شۆەتسيا سىرتقى ىستەر مينيسترلىگى پروتوكول دەپارتامەنتىنىڭ باسشىسى ماريا كريستينا لۋندكۆيستپەن كەزدەسۋ بارىسىندا س.نۇرتاەۆ بيىل قازاقستان ءوزىنىڭ تاۋەلسىزدىگىنىڭ 30 جىلدىعىن اتاپ ءوتىپ جاتقاندىعىن جانە وسى جىلدار ىشىندە ءبىزدىڭ ەل شۆەتسيانى ماڭىزدى سىرتقى ساياسي ارىپتەس رەتىندە قاراستىرىپ كەلە جاتقانىن اتاپ ءوتتى.
م.لۋندكۆيست قازاقستان باسشىلىعىنىڭ بىتىمگەرشىلىك باستامالارى, ەلدىڭ زاماناۋي ساياسي دامۋى, تۇڭعىش پرەزيدەنت - ەلباسى نۇرسۇلتان نازارباەۆتىڭ تاۋەلسىز ەلدىڭ قالىپتاسۋى مەن نىعايۋىنداعى جانە قوعامداعى تۇراقتىلىقتى قامتاماسىز ەتۋدەگى رولىمەن تانىسىپ, پرەزيدەنت قاسىم-جومارت توقاەۆ قول قويعان بەيبىت جينالىستار بوستاندىعىن, جالا جابۋدى دەكريميناليزاتسيالاۋ, گەندەرلىك تەڭدىكتى قامتاماسىز ەتۋگە باعىتتالعان سەرپىندى زاڭدار تۋرالى اقپارات الدى.
2017-2018 جىلدارداعى بۇۇ قاۋىپسىزدىك كەڭەسى شەڭبەرىندەگى قازاقستان مەن شۆەتسيا اراسىنداعى ساياسي ءوزارا ءىس-قيمىلدىڭ وڭ تاجىريبەسى اتاپ ءوتىلدى. بۇۇ-داعى قازاقستاندىق جانە شۆەد دەلەگاتسيالارى وسى جىلداردا بەيبىتشىلىك پەن قاۋىپسىزدىك ماسەلەلەرىندە بىرلەسىپ جانە بەلسەندى جۇمىس ىستەپ كەلەدى, وسىعان بايلانىستى قازاقستاندىق ديپلومات بۇل تاجىريبەنى حالىقارالىق ۇيىمدار الاڭدارىندا, اتاپ ايتقاندا 2021 ج. شۆەتسيانىڭ ەقىۇ-عا توراعالىق ەتۋى كەزىندە بارىنشا جالعاستىرۋدى ۇسىندى.
سونىمەن قاتار, اڭگىمەلەسۋ بارىسىندا ەكىجاقتى قاتىناستاردى, ءوزارا ساۋدانى تەرەڭدەتۋگە جانە ينۆەستيتسيالاردى تارتۋعا قىزىعۋشىلىق ءبىلدىرىلدى.
پروتوكول دەپارتامەنتىنىڭ باسشىسى ەلشىگە قازاقستاندىق-شۆەد ىنتىماقتاستىعىن نىعايتۋ جولىندا تابىستى جانە جەمىستى جۇمىس تىلەدى.
