inform.kz
ساۋدا جانە ينتەگراتسيا ۆيتسە-ءمينيسترى ەرجان قازانباەۆتىڭ ايتۋىنشا, بۇل باعىتتا مەملەكەت پەن ۇكىمەتتىك ەمەس ۇيىمدار تىزە قوسىپ جۇمىس ىستەگەندە عانا كەدەرگىلەردى ەڭسەرىپ, جەتىستىككە قول جەتكىزەدى.
– ەلىمىزدە وسى تاراپتا 50-دەن استام قوعامدىق بىرلەستىك جۇمىس ىستەيدى. ولار تۇتىنۋشىلىق قۇقىقتاردى قورعاۋ دەڭگەيىن ارتتىرۋعا ىقپال ەتەدى. بيىل اقپان ايىندا مينيسترلىك پەن «قازاقستان تۇتىنۋشىلارىنىڭ رەسپۋبليكالىق قاۋىمداستىعى» بىرلەستىگى اراسىندا ءوزارا ىنتىماقتاستىق مەموراندۋمىنا قول قويىلعان. 20 جىل بويى جۇمىس ىستەپ كەلە جاتقان قوعامدىق بىرلەستىك باسشىلارىنىڭ قولداۋىنان ۇمىتتەنەمىز, – دەدى ۆيتسە-مينيستر.
ءىس-شارا اياسىندا تۇتىنۋشىلار قۇقىعىن قورعاۋ سالاسىندا ايانباي ەڭبەك ەتىپ, وسى سالانى دامىتۋعا ۇلەس قوسقانى ءۇشىن «تۇتىنۋشىلار ليگاسى» قوعامدىق بىرلەستىگىنىڭ ءتورايىمى بايان احمەتجانوۆا, تۇتىنۋشىلاردىڭ قۇقىقتارىن قورعاۋ كواليتسياسىنىڭ توراعاسى مۇرات ابەنوۆ, «ادىلەت» قوعامدىق بىرلەستىگى توراعاسىنىڭ ورىنباسارى تۇرسىن جاعىپاروۆا, «اتاكەنت – ادام» قوعامدىق بىرلەستىگىنىڭ باسشىسى سەرگەي فەدوسەەۆ, «ساپا» قوعامدىق بىرلەستىگىنىڭ توراعاسى الىكاقپار ماتىشەۆ جانە «ساتىبالدى» قوعامدىق بىرلەستىگىنىڭ توراعاسى سەرىك مومىشەۆ ماراپاتتالدى.
تۇرسىن جاعىپاروۆانىڭ ايتۋىنشا, بۇل سالادا ءالى شەشىمىن تاپپاي تۇرعان ماسەلە كوپ.
– تاۋەلسىزدىك العان 30 جىلدا بۇل سالادا ۇلكەن ناتيجەگە جەتە المادىق. 2016 جىلى زاڭعا ەنگىزگەن وزگەرىس بويىنشا تۇتىنۋشىلار قۇقىعىن قورعاپ جۇرگەندەرگە دەمەۋشىلىك جاسالمايدى. بۇل ءبىر جاعىنان دۇرىس شىعار. كەيبىر ۇكىمەتتىك ەمەس ۇيىمدار كاسىپكەرمەن بىرلەسىپ كەتىپ, تۇتىنۋشىلاردىڭ قۇقىعى قورعالماي قالۋى دا مۇمكىن. بىراق كەز كەلگەن ءىس العا جىلجۋ ءۇشىن قارجىلاندىرۋ بولۋى قاجەت. ونسىز شارۋا شەشىلمەيدى. سوندىقتان وسى ماسەلەنى كوتەرىپ, قوعامدىق بىرلەستىكتەر مەن مينيسترلىك كوپ تۇيتكىلدى تالقىلاۋى قاجەت. سودان سوڭ بىرىڭعاي اقپاراتتىق جۇيە دە دۇرىس جۇمىس ىستەپ تۇرعان جوق. قازىر تۇتىنۋشىلار پروبلەماسىن شەشەتىن جالعىز ورگان – مينيسترلىك جانە سونىڭ ىشىندەگى كوميتەت. ەندى جەرگىلىكتى اتقارۋشى ورگاندار ءۇشىن دە ىڭعايلى جۇيە جاساپ, جۇمىس اۋقىمىن ارتتىرعان ءجون, – دەيدى «ادىلەت» بىرلەستىگىنىڭ وكىلى.
جيىن قورىتىندىسى بويىنشا مينيسترلىك پەن قوعامدىق بىرلەستىك وكىلدەرى اي سايىن ءبىر مارتە باسقوسۋ ۇيىمداستىرىپ, تۇتىنۋشىلار قۇقىعىن قورعاۋ سالاسىنداعى وزەكتى تاقىرىپتاردى تالقىلاپ, سونىڭ ناتيجەسى بويىنشا ورتاق شەشىم قابىلداپ تۇرۋعا ۋاعدالاستى.
