«2016-2020 جىلدار ارالىعىندا جۇرگىزىلگەن جۇمىستاردىڭ ناتيجەسىندە وسپەلى قورىتىندىمەن 15,4 ملن گەكتار پايدالانىلمايتىن اۋىل شارۋاشىلىعى جەرلەرى انىقتالدى, ونىڭ 5,4 ملن گەكتارى اۋىل شارۋاشىلىعى اينالىمىنا قايتا تارتىلىپ, 5,6 ملن گەكتارى مەملەكەتتىك مەنشىككە قايتارىلدى. ال 4,4 ملن گەكتاردى سوت ورگاندارى ارقىلى الىپ قويۋ جۇمىستارى جۇرگىزىلىپ جاتىر», دەدى مينيستر.
مينيستر ءمالىم ەتكەندەي, 2019 جىلى زاڭنامالىق وزگەرىستەر ەنگىزىلگەننەن كەيىن, 2020 جىلدىڭ قاڭتارىنان باستاپ اقمولا, شىعىس قازاقستان, قوستاناي جانە ماڭعىستاۋ وبلىستارىندا اۋىل شارۋاشىلىعى جەرلەرىن عارىشتىق مونيتورينگىلەۋ جونىندەگى قاناتقاقتى جوبا ىسكە قوسىلدى. 2020 جىلعى جەلتوقسانداعى جاي-كۇي بويىنشا اتالعان وڭىرلەردەگى قاناتقاقتى جوبا اياقتالدى.
«عارىشتىق مونيتورينگ ناتيجەلەرى بويىنشا قاناتقاقتى وڭىرلەردە 8,3 ملن گا انىقتالدى, بۇل نەگىزىنەن 7,6 ملن گا جايىلىم, 0,7 ملن گا ەگىستىك جەرلەر. ونىڭ ىشىندە 2,2 ملن گەكتارى اۋىل شارۋاشىلىعى اينالىمىنا قايتا تارتىلىپ, 2,6 ملن گەكتارى مەملەكەتتىك مەنشىككە قايتارىلدى, 3,5 ملن گەكتار بويىنشا جەرگىلىكتى اتقارۋشى ورگاندار جۇمىس ىستەپ جاتىر. 2021 جىلعى 1 قاڭتاردان باستاپ عارىشتىق مونيتورينگ رەسپۋبليكانىڭ بۇكىل اۋماعىندا قولدانىسقا ەندى», دەدى س.وماروۆ.
