ەسكەرتكىشتىڭ سالتاناتتى اشىلۋ راسىمىنە مەملەكەتتىك حاتشى قىرىمبەك كوشەرباەۆ, مادەنيەت جانە سپورت ءمينيسترى اقتوتى رايىمقۇلوۆا مەن الماتى قالاسىنىڭ اكىمى باقىتجان ساعىنتاەۆ قاتىستى.
سالتاناتتى جيىن بارىسىندا مەملەكەتتىك حاتشى پرەزيدەنت قاسىم-جومارت توقاەۆتىڭ حالىق جازۋشىسى ەسكەرتكىشىنىڭ اشىلۋىنا بايلانىستى ارنايى حاتىن وقىپ بەردى.
«حالقىمىز «گەراعا» دەپ قۇرمەت تۇتقان گەرولد كارلوۆيچ سانالى عۇمىرىندا ۇلتىمىزدىڭ ادەبيەتى مەن مادەنيەتىن وركەندەتۋگە, قازاق ءتىلىنىڭ قارىشتاپ دامۋىنا ايرىقشا ۇلەس قوستى. بالا شاقتان دالا دەموكراتياسىن بويىنا ءسىڭىرىپ وسكەن قارىمدى قالامگەر ۇلت رۋحانياتىنداعى وتكىر دە وزەكتى ماسەلەلەردى دە ءاردايىم بۇكپەسىز ايتىپ, قوعامدا تالقىلاپ, ولاردى شەشۋ جولدارىن ۇسىنىپ وتىردى. ەڭ باستىسى, جازۋشى گەرولد بەلگەر ءوزىنىڭ ءومىرى مەن ونەرى ارقىلى بىرلىگى جاراسقان ءبىرتۇتاس قازاقستان حالقىن قالىپتاستىرۋ ىسىنە قالتقىسىز قىزمەت ەتتى», دەلىنگەن مەملەكەت باسشىسىنىڭ ارنايى حاتىندا.
ءوز كەزەگىندە مەملەكەتتىك حاتشى قازاق اۋىلىندا شىنايى دوستىق پەن جان جىلۋى ورتاسىندا تاربيەلەنگەن «گەراعا» قازاق حالقىنىڭ تىلىنە, دىلىنە, مادەنيەتى مەن ونەرىنە دەگەن شىنايى قامقورلىعى مەن قۇرمەتىن ءومىرىنىڭ سوڭىنا دەيىن ساقتاعانىن اتاپ ءوتتى.
«ونىڭ شىعارماشىلىعى وسكەلەڭ ۇرپاقتى رۋحاني نارلەندىرەتىن ومىرلىك دانالىقتىڭ قازىناسىنا اينالدى. بۇگىن ءبىز تاۋەلسىز قازاقستاننىڭ رۋحاني جاڭعىرۋىنىڭ يگىلىگىنە ارناعان قاجىرلى ەڭبەگى مەن اسىل جۇرەگى ءۇشىن حالقىمىزدىڭ كورنەكتى ۇلىنا قۇرمەت كورسەتەمىز», دەدى مەملەكەتتىك حاتشى.
قىرىمبەك كوشەرباەۆ ەسكەرتكىشتى ازىرلەۋ جانە اشۋ جۇمىستارىن جۇرگىزگەنى ءۇشىن ءمۇسىنشى نۇرلان دامبايعا, مەتسەنات نۇرلان سماعۇلوۆقا جانە باسقا دا وسى يگى ىسكە اتسالىسقان ازاماتتارعا العىس ءبىلدىردى. سونىمەن قاتار سالتاناتتى راسىمگە اسىلى وسمان, احمەتجان اشيري, رۋبەن اندرياسيان, يۋري اراۆين, ەرمەك تۇرسىنوۆ جانە وزگە دە مادەنيەت جانە ونەر قايراتكەرلەرى قاتىستى.
مەملەكەتتىك حاتشى جۇمىس ساپارى بارىسىندا ۇلتتىق عىلىم اكادەمياسىندا بولىپ, ءبىلىم جانە عىلىم مينيسترلىگى وكىلدەرىمەن بىرگە عىلىمدى دامىتۋ ماسەلەسى بويىنشا كەڭەس وتكىزدى. جيىننان كەيىن قىرىمبەك كوشەرباەۆ مادەنيەت جانە سپورت مينيسترلىگى, «قازاقفيلم» اكتسيونەرلىك قوعامى جانە ۇلتتىق كينونى قولداۋ ورتالىعىنىڭ باسشىلىعىمەن تاريحي فيلمدەردى ءتۇسىرۋ جوبالارىن تالقىلادى.
