فوتو اۆتورى: ماكسيم زولوتۋحين
«بۇگىن الماتىدا دەنساۋلىق ساقتاۋ ءمينيسترى الەكسەي تسوي, ۆيتسە-مينيستر اجار عينيات پەن سانيتارلىق-ەپيدەميولوگيالىق باقىلاۋ كوميتەتىنىڭ ءتورايىمى ايجان ەسماعامبەتوۆا باستاعان رەسپۋبليكالىق كوميسسيا مۇشەلەرىنىڭ قاتىسۋىمەن كوروناۆيرۋس ينفەكتسياسىنىڭ تارالۋىنا جول بەرمەۋ جونىندەگى قالالىق كوميسسيانىڭ شۇعىل كەڭەيتىلگەن وتىرىسى ءوتتى.
جيىندا بيىلعى ەپيدەميالىق جاعدايعا بايلانىستى ماسەلەلەر تالقىلاندى. قالا ستاتسيونارلارى مەن ەمحانالارىنداعى پاتسيەنتتەر مەن پەرسونال اعىنىنىڭ قوزعالىسىن ساقتاۋ, حالىققا مەديتسينالىق كومەك كورسەتۋ, ينفەكتسيالىق باقىلاۋ تالابىنىڭ ساقتالۋى تۇرعىسىنان بىرقاتار مەديتسينالىق ۇيىمداردىڭ جۇمىسى تەكسەرىلدى. سونداي-اق, قالانىڭ سانيتارلىق-ەپيدەميولوگيالىق قىزمەتىنىڭ قاتىسۋىمەن جەدەل شتاب وتكىزىلدى.
جالپى رەسپۋبليكالىق كوميسسيا مۇشەلەرى قالادا ەپيدەمياعا قارسى قابىلدانعان شارالاردى ماقۇلدادى. الماتىدا جۇزەگە اسىرىلعان جۇمىس الگوريتمىن, بۇرىن بەكىتىلگەن ايماقتارعا ءبولۋ جوسپارلارىن ىسكە اسىرۋدى جانە ينفەكتسيالىق قاۋىپسىزدىكتى ساقتاۋدى, سونداي-اق ۇيدەگى ستاتسيونارلارداعى ادامدارعا مەديتسينالىق باقىلاۋ جۇرگىزۋ ءۇشىن تەلەمەديتسينا ورتالىعىن پايدالانۋ قاجەتتىگىن ەسكەرە وتىرىپ, سوماتيكالىق مەديتسينالىق ۇيىمداردى كوۆيدتىك باعدارعا اۋىستىرۋ سحەماسىن قولدادى. سونىمەن قاتار, الداعى ۋاقىتتا اتقارىلار جۇمىستار بويىنشا بىرقاتار تاپسىرمالار بەرىلدى.
بۇگىندە الماتى قىزىل ايماقتا تۇر. بيىل مەگاپوليستە كۆي-ءدى جۇقتىرعان 12 800 ادام تىركەلدى. مۋتاتسياعا تۇسكەن شتامنىڭ بارىن ەسكەرە وتىرىپ, ىندەتتى جۇقتىرۋدىڭ جوعارعى دەڭگەيى ساقتالۋدا.
وزگەرىستەر بايقالعان ايماقتاردى گەنومدىق رەتكە كەلتىرۋ ناتيجەلەرى بەلگىلى بولدى - بريتاندىق جانە وڭتۇستىكافريكالىق كوروناۆيرۋس شتامدارىنا ءتان مۋتاتسيالار انىقتالدى.
جاڭا شتامداردىڭ كونتاگيوزى جوعارى. الدىڭعى بازالىق شتاممەن سالىستىرعاندا جاڭا شتاممداردىڭ جۇقتىرۋ كورسەتكىشى 70%-عا دەيىن جوعارى. ياعني, بۇل ينفەكتسيا وتە جۇقپالى. مىنە, وسى جاعداي مەگاپوليستە انىقتالعان ينفەكتسيالاردىڭ ورشۋىنە اكەلدى.
قالادا قالىپتاسقان ەپيدەميولوگيالىق جاعدايدى ەسكەرسەك, ءبىز قالا تۇرعىندارىنىڭ نازارىن وسى جاعدايعا ەرەكشە اۋدارعىمىز كەلەدى.
قۇرمەتتى الماتىلىقتار جانە قالا قوناقتارى. بۇگىندە ءوزىڭىزدى كۆي-دەن قورعاۋدىڭ جالعىز جولى – ۆاكتسيناتسيا. ءساۋىر ايىندا ءبىز ۆاكتسينالاردىڭ جاڭا دوزالارىن كۇتىپ وتىرمىز. سونىمەن قاتار, الماتىدا ەكى ميلليون تۇرعىننىڭ بار ەكەنىن, سونداي-اق كوشى-قوننىڭ جوعارى دەڭگەيىن ەسكەرە وتىرىپ, قازىر جاڭا شتاممدار اينالىمى اياسىندا بارلىقتارىڭىزدى دا كوۆيدكە قارسى شارالاردى كۇشەيتۋگە شاقىرامىن. بەتپەردە رەجيمى مەن الەۋمەتتىك قاشىقتى ساقتاپ, قوعامدىق ورىندارعا بارماۋعا, ادام كوپ جينالاتىن جەردەن اۋلاق بولۋعا شاقىرامىن», دەلىنگەن حابارلامادا.
