قوعام • 26 ناۋرىز، 2021

جۋرناليستەرگە دورەكى مىنەز تانىتقان مەمقىزمەتكەر ەسكەرتۋ الدى

179 رەت كورسەتىلدى

«حابار 24» تەلەارناسىنىڭ تىلشىلەرىنە دورەكى مىنەز تانىتقان شەنەۋنىك ەسكەرتۋ الدى، دەپ حابارلايدى Egemen.kz ارنانىڭ سايتىنا سىلتەمە جاساپ.

بۇعان دەيىن اتالعان تەلەارنادان جامبىل وبلىسىنداعى جۇكتەمەسى كوپ جۇك كولىكتەرى تۋرالى سيۋجەت كورسەتىلگەن ەدى. بىراق وبلىستىق كولىكتىك باقىلاۋ ينسپەكتسياسى جەتەكشىسىنىڭ ورىنباسارى تەمىرلان مۇقىشەۆ سۇحبات بەرۋدەن باس تارتقان بولاتىن. كەيىنىرەك بۇل ماسەلەمەن مەملەكەتتىك قىزمەت ىستەرى جونىندەگى اگەنتتىكتىڭ وبلىستىق دەپارتامەنتى اينالىسىپ، قىزمەتتىك تەكسەرىس جۇرگىزدى. ەتيكا جونىندەگى وتىرىستا تەمىرلان مۇقىشەۆ ەم الىپ جاتقانىن ايتىپ، جۋرناليستەردىڭ سۇراقتارىنا جاۋاپ بەرۋگە دايىن ەمەس ەكەنىن جەتكىزگەن-ءدى. بىراق كەڭەس مۇشەلەرى بۇل جاۋاپتى قابىلدامادى.

«سۇحبات بەرمەيمىن، بەرگىم كەلمەدى. تۇسىرمەڭدەر. ساعات ۇشتە ۇلتتىق بيۋرودا جيىن وتەدى، سوندا ءبارى ايتىلادى. سوندا كەلىڭىزدەر»، دەگەن ەدى وبلىستىق كولىكتىك باقىلاۋ ينسپەكتسياسى جەتەكشىسىنىڭ ورىنباسارى تەمىرلان مۇقىشەۆ.

بۇدان سوڭ، قر مقىا وبلىستىق دەپارتامەنتى باسقارماسىنىڭ جەتەكشىسى رۋسلان ءشارىپوۆ قىزمەتتىك تەكسەرۋ جونىندەگى تەكسەرۋ ناتيجەلەرى ادەپ جونىندەگى وتىرىسىندا قارالىپ، قورىتىندىسى بويىنشا وعان ەسكەرتۋ تۇرىندەگى تارتىپتىك جازا قولدانۋ تۋرالى ۇسىنىس ەنگىزىلگەنىن ايتتى.

«بۇل جاعدايدا تەمىرلان مۇقىشەۆ قازاقستان رەسپۋبليكاسى مەملەكەتتىك قىزمەتشىلەردىڭ ادەپ كودەكسىنىڭ تالاپتارىن ساقتاماعان. ياعني، جالپى قابىلدانعان مورالدىق نورمالاردى بۇزعان، سونىمەن قاتار ازاماتپەن قارىم-قاتىناستا ادەپتىك تانىتپاعان»، دەدى رۋسلان ءشارىپوۆ.

ايتا كەتەيىك تەمىرلان مۇقىشەۆ 2019 جىلى دا اۋىر جانە ءىرى كولەمدەگى كولىك قۇرالدارىنىڭ جۇرۋىنە ارنايى رۇقسات بەرگەنى ءۇشىن قىزمەتىنە تولىق سايكەس ەمەستىگى تۋرالى ەسكەرتۋ العان.

سوڭعى جاڭالىقتار

پاگانيني

ونەر • كەشە

وتىز جىلدىققا وي قورىتقان

قازاقستان • كەشە

ۇقساس جاڭالىقتار