ءماجىلىستىڭ اگرارلىق ماسەلەلەر كوميتەتىنىڭ توراعاسى ەرلان بارلىباەۆ پالاتانىڭ جالپى وتىرىسىندا: «زاڭ جوباسى قازاقستان پرەزيدەنتى قاسىم-جومارت توقاەۆتىڭ زاڭ شىعارۋ باستاماسى تارتىبىمەن ەنگىزىلدى. زاڭ جوباسىن قابىلداۋدىڭ ماقساتى – شەتەلدىكتەردىڭ, ازاماتتىعى جوق ادامداردىڭ, شەتەلدىك زاڭدى تۇلعالاردىڭ, شەتەلدىك قاتىسۋى بار قازاقستان رەسپۋبليكاسى زاڭدى تۇلعالارىنىڭ, حالىقارالىق ۇيىمداردىڭ, سونداي-اق حالىقارالىق قاتىسۋى بار عىلىمي ورتالىقتاردىڭ اۋىل شارۋاشىلىعى ماقساتىنداعى جەر ۋچاسكەلەرىن جەكەمەنشىك قۇقىعىمەن جانە ۋاقىتشا جەر پايدالانۋ قۇقىعىمەن يە بولۋىنا تىيىم سالۋدى ەنگىزۋ», دەپ ايتىپ ءوتتى.
وسى ورايدا دەپۋتات اگرارلىق ماسەلەلەر كوميتەتى اتالعان زاڭ جوباسى بويىنشا قورىتىندى ازىرلەۋگە دايىن ەكەنىن اتاپ ءوتتى. ەسكە سالا كەتەيىك, جاقىندا پرەزيدەنت قاسىم-جومارت توقاەۆ جەردى شەتەلدىكتەرگە ساتۋعا ءبىرجولا تىيىم سالۋدى كوزدەيتىن زاڭ جوباسىن ماجىلىسكە جولداعانىن ايتقان ەدى.
