ايماقتار • 26 ناۋرىز، 2021

بقو-دا 4371 ادام كوروناۆيرۋسقا قارسى ەگىلدى

سوڭعى اپتادا باتىس قازاقستان وبلىسىندا كوروناۆيرۋسقا شالدىققاندار سانى شامامەن 21%-عا ءوستى. 4370-تەن استام باتىسقازاقستاندىق ينفەكتسياعا قارسى ەگىلدى، دەپ حابارلايدى Egemen.kz وبلىس اكىمىنىڭ ءباسپاسوز قىزمەتىنە سىلتەمە جاساپ.

Marzhan Tileubekova

بقو دەنساۋلىق ساقتاۋ باسقارماسى باسشىسىنىڭ ورىنباسارى گۇلنار ابدراحمانوۆا حابارلاعانداي، وبلىستا كوروناۆيرۋستىق ينفەكتسيادان 230 ادام قايتىس بولعان.

- ناۋقاستار اۋرۋدىڭ اۋىر جانە وتە اۋىر تۇرىمەن اۋىرادى. اسىرەسە، ارتەريالىق گيپەرتەنزياسى، قانت ديابەتى، جۇرەكتىڭ يشەميالىق اۋرۋى بار ەگدە جانە كارىلىك جاستاعى ادامداردا اۋرۋ وتكىر. ءبىز باتىسقازاقستاندىقتارعا بارلىق سانيتارلىق نورمالار مەن بەتپەردە رەجيمىن ساقتاۋعا جانە جرۆي العاشقى بەلگىلەرى كەزىندە مەديتسينالىق كومەككە جۇگىنۋگە كەڭەس بەرەمىز، - دەدى گۇلنار ابدراحمانوۆا.

ول 1 اقپاننان باستاپ بقو-دا COVID-19-عا قارسى ۆاكتسينالاۋ باستالعانىن ەسكە سالدى. بۇگىنگى تاڭدا مەديتسينا قىزمەتكەرلەرىن «سپۋتنيك-V» ۆاكتسيناسىنىڭ ءبىرىنشى كومپونەنتىمەن ۆاكتسينالاۋ اياقتالدى.

- 19 ناۋرىزدا ءبىز وسى ۆاكتسينانى تاعى 1000 دوزادا ء(ى كومپونەنت) الدىق، قازىرگى ۋاقىتتا ۆاكتسينالاۋ كەستە بويىنشا جالعاسۋدا. جالپى مالىمەتتەر بويىنشا، بقو - دا 4371 ادام ەكپە الدى، ونىڭ 786-سى-پەداگوگتار، 199-ى-كۇش قۇرىلىمدارىنىڭ قىزمەتكەرلەرى، - دەپ ءتۇسىندىردى وبلىستىق دەنساۋلىق ساقتاۋ باسقارماسى باسشىسىنىڭ ورىنباسارى.

بقو سانيتارلىق-ەپيدەميالىق باقىلاۋ دەپارتامەنتى باسشىسىنىڭ ورىنباسارى نۇرلىبەك مۇستاەۆتىڭ ايتۋىنشا، وقۋشىلار اراسىندا جۇقتىرۋ وقيعالارى دا بار. تەك 3 توقساندا وسىنداي 393 فاكتى تىركەلدى، ال 11-25 ناۋرىز ارالىعىندا ورال قالاسىنىڭ 8 مەكتەبىندە 15 سىنىپتى جانە تاسقالا اۋدانىندا ءبىر سىنىپتى كارانتينگە جابۋعا تۋرا كەلدى.

- مەرەكە كۇندەرى مونيتورينگتىك توپتار كافەدە وتباسىلىق مەرەكەلەر وتكىزۋ جاعدايلارىن انىقتادى، قازىر اكىمشىلىك قۇقىق بۇزۋشىلىقتار قاراستىرىلۋدا. بۇعان دەيىن سوت شەشىمى بويىنشا بۇقارالىق ءىس-شارالاردى بىرنەشە رەت وتكىزگەنى ءۇشىن بىرنەشە ويىن-ساۋىق مەكەمەلەرىنىڭ قىزمەتى ەكى ايعا توقتاتىلدى. ناۋرىز ايىنىڭ باسىنان باستاپ بۇزۋشىلىقتارمەن ءۇش نىسان انىقتالدى، 787590 تەڭگە سوماسىنا 18 حاتتاما قارالدى، - دەپ اتاپ ءوتتى نۇرلىبەك مۇستاەۆ.

كۇننىڭ ماڭىزدى جانە وزەكتى جاڭالىقتارىن «ەگەمەن قازاقستان» تەلەگرام كانالىنان وقىڭىز