كوروناۆيرۋس ىندەتى تەك قازاقستاندى عانا ەمەس, دۇنيەجۇزىن الەۋمەتتىك-ەكونوميكالىق داعدارىسقا ۇشىراتتى. ەلىمىز وسى قاتەرلى دەرتتىڭ سالدارى اۋىر بولاتىنىن العاشقىلاردىڭ ءبىرى بولىپ ءتۇسىنىپ, دەر كەزىندە ءتيىستى شارالار قابىلدادى.
مەملەكەت باسشىسى كوروناۆيرۋس ىندەتىمەن كۇرەس كەزىندە, ەڭ الدىمەن, حالىقتىڭ دەنساۋلىعىن قورعاۋ, ەكونوميكانىڭ تۇراقتىلىعى مەن دامۋ قارقىنىن ساقتاۋ, ءبىلىم بەرۋ سالالارىنا باسا ءمان بەردى. اتاپ ايتقاندا 4,5 ميلليوننان استام ادامعا 42500 تەڭگە كولەمىندە قارجىلاي كومەك كورسەتىلدى. 1 ميلليوننان استام ازاماتقا ازىق-ت ۇلىك پەن تۇرمىستىق زاتتار ۇلەستىرىلدى. 2 ميلليونعا جۋىق ادامنىڭ نەسيە تولەۋ مەرزىمى كەيىنگە شەگەرىلدى. 700 مىڭنان استام كومپانيا مەن كاسىپكەرلەردىڭ سالىق جۇكتەمەسى ازايتىلدى. جالپى قازاقستان پرەزيدەنتىنىڭ تاپسىرماسىمەن قۇرىلعان توتەنشە جاعداي جونىندەگى مەملەكەتتىك كوميسسيا 500-گە جۋىق ماڭىزدى شەشىمدەردى ىسكە اسىردى.
قاسىم-جومارت توقاەۆ پاندەميا قاۋپىنە قاراماستان, وڭىرلەردە قالىپتاسقان احۋالدى ءوز كوزىمەن كورىپ, ىندەتكە قارسى كۇرەسىپ جاتقان جۇرتشىلىقپەن جۇزبە-ءجۇز كەزدەسىپ, وبلىستاردىڭ الەۋمەتتىك-ەكونوميكالىق دامۋ بارىسىمەن تانىسۋ ءۇشىن جامبىل, اقمولا, تۇركىستان, قوستاناي, سولتۇستىك قازاقستان, الماتى, شىعىس قازاقستان, قاراعاندى وبلىستارىنا جۇمىس ساپارىمەن باردى. ءار ايماقتىڭ وزىنە ءتان ەرەكشەلىكتەرىنە بايلانىستى اتقارىلىپ جاتقان جۇمىستارمەن تانىسىپ, اۋىل شارۋاشىلىعى مەن ونەركاسىپتى وركەندەتۋ ءۇشىن ينۆەستيتسيا تارتۋ, تۇيتكىلدى ماسەلەلەردى شەشۋ جونىندە تاپسىرمالار بەردى.
كوروناۆيرۋس پاندەمياسى قازاقستاننىڭ حالىقارالىق قاتىناستارىنا دا ايتارلىقتاي اسەر ەتتى. سوعان قاراماستان, جوسپارلانعان الەمدىك دەڭگەيدەگى جيىنداردى ونلاين رەجيمدە وتكىزۋ فورماتى قولدانىسقا ەنگىزىلدى.
