مەكەمەنىڭ اشىلۋىنا «قازمۇنايگاز» ۇك» اق باسقارما توراعاسى اليك ايدارباەۆ, «وزەنمۇنايگاز» اق باس ديرەكتورى ەسەن وتەەۆ, Samruk-Kazyna Trust قورىنىڭ وكىلدەرى, سونداي-اق ەرەكشە قاجەتتىلىكتەرى بار بالالاردىڭ اتا-انالارى قاتىستى.
ورتالىق كەشەندى وڭالتۋ قىزمەتىن كورسەتەدى. وعان 9 قىزمەت كىرەدى: ەمدىك دەنە شىنىقتىرۋ, گيدروتەراپيا, فيزيوتەراپيا, ماسساج, يپپوتەراپيا, سونداي-اق پسيحولوگيالىق-پەداگوگيكالىق تۇزەتۋ جانە باسقالار. زاماناۋي قوندىرعىلارمەن قامتاماسىز ەتىلگەن وڭالتۋ ورتالىعىندا ساۋلەلى تەراپيا, ماگنيت, ۋلترادىبىستىق اپپارات تۇرلەرىمەن قامتىلعان 11 ارنايى كابينەت بار.
ورتالىقتى قۇرۋ وتكەن جىلى «مۇنايشى قامقورى» قوعامدىق قورى مەن Samruk-Kazynا Trust دامىتۋ قورى اراسىنداعى قايىرىمدىلىق جاساۋ باعىتىندا قول قويىلعان ەكىجاقتى كەلىسىمشارت نەگىزىندە جۇزەگە اسىرىلدى. وڭالتۋ ورتالىعىن قۇرال-جابدىقپەن قامتىپ, بىلىكتى مامانداردى جۇمىسقا ورنالاستىرۋعا مۇمكىندىك تۋدى. جاڭا مەكەمەگە جاڭاوزەن قالاسىنىڭ 15 بىلىكتى مامانى جۇمىسقا ورنالاستىرىلدى.
جوبانىڭ باستاماشىسى – «مۇنايشى قامقورى» قق, ال ونىڭ قۇرىلتايشىلارى – «وزەنمۇنايگاز» اق قىزمەتكەرلەرى. جوبانى جۇزەگە اسىرۋ اياسىندا كومپانيا ر.وتەسىنوۆ اتىنداعى دەنە شىنىقتىرۋ-ساۋىقتىرۋ ورتالىعىنىڭ بازاسىنان ورىن ءبولىپ, جوندەۋ جۇمىستارىن جۇرگىزدى. ايتا كەتۋ كەرەك, ورتالىقتىڭ اكىمشىلىك شىعىندارىن وتەۋدىڭ جىل سايىنعى بيۋدجەتى جوبا اكىمشىسى «وزەنمۇنايگاز» اق مەن ونىڭ 9 مىڭنان استام جۇمىسكەرىنىڭ ەرىكتى جارنالارىنىڭ ەسەبىنەن قۇرالاتىن بولادى.
«ورتالىق جىلىنا تسەرەبرالدى سال اۋرۋى, اۋتيستىك سپەكتردىڭ بۇزىلۋى, پسيحيكالىق دامۋدىڭ تەجەلۋى, گەميپارەز, نەيرو-ورتوپەديالىق اۋرۋلار جانە باسقا دا ەرەكشەلىكتەرى بار 600-گە جۋىق بالانى تەگىن قابىلدايتىن بولادى», دەيدى «مۇنايشى قامقورى» قق وكىلى كەلدىباي سانزىباەۆ.
ال Samruk-Kazyna Trust قورىنىڭ رەسمي وكىلى – كورپوراتيۆتىك قىزمەتتىڭ باسشىسى ميراس ىرگەباەۆ: Samruk-Kazyna Trust قورى دا بۇل جوبانى قولداپ, قاجەتتى جابدىقتاردى, ونىڭ ىشىندە ءجۇرۋ داعدىلارىن قالپىنا كەلتىرۋ ءۇشىن Mercury Med وڭالتۋ كەشەنىن, بالانس پاتولوگياسىن دياگنوستيكالاۋعا ارنالعان «بيوكينەكت» كەشەنىن, ەرگوتەراپياعا ارنالعان ترەناجەرلەردى, ماگنيتتىك جانە فيزيوتەراپياعا ارنالعان اپپاراتتاردى, بارلىعى 40 ملن تەڭگەگە 25 جابدىقتى ساتىپ الدى», دەدى.
جەرگىلىكتى تۇرعىندارعا, اسىرەسە دەنساۋلىعىندا اقاۋى بار بالالارعا ەندى نۇر-سۇلتان قالاسىنا وزگە دە الىس قالالارعا قاتىناماي-اق, جاڭاوزەندەگى ورتالىقتا ەم-دوم الۋعا مۇمكىندىك تۋدى.
– بالامنىڭ 3 جاسىندا بويىندا اۋتيزم بار ەكەنىن بىلدىك. تالاي جەرگە اپارىپ كورسەتتىم. ءتيىستى ەم-دوم جاسايتىن ورتالىقتىڭ ءوز اۋماعىمىزدا بولعانى, ارينە, جاقسى. ەندى وسى جەرگە كەلىپ قارالاتىن بولامىز. پايداسى بولاتىنىنا سەنەمىن, – دەيدى فاريزا شورتانوۆا.
ال ەكى جاسار بەردىعالي التىنبەكتىڭ اناسى بيالاي دۇرىسباەۆا:
– ءبىزدىڭ قالامىزدا وسىنداي زاماناۋي وڭالتۋ ورتالىعى پايدا بولعانىنا وتە قۋانىشتىمىن. مەنىڭ ۇلىمنىڭ تسەرەبرالدى سال اۋرۋى بار جانە بىزگە ۇنەمى وڭالتۋدان ءوتىپ وتىرۋ قاجەت. مۇندا بىزگە كومەكتەسە الاتىن بىلىكتى ماماندار, جاڭا جابدىقتار, ترەناجەرلەر بار. اتا-انالار اتىنان وسى ورتالىقتى اشۋعا كومەكتەسكەندەردىڭ بارلىعىنا العىس ايتامىن, – دەدى.
قازىرگى تاڭدا جاڭاوزەن قالاسىندا پسيحونەۆرولوگيالىق اۋىتقۋى بار, تىرەك قيمىل اپپاراتى بۇزىلعان, سال اۋرۋىمەن اۋىراتىن 1032 بالا تىركەلگەن. جاڭا ورتالىق بالالاردىڭ يگىلىگىنە قىزمەت ەتىپ, دەنساۋلىقتارىنىڭ قالىپقا كەلۋىنە سەپ بولىپ جاتسا, قۇبا-قۇپ.
ماڭعىستاۋ وبلىسى
