جاقىندا Kazakh Tourism ۇلتتىق كومپانياسى مەن Mental HR Consultancy تۇرىك كومپانياسى سالانىڭ كاسىبي ماماندارىن دايارلاۋ جانە ەڭبەك رەسۋرستارىنىڭ باسەكەگە قابىلەتتىلىگىن ارتتىرۋ ماسەلەلەرى بويىنشا ىنتىماقتاستىق تۋرالى مەموراندۋمعا قول قويدى.
«وزدەرىڭىز بىلەتىندەي, نارىقتا بىلىكتى كادرلار تاپشىلىعى ورىن السا, اسىرەسە كاسىبي دايىندالعان جەلىلىك قىزمەتكەرلەر بولماعان كەزدە, ءتۋريزمدى ساپالى دامىتۋ مۇمكىن ەمەس», دەپ حابارلايدى ۇلتتىق كومپانيانىڭ باسقارما توراعاسى ەرجان ەركينباەۆ.
ءتۋريزمدى قارقىندى دامىتۋ ءۇشىن ەكى نەگىزگى قۇرامداس بولىك بار: ەلدىڭ گەوگرافيالىق ەرەكشەلىكتەرىن ەسكەرە وتىرىپ, ءبىرىنشىسى – بۇل ينفراقۇرىلىم مەن كوممۋنيكاتسيالار. 2019 جىلى قابىلدانعان تۋريستىك سالانى دامىتۋعا ارنالعان مەملەكەتتىك باعدارلاما اياسىندا بۇگىنگە دەيىن جالپى سوماسى 61,1 ملرد تەڭگە قۇرايتىن 55 جوبا ىسكە اسىرىلدى. ەكىنشىسى – سالانىڭ قۇزىرەتى. مەملەكەت تاراپىنان مادەنيەت جانە سپورت مينيسترلىگى كادرلىق الەۋەتتى دامىتۋ ماسەلەلەرىنە ۇلكەن كوڭىل ءبولىپ كەلەدى. ماماندار دايارلايتىن العاشقى بەيىندىك حالىقارالىق تۋريزم جانە قوناقجايلىق ۋنيۆەرسيتەتى اشىلعانى بەلگىلى.
«وتكەن جىلى academy.tourismonline.kz پلاتفورماسى ءوزىن جاقسى دالەلدەگەنىن اتاپ وتكىم كەلەدى, مۇندا اركىم ساپالى تەوريالىق دايىندىقتى الا الادى. بيىل ءبىز كاسىبي سپيكەرلەردى كوپتەپ تارتا وتىرىپ, جاڭا وقىتۋ مودۋلدەرىن جاساۋدى جالعاستىرامىز. سونداي-اق وسى جىلى ءبىز ءوڭىردىڭ وقۋ ورىندارىنىڭ بازاسىندا ماڭعىستاۋ تۋريزم سالاسى ءۇشىن جەرگىلىكتى تۇرعىندار قاتارىنان جەلىلىك 1500 ادامدى وقىتۋ بويىنشا سىنامالى جوبانى ىسكە اسىرۋدى جوسپارلاپ وتىرمىز», دەپ قورىتىندىلادى ءسوزىن ەرجان ەركىنباەۆ.
Mental HR Consultancy تۇرىك كومپانياسى بيزنەس سۋبەكتىلەرى مەن قازاقستان رەسپۋبليكاسىنىڭ مەملەكەتتىك ورگاندارىنىڭ جەلىلىك جانە باسقارۋ قىزمەتكەرلەرىن وقىتۋ ماسەلەلەرىنەن باسقا, ينۆەستيتسيالار تارتۋ جانە تۋريستىك سەكتوردى تسيفرلاندىرۋ سياقتى باعىتتار بويىنشا ىقپال ەتەدى.