اتاپ ايتقاندا, قاسىم-جومارت كەمەل ۇلى بۇۇ-نىڭ 75 جىلدىعىنا ارنالعان جوعارى دەڭگەيدەگى ءىس-شاراعا, بۇۇ باس اسسامبلەياسى 75-سەسسياسىنىڭ جالپىساياسي دەباتتارىنا, تمد مەملەكەتتەرى باسشىلارى كەڭەسىنىڭ وتىرىسىنا, شانحاي ىنتىماقتاستىق ۇيىمىنا مۇشە مەملەكەتتەر باسشىلارى كەڭەسىنىڭ وتىرىسىنا, تۇركىتىلدەس مەملەكەتتەردىڭ ىنتىماقتاستىعى كەڭەسىنىڭ توتەنشە سامميتىنە, ەۋرازيالىق ەكونوميكالىق وداقتىڭ سامميتىنە, ۇجىمدىق قاۋىپسىزدىك شارت ۇيىمىنىڭ سامميتىنە جانە باسقا دا جيىندارعا ۆيدەو بايلانىس رەجيمىندە قاتىستى. وسى جيىنداردا قازاقستاننىڭ حالىقارالىق قاۋىپسىزدىكتى نىعايتۋعا, جاھاندىق جانە وڭىرلىك بايلانىستاردى دامىتۋعا بەيىل ەكەنىن ايتتى.
جالپى مەملەكەت باسشىسى بىلتىرعى 16 ناۋرىزداعى تەلەۆيزيالىق ۇندەۋىنەن باستاپ ءبىر جىل ىشىندە اۋقىمدى جۇمىس اتقاردى. وسىعان بايلانىستى پرەزيدەنتتىڭ ءباسپاسوز قىزمەتى بيىل دا ءداستۇرلى تۇردە قاسىم-جومارت كەمەل ۇلىنىڭ وڭىرلەرگە جاساعان جۇمىس ساپارلارىنىڭ بارىسىندا, ءتۇرلى جيىنداردا سويلەگەن سوزدەرىن, ۇندەۋلەرى مەن مالىمدەمەلەرىن وتاندىق جانە شەتەلدىك بۇقارالىق اقپارات قۇرالدارى وكىلدەرىنە بەرگەن سۇحباتتارى مەن ءارتۇرلى باسىلىمداردا جاريالانعان ماقالالارىن ءۇش كىتاپقا توپتاستىرىپ شىعارىپ وتىر.
ءبىرىنشى جانە ەكىنشى كىتاپقا قاسىم-جومارت توقاەۆتىڭ COVID-19 پاندەمياسىن ەڭسەرىپ, ەلىمىزدىڭ ەكونوميكالىق ءوسىمىن قايتا قالپىنا كەلتىرۋ ماقساتىمەن قولعا العان باستامالارى, حالىقتىڭ ءال-اۋقاتىن جاقسارتۋ ءۇشىن مەملەكەتتىڭ الدىندا تۇرعان مىندەتتەر جونىندەگى تۇشىمدى وي-پىكىرلەرى, سونداي-اق الەمدىك ماڭىزى زور حالىقارالىق جيىنداردا سويلەگەن سوزدەرى توپتاستىرىلعان.
ءۇشىنشى كىتاپقا مەملەكەت باسشىسىنىڭ وتاندىق جانە شەتەلدىك بۇقارالىق اقپارات قۇرالدارىندا جاريالانعان ماقالالارى مەن سۇحباتتارى توپتاستىرىلعان. كىتاپتا قازاقستاننىڭ حالىقارالىق قاتىناستارعا قاتىستى ۇستانىمى, پرەزيدەنتتىڭ ەل ىشىندەگى وزەكتى ماسەلەلەرگە قاتىستى وي-تولعامدارى ءسوز بولادى.
پرەزيدەنتتىڭ ءباسپاسوز قىزمەتى وقىرمان قاۋىمعا قاسىم-جومارت كەمەل ۇلىنىڭ ءبىر جىلدا اتقارعان جۇمىستارىنىڭ جالپى قورىتىندىسى رەتىندە وسى 3 تومدىقتى ۇسىنىپ وتىر. جيناققا مەملەكەت باسشىسىنىڭ قاتىسۋىمەن وتكەن جيىنداردىڭ فوتوسۋرەتتەرى دە ەنگەن. كىتاپتا جاريالانعان ماتەريالدار جاس ىزدەنۋشىلەرگە, مەملەكەتتىك مەكەمەلەردە ەڭبەك ەتىپ جاتقان قىزمەتشىلەرگە قۇندى ءارى دەرەكتى قۇجات بولماق.
