كاسىپكەرلىك سۋبەكتىلەرىنىڭ كارانتيندى بۇزۋىنا جول بەرمەۋ جونىندەگى ءموبيلدى توپتار كۇشەيتىلگەن رەجيمدە جۇمىس ىستەپ جاتىر. وسىعان قاراماستان كەيبىر مەكەمەلەر باس سانيتارلىق دارىگەردىڭ قاۋلىسىندا جازىلعان تالاپتاردى ەلەمەي وتىر. وتكەن تۇندە, ياعني 26 ناۋرىزدان 27-سىنە قاراعان ءتۇنى ءموبيلدى توپتار قالانىڭ ءتورت اۋدانىندا كارانتين رەجيمىن بۇزعان 10-عا جۋىق مەكەمەنى انىقتادى. ولاردىڭ قاتارىندا سارىارقا اۋدانىنداعى «نيرۆانا» تۇنگى كلۋبى ساعات 23.00-دەن كەيىن دە جۇمىس ىستەدى. ال باس سانيتارلىق دارىگەردىڭ قاۋلىسىندا 22.00-گە دەيىن جۇمىس ىستەۋىنە رۇقسات ەتىلگەن. وسىعان ۇقساس زاڭبۇزۋشىلىققا «Asiatiq» مەيرامحاناسى دا جول بەردى, ال «Adagio» كاراوكە-بارى جۇمىس ىستەۋىنە تىيىم سالىنعانىنا قاراماستان كەلۋشىلەرگە قىزمەت كورسەتكەن. ەكى مەكەمە دە ەسىل اۋدانىندا ورنالاسقان. الماتى اۋدانىندا ورنالاسقان ءتورت بىردەي قوعامدىق تاماقتانۋ نىسانى بەلگىلەنگەن جۇمىس رەجيمىن بۇزدى. ماسەلەن, «پوناەحالي», «دو ۋترا» بارلارى, «زينا» مەيرامحاناسى, «شاح» كافەسى بار. بايقوڭىر اۋدانىندا ورنالاسقان «شاشلىكوفف» ءدامحاناسى مەن «رىبا موەي مەچتى» كاراوكە زالى دا كارانتين رەجيمىن بۇزدى. ءتارتىپ بۇزۋشىلارعا قاتىستى اكىمشىلىك شارالار قابىلداۋ جانە ولاردى جاۋاپقا تارتۋ ءۇشىن ماتەريالدار سانيتارلىق-ەپيدەميولوگيالىق باقىلاۋ باسقارمالارىنا جىبەرىلدى. ايتا كەتەيىك, ەپيدەميولوگيالىق احۋالدىڭ تۇراقسىزدىعىنا جانە ەلوردانىڭ «قىزىل» ايماقتا بولۋىنا بايلانىستى 10 ناۋرىزدان باستاپ نۇر-سۇلتاندا كارانتين تالاپتارى كۇشەيتىلگەن بولاتىن. قالا تۇرعىندارى مەن قوناقتارىنا, سونداي-اق كاسىپكەرلىك سۋبەكتىلەرىنە سانيتارلىق نورمالار مەن كارانتين رەجيمىنىڭ تالاپتارىن قاتاڭ ساقتاۋ تالاپ ەتىلەدى.
