قازاقستان بوكس فەدەراتسياسىنىڭ مەنەدجەرى مەيرام نۇرتازين جارىستاردى وتكىزۋ ماسەلەلەرى جونىندەگى كوميسسيا قۇرامىنا كىردى, ال سيدنەي وليمپياداسىنىڭ چەمپيونى, وليمپيادالىق دايىندىق ورتالىعىنىڭ ديرەكتورى ەرماحان ىبرايموۆ چەمپيوندار مەن ارداگارلەر كوميسسياسىنىڭ مۇشەسى بولدى.
جاڭا تاعايىندالعان قازاقستاندىقتارعا حاتتى AIBA پرەزيدەنتى ۋمار كرەملەۆ جولدادى. ول ءوز جولداۋىندا قازاقستاندىقتاردىڭ بىلىگى مەن تاجىريبەسى ۇيىمدى دامىتۋعا قوسقان ەلەۋلى ۇلەس بولاتىنىن ايتتى. سونداي-اق ول ۇيىمنىڭ جاڭا مۇشەلەرىمەن ەرتەرەك تانىسىپ, جۇمىستى باستاۋدى كۇتىپ وتىرعانىن ايتقان.
قازاقستاندىقتاردىڭ جاڭا قىزمەتكە تاعايىندالۋىنا وراي ازيالىق بوكس كونفەدەراتسياسى دا قۇتتىقتاۋ جولدادى.
بۇل 2018-2019 جىلعى ۇزىلىستەردەن كەيىن AIBA-نىڭ باسقارۋشى ورگاندارىنا تاعايىندالىپ وتىرعان العاشقى قازاقستاندىقتار. 2014-2017 جىلدار ارالىعىندا اتالعان ۇيىمدا قازاقستاننىڭ 6 ازاماتى جۇمىس ىستەگەن. 2019 جىلى ۇيىمدا جۇرگىزىلگەن رەفورمالاردان كەيىن كوميسسيالاردىڭ بارلىعى تاراتىلىپ, قازىر قايتا جاساقتالىپ جاتىر.
