكسىز جىلاپ جىبەردىم. بۇل جۇلدەنى الۋ شەتەلدىك ستۋدەنت تۇرماق, قىتاي ازاماتتارىنىڭ كوبىنىڭ قولىنان كەلمەيدى. وقۋعا تۇسكەن جىلى پاكىستاندىق ستۋدەنتتىڭ وسى جۇلدەنى الىپ جاتقانىن كورىپ, ونى بۇرىن-سوڭدى قازاقستاندىق ستۋدەنت الماعانىن ەستىپ, ەكى جىلدان كەيىن مەن دە وسى جۇلدەنى الامىن, قازاقستاندىق ستۋدەنت «ەڭ ۇزدىك ستۋدەنت» بولادى دەپ ىشتەي ۋادە بەرگەنمىن. بۇل مەنىڭ عانا ەمەس, بار قازاقتىڭ جەڭىسى دەپ بىلەمىن», دەيدى قۋانىشىمەن بولىسكەن جاننۇر.
قىتايدا ءبىلىم الىپ جۇرگەن قازاقستاندىقتار وتانداستارىنىڭ جەڭىسىنە بىرگە قۋانىپتى. جاننۇر ءبىر جىلدان سوڭ وقۋىن ءتامامدايدى. ۇزدىك ستۋدەنتتىڭ ەلگە ورالىپ, شەتەلدە جيناعان تاجىريبەسى مەن ءبىلىمىن ەل دامۋىنا جۇمساسام دەگەن تىلەگى بار.
