م.ايقىمباەۆ اتىنداعى اسا قاۋىپتى ينفەكتسيالار ۇلتتىق عىلىمي ورتالىعىنىڭ Facebook-تەگى پاراقشاسىندا وسىنداي اقپارات جاريالاندى.
«سەرىكتەستەرىمىزگە, قازاق ۇلتتىق اگرارلىق زەرتتەۋ ۋنيۆەرسيتەتىنىڭ ۇجىمىنا جانە رەكتورىنا, ۇلتتىق عىلىم اكادەمياسىنىڭ اكادەميگى, پروفەسسور ەسپولوۆ تىلەكتەس يساباي ۇلىنا COVID-19 پاندەمياسىمەن كۇرەسكە باعىتتالعان عىلىمي زەرتتەۋلەردى تولىق قولداعانى ءۇشىن العىس بىلدىرەمىز. وسى ۋاقىتقا دەيىن قازۇاۋ حالىقارالىق ۆاكتسينولوگيا ورتالىعىنىڭ ديرەكتورى تابىنوۆ قايساردىڭ جەتەكشىلىگىمەن بىرىككەن زەرتتەۋ توبى ورتالىق رەفەرەنتتىك زەرتحانا بازاسىندا 2020 جىلدىڭ ماۋسىم جانە جەلتوقسان ايلارىندا SARS-CoV-2 ۆيرۋسىنىڭ 12-گە جۋىق شتامىن ءبولىپ شىعاردى. جاقىندا عانا بىرلەسكەن زەرتتەۋ توبىنىڭ جەدەل جانە ۇيلەسىمدى جۇمىسىنىڭ ارقاسىندا قازاقستان اۋماعىندا تىركەلگەن بريتاندىق جانە وڭتۇستىك افريكالىق شتامدارعا ءتان SARS-CoV-2 ۆيرۋسىنىڭ مۋتاتسيالارى سالىستىرمالى تۇردە قىسقا مەرزىمدە راستالدى. قازىرگى ۋاقىتتا اتالعان ۆيرۋستاردى ءبولۋ بويىنشا جۇمىستار جۇرگىزىلۋدە. بۇل ۆيرۋستاردىڭ بولۋى ءبىزدىڭ عالىمدارىمىزعا COVID-19-عا قارسى وتاندىق, سونداي-اق شەتەلدىك ۆاكتسينالىق جانە دارىلىك پرەپاراتتاردىڭ تيىمدىلىگىن باعالاۋعا مۇمكىندىك بەرەدى», جازىلعان الەۋمەتتىك جەلىدە جاريالانعان مالىمەتتە.
ورتالىق ماماندارى اتالعان شتامداردىڭ بار ەكەنىن دەر كەزىندە انىقتاۋ مۋتاتسيالاردىڭ كوپتەپ تارالۋىنا جول بەرمەۋ ءۇشىن وتە ماڭىزدى ەكەنىن ايتادى.
«بۇگىنگى تاڭدا ەكى ۆاكتسينا الىندى.ولار – نانوەمۋلسيالىق ماي اديۋۆانتىنا نەگىزدەلگەن سۋبۋنيتتىك ۆاكتسينا جانە نانوبولشەكتەرگە نەگىزدەلگەن ۆاكتسينا. دۇنيەجۇزىلىك دەنساۋلىق ساقتاۋ ۇيىمى ولاردى Naruvax-C19 جانە NARUVAX-C19/Nano دەگەن اتاۋمەن «كانديدات ۆاكتسينالاردىڭ» تىزىلىمىنە ەنگىزدى. قازىرگى تاڭدا بۇل ەكپەلەر ءبىزدىڭ عىلىمي ورتالىقتا جانۋارلارعا سىنالىپ جاتىر. ياعني, كلينيكاعا دەيىنگى SPF-زەرتتەۋلەرىنىڭ سوڭعى كەزەڭىنەن وتۋدە», دەلىنگەن ورتالىقتىڭ رەسمي اقپاراتىندا.
