كەزەكتى ونلاين-كەڭەستە الماتى قالاسى اكىمىنىڭ ورىنباسارى ەرجان باباقۇماروۆ مونيتورينگتىك توپتاردىڭ جۇمىسىن كۇشەيتۋدى تاپسىردى. جۇقتىرۋ جاعدايلارىنىڭ 42%-ى قوعامدىق ورىندارعا تيەسىلى –بۇل ساۋدا, قوعامدىق تاماقتانۋ نىساندارى جانە ت.ب. تەكسەرىلەتىن قوعامدىق ورىنداردى قامتۋدى ارتتىرۋ ماقساتىندا مونيتورينگتىك توپتاردىڭ سانى 40-قا دەيىن ۇلعايتىلدى.
الماتى قالاسىنىڭ سانيتارلىق-ەپيدەميولوگيالىق باقىلاۋ دەپارتامەنتى ۇسىنعان ماتەريالدارعا سايكەس, مۋتاتسيالانعان بريتاندىق جانە وڭتۇستىك افريكالىق شتامدار الدىڭعى بازالىق شتاممەن سالىستىرعاندا ينفەكتسيانىڭ جۇعۋ كورسەتكىشى اناعۇرلىم جوعارى.
27 ناۋرىز كۇنگى جاعداي بويىنشا, 21-26 ناۋرىز ارالىعىندا 98 تەكسەرۋ جۇرگىزىلدى, 1911 نىسان قامتىلدى, ونىڭ 300-ىندە بەلگىلەنگەن جۇمىس رەجيمىنىڭ بۇزىلۋى, ەپيدەمياعا قارسى تالاپتار ساقتالماۋى انىقتالدى. سونىمەن قاتار, 26-27 ناۋرىز ارالىعىندا تۇنگى تەكسەرۋ بارىسىندا 17 بۇزۋشىلىق انىقتالدى. مىسالى, 300 كاسىپكەرلىك سۋبەكتىسىنە 230 اەك كولەمىندە ايىپپۇل سالىنادى.
ءبىر اپتا ىشىندە بەتپەردە رەجيمىن بۇزعانى ءۇشىن قر اقبتك-ءنىڭ 425-بابىنا سايكەس 693 جەكە تۇلعا جاۋاپكەرشىلىككە تارتىلدى.
مونيتورينگتىك توپتار انىقتاپ, جولىن كەسكەن شارالار اراسىندا ۇيلەنۋ تويلارى, وتباسىلىق جانە ادامدار كوپ جينالاتىن وزگە دە مەرەكەلىك ءىس-شارالار بار. مىسالى, اۋەزوۆ اۋدانىندا 26 ناۋرىز كۇنى ساعات 20.00-دە اقساي 4, 15ا مەكەن-جايىنداعى «دوستار سارايى» مەيرامحاناسىندا «قىز ۇزاتۋ» شاراسى توقتاتىلدى. ءتيىستى شارالار قابىلداندى.
ەرجان باباقۇماروۆ سانيتارلىق-ەپيدەميولوگيالىق رەجيمدى بۇزۋ سالدارىنان جۇقتىرۋ جاعدايلارىنىڭ ءوسۋى جالعاسىپ جاتقان اۋدانداردا مونيتورينگتىك توپتاردىڭ جۇمىسىن كۇشەيتۋدى تاپسىردى.
الماتى ەپيدەميالىق جاعداي بويىنشا ءالى دە «قىزىل» ايماقتا تۇر. وتكەن تاۋلىكتە قالادا كوروناۆيرۋستىق ينفەكتسياعا وڭ پتر ناتيجەسى بار 450 ناۋقاس انىقتالدى. بۇرىنعىشا 65 جاستان اسقان جانە سوزىلمالى اۋرۋلارمەن اۋىراتىن ادامدار تاۋەكەل توبىنا جاتادى-ولارعا مۇمكىندىگىنشە ۇيلەرىنەن شىقپاۋعا كەڭەس بەرىلەدى. سونىمەن قاتار, 20-29 جاس ارالىعىنداعى ادامدار اراسىندا ينفەكتسيانىڭ ءوسۋى بايقالدى. تالداۋ كورسەتكەندەي, قوعامدىق مەكەمەلەردەن باسقا, جەكە سەكتوردا ادامداردىڭ توپتاسۋ جاعدايلارىنىڭ كوبەيگەنى بايقالادى - وتباسىلىق ءىس-شارالاردان, ۇيلەنۋ تويلارىنان, ەسكە الۋلاردان جانە ۇيدەگى تويلاردان جۇقتىرۋ جاعدايلارىنىڭ تىركەلۋى جالعاسۋدا.
الماتى اكىمدىگى قالا تۇرعىندارى مەن قوناقتارىن جاۋاپكەرشىلىك تانىتىپ, ادامدار كوپ جينالاتىن ورىندارعا بارماۋعا, بۇقارالىق ءىس-شارالاردى ۇيىمداستىرماۋعا جانە قاتىسپاۋعا شاقىرادى. كەم دەگەندە 1,5-2 مەتر الەۋمەتتىك قاشىقتىقتى ساقتاۋ جانە بەتپەردە كيۋ ماڭىزدى. ەسكە سالساق, كارانتيندىك شارالاردى بۇزعانى ءۇشىن اكىمشىلىك جاۋاپكەرشىلىك قاراستىرىلعان.
