ساباقتاستىق سالتانات قۇرىپ, ەلباسى نۇرسۇلتان نازارباەۆ ەل تىزگىنىن مەملەكەت باسشىسى قاسىم-جومارت توقاەۆقا تاپسىردى. تۇڭعىش پرەزيدەنتتىڭ شەشىمى شىنايىلىقپەن دايەكتەلىپ, كەرۋەن جىلداردىڭ كەدەرگىسىنە مۇقالماعان كولىكتى كوشتىڭ جۇگى ىلگەرى جىلجىدى.
وسى ەكى جىل ىشىندە ءتۇرلى قيىندىقتارعا قاراماستان پرەزيدەنت قاسىم-جومارت كەمەل ۇلى دا سەنىمگە سەرت بايلاپ, سىندارلى ساتتە سىر الدىرماي ەل ءۇمىتىن ەنشىلەدى. جاھاندىق ىندەت جان القىمنان العان تۇستا جاڭاشا رەفورمالار ارقىلى جاعدايدى تۇراقتاندىرىپ, ۇلتتى ۇيىتا ءبىلدى. سىرتقى جانە ىشكى ساياساتتى تەڭدەستىرىپ ۇستاپ, تاتۋلىقتى تۇمار ەتىپ, تۇعىردا نىق تۇردى. بۇل ەلباسىنىڭ بيىك پاراساتىنىڭ تاعى ءبىر كورىنىسى بولدى.
ارينە, بىلتىر پاندەميا كوكەيىمىزدە ءبۇر جارعان كەلەلى كوپ ماقساتىمىزعا كەدەرگىسىن كەلتىردى. اۋەلدە كۇللى الەم ابدىراپ قالعانىمەن, ارتىنان اتى جامان ىندەتتى اۋىزدىقتاۋدىڭ امالى تابىلدى. قوعامنىڭ ساناسىن ۇرەيدەن اراشالاپ, وتكىنشى قاۋىپتىڭ وتىندە قالماۋدى ۇيرەندىك. مەملەكەت كاسىپكە بەيىم ازاماتتارعا كومەك قولىن سوزىپ, ەكونوميكامىزدىڭ تۇراقتىلىعىن قامتاماسىز ەتۋ ءۇشىن شۇعىل شەشىم, بايىپتى باستامالار جاساپ, الەۋمەتتىڭ ەڭسەسىن كوتەردى. ۇلى اباي جانە فارابي جىلدارىندا تاعىلىمدى ءىس-شارالارعا كۋا بولدىق. سايلاۋ ءوتىپ, ءماجىلىستىڭ قۇرامى جاڭاردى. دەسەك تە, تىشقان جىلى «ىندەت ىنگە تىققان» كۇردەلى كەزەڭ رەتىندە ەل ەسىندە قالاتىن بولدى.
ساناۋلى كۇننەن كەيىن كۇنتىزبە بويىنشا سيىر جىلى بوساعامىزدان اتتايدى. وسىلايشا, وتارلىق قامىتىنان قۇتقارعان ازاتتىقتىڭ وتىزىنشى جىلىنا قادام باسامىز. قازىر ايتۋعا عانا وڭاي, وتىز جاسقا تولىپ كەمەلدەنگەن مەملەكەتىمىزدىڭ قىسقا مەرزىم ىشىندە مۇنداي تابىسقا جەتەتىنىنە ادەپكىدە كۇمانمەن قاراعان جاندار دا از بولعان جوق. ەكونوميكاسى ءالجۋاز, دەموگرافيالىق احۋالى ءالسىز, ەتنوستىق قۇرامى الا-قۇلا, شەكاراسى اشىق-شاشىق جاتقان ەلىمىزدى كەيبىر ساياساتكەرلەر «ازيانىڭ بالقانىنا» تەڭەدى. قايسىبىرى ءتۇرلى ۇلتارالىق قاقتىعىستار تۋادى دەپ ساۋەگەيلىك جاسادى. ءوندىرىسى شيكىزاتقا تاۋەلدى, قالالارى ءبىر-بىرىنەن الشاق, جولدارى دا جارامسىز ەكەنىن جارىسا ايتىپ جاتتى. ايتسە دە بوستەكى بولجامپازداردىڭ جورامالى جوققا شىقتى. قىسقا جىلدا الەۋەتى ارتقان ىرگەلى مەملەكەتكە اينالدىق. دارمەنسىزدىككە دەس بەرمەي, دامۋدىڭ جاڭا ساتىسىنا وتتىك. كوكتە ءبىر تاڭىرگە, جەردە ءبىر وزىنە عانا سەنگەن بابا تالىمىنەن تاعان تارتقان حالقىمىز جيىرماسىنشى عاسىردا سانالۋان الەۋمەتتىك تارتىسقا ۇرىنسا دا جاڭا مىڭجىلدىققا ەگەمەن ەل بولىپ اتتادى. وتپەلى كەزەڭنىڭ جەلكوبىك پىكىر, جاڭساق جارنامالارىنا سابىرمەن قاراپ, ۇلتتىڭ تۇتاستىعىنا سىزات تۇسىرمەدى. ىشكى جانە سىرتقى ساياسات بايىپتى دا بايسالدى دامۋ باعىتىندا ءوربىدى. تاۋەلسىز قازاقستان بارلىق حالىقارالىق ۇيىمدارمەن, الىس-جاقىن مەملەكەتتەرمەن ىجداعاتتى ىنتىماق ورناتتى.
