بريفينگ كەزىندە بىرقاتار ساۋالدار ۆاكتسيناتسياعا قاتىستى بولدى. تەك وسى ناۋرىز ايىندا الماتىعا الدىمەن 10800, ارتىنشا 16200 دوزا ۆاكتسينا جەتكىزىلگەن. دەنساۋلىق ساقتاۋ مينيسترلىگىنىڭ الدىن الا بولگەن كەستەسى بويىنشا, الماتى ءساۋىر ايىندا – 65200, مامىردا – 65200, ماۋسىمدا – 67 000 دوزامەن قامتاماسىز ەتىلۋى ءتيىس.
قازىر الماتىدا ۆاكتسينا سالاتىن 35 كابينەت جۇمىس ىستەپ تۇر, الداعى كۇندەرى بازارلار مەن ءىرى ساۋدا ورىندارىندا 15 كابينەت ۇيىمداستىرۋ كوزدەلىنىپ وتىر. ەكپە جاسايتىن ورىندار جەكەمەنشىك ۇىمداردىڭ سۇرانىسىنا ساي جاساقتالا بەرمەك.
كۆي-گە قارسى ەكپە سالدىرعان ادام, قالىپتى ءومىرىن جالعاستىرا بەرە مە, مونشاعا تۇسۋگە, الكوگولدى ىشىمدىكتەر ىشۋگە, تەمەكى تارتۋعا بولا ما دەگەن دە ساۋالدار بار.
لاۋرا مىرزاعاليدىڭ ايتۋىنشا, ۆاكتسينا ءار ادامعا ءارتۇرلى اسەر ەتەدى. بىراق حالىق ۆاكتسيناتسيا جاساتۋدىڭ ماڭىزدىلىعىن بىرتىندەپ ءتۇسىنىپ كەلەدى.
«كوروناۆيرۋس ۆاكتسيناسى ادامنىڭ اعزاسىنا قاراي رەاكتسيا بەرەدى. بىرەۋدە جەڭىل, ەندى بىرەۋىندە اۋىر ءوتۋى مۇمكىن. مەن دە ۆاكتسينا سالدىردىم. جەڭىل ءوتتى. قورقۋدىڭ قاجەتى جوق. تەك ورنى عانا اۋىردى. بالا كەزىمىزدەن ءبارىمىز دە ەكپە جاساتىپ كەلە جاتىرمىز. قالاي بولعاندا دا باستاپقى 3-4 كۇن كۇتىنگەن دۇرىس. ال مەنىمەن بىرگە سالدىرعان ارىپتەستەرىمنىڭ كەيبىرەۋىنىڭ دەنە قىزۋى كوتەرىلدى, ەندى بىرىندە قالتىراۋ بولدى. دەنە قىزۋى كوتەرىلسە, ونى تۇسىرۋگە كومەكتەسەتىن دارىلەر بولادى. ولار انتيبيوتيك ەمەس, دەنە قىزۋىن تۇسىرۋگە ارنالعان پاراتسەتامول, يبۋپروفەن سەكىلدى پرەپاراتتار. سولاردى ىشۋگە بولادى. مونشاعا بارىپ, سپورتپەن اينالىسۋعا دا رۇقسات. بىراق ءبىرىنشى كەزەكتە دەنە قىزۋىن ءتۇسىرۋ كەرەك. ودان كەيىن ۆاكتسينا سالدىرعاننان كەيىن ءۇش كۇندەي مونشاعا تۇسۋگە, سۋ تيگىزۋگە بولمايدى. سول ءتارتىپتى ساقتاۋ قاجەت. ودان كەيىن ادامنىڭ جاعدايىنا قاراي شومىلۋعا بولادى. ءار نارسە ءوز ورنىمەن», دەيدى لاۋرا مىرزاعالي.
ماسەلەن, ارىپتەستەرىمىزدىڭ تاراپىنان ەكپە جاساتۋدان باس تارتقانداردىڭ دوزاسى قالاي جۇمسالادى دەگەن ساۋالعا سپيكەر تومەندەگىدەي جاۋاپ بەردى.
ارينە, ەكپە جاساتۋدان باس تارتاتىندار از دا بولسا, تابىلادى. ەسەسىنە, ىندەتكە قارسى ەكپە جاساتۋدىڭ قاجەت ەكەندىگىن ءتۇسىنىپ جاتقاندار كوبەيىپ كەلەدى. سوندىقتان دا باسى ارتىق, كەرەكسىز جاتقان دوزا جوق.
قازىرگى كۇندەرى الماتىدا دەنساۋلىق ساقتاۋ مينيسترلىگى بەلگىلەپ بەرگەن ادامدارعا ۆاكتسيناتسيا جاسالىپ جاتىر. ولار مەديتسينا قىزمەتكەرلەرى, مۇعالىمدەر, اسكەري جانە پوليتسيا قىزمەتكەرلەرى, ستۋدەنتتەر, مەكتەپكە دەيىنگى ۇيىمداردىڭ قىزمەتكەرلەرى, ديسپانسەردە ەسەپتە تۇرعان ادامدار.