العاش ارايلى ازاتتىقتىڭ سامالى ماڭدايىمىزدى وپكەندە ەلىمىزدەگى قازاق حالىنىڭ سانى 40 پايىزعا دا جەتپەيتىن ەدى, قازىر 80 پايىزعا تاياپ قالدى. ۇلتتىق قۇندىلىقتار جاڭعىرا تۇلەپ, مادەني مۇرامىز مايەكتەلدى, تارلان تاريحىمىز دايەكتەلدى, ۇلتىمىزدىڭ جاڭا رۋحاني بولمىسى قالىپتاسۋعا نەگىز قالاندى. ءداستۇرىمىزدى دارىپتەپ, سالتىمىزدى سارالاپ, ساباقتادىق. الدا كەلە جاتقان ۇلىستىڭ ۇلى كۇنى سونىڭ جارقىن دالەلى.
قازىر دە ۇلى مەيرامعا ورايلاستىرىلا مەملەكەت تاراپىنان, ەل-جۇرت, جەكەلەگەن دەمەۋشىلەر كومەگىمەن قانشاما سىي-سياپات جاسالىنۋدا. سونداي-اق بيىلعى ناۋرىز قارساڭىندا ەل كولەمىندەگى تولعاقتى الەۋمەتتىك شارۋالار, اسىرەسە, كوپ بالالى انالار, تۇرمىسى تومەن وتباسىلاردىڭ جاي-كۇيى, جالاقى سىندى ماسەلەلەردىڭ ءتۇيىنىن تارقاتۋعا باعىتتالعان باعدارلامالاردىڭ قابىلدانۋى ءسوزىمىزدىڭ دالەلى.
ۇلى ءىستىڭ ۇلىستان باستاۋ العانى بەكەر ەمەس بولار. ءاز-ناۋرىز – عاسىرلار شەرۋىندە تۇزىلگەن ادەت-عۇرپىمىزدىڭ, جيعان-تەرگەن ءىنجۋ-مارجانىمىزدىڭ التىن كومبەسى, ساۋلەلى ايشىعى دەسەك, ءتاۋ ەتەر تاۋەلسىزدىك – باسىمىزداعى بارىمىز, كىر شالماعان ارىمىز, باياندى باقىتىمىز ءھام مەملەكەتىمىزدىڭ مىزعىماس تىرەگى, وتانشىلدىقتىڭ جۇرەگى ەكەنى انىق.
ۇلىستىڭ ۇلى كۇنىندە ءتۇبى ءبىر تۇركى حالقى ەرگەنەقوننىڭ جارتاس-شاتقالىن جارىپ, ەركىندىككە جەتەلەگەن, بوداندىقتان بوستاندىققا باستاعان اقجارىلقاپ ءساتتى ەسكە ءتۇسىرىپ, بولات توسكە سوم بالعامەن الما-كەزەك ۇرىپ, كورىكتىڭ وتىن مازداتادى ەكەن. سوندىقتان كۇن مەن ءتۇن تەڭەلگەن, بارشا جۇرت جاقسىلىققا كەنەلگەن ءاز ناۋرىز ءاماندا جىلدىڭ باسى, سونىمەن بىرگە ەلدىك پەن ەركىندىكتىڭ جارشىسى سانالعان.
تورگە وزعان سيىر جىلىندا اۋىرتپالىق ارتتا قالىپ, ۇلىس وڭ بولسىن, اق مول بولسىن! وشاعىمىزدا وتىمىز مازداپ, وتانىمىزدىڭ ىرىسى ارتا بەرسىن!
