وبلىستا ىندەت جۇقتىرعاندار مەن قايتىس بولعاندار سانى ارتىپ بارادى. 16 ناۋرىز كۇنگى مالىمەت بويىنشا سوڭعى تاۋلىكتە 51 ادام ىندەت جۇقتىرعان. ال جالپى وسى دەرتتەن قايتىس بولعاندار سانى 219-عا جەتتى. وسىعان وراي وڭىردە كارانتين تالاپتارى كۇشەيتىلەتىنى وبلىس اكىمى عالي ەسقاليەۆتىڭ توراعالىعىمەن وتكەن شتاب وتىرىسىندا حابارلاندى.
- جىل باسىنان بەرى وبلىستا كۆي-گە 4657 ادام شالدىقسا, 50 ادام كوروناۆيرۋس ىندەتىنەن قايتىس بولدى. ناقتىراق ايتساق, قاڭتاردا 28 ادام, اقپاندا - 15, ناۋرىزدا جەتى ادام قايتىس بولىپ وتىر. ىندەت جۇقتىرعانداردىڭ 34 پايىزى – 80 جاستان اسقاندار, 28 پايىزى – 40-65 جاس ارالىعىنداعىلار بولسا, 24 پايىزى – 65-80 جاس ارالىعىنداعىلار. كۆي-گە شالدىققانداردىڭ دەنى ورالدا, ودان كەيىن ءبورلى, بايتەرەك, تەرەكتى اۋداندارىندا تىركەلىپ وتىر. اۋرۋ وشاعى – نەگىزىنەن ىندەت جۇقتىرعان وتباسىلار, قوعامدىق كولىكتەر, جۇمىس ورىندارى مەن ساۋدا ۇيلەرى, وتباسىلىق شارالار. ءۇشىنشى توقسان باستالعالى 334 وقۋشى كوروناۆيرۋس جۇقتىرعان, - دەيدى باتىس قازاقستان وبلىستىق سانيتارلىق-ەپيدەميولوگيالىق باقىلاۋ دەپارتامەنتى باسشىسىنىڭ ورىنباسارى نۇرلىبەك مۇستاەۆ.
بۇگىندە وبلىستا جۇقپالى اۋرۋلاردى ەمدەيتىن 7 ستاتسيونار, 13 پتر زەرتحاناسى بار. وڭىردەگى دەنساۋلىق ساقتاۋ باسقارماسى باسشىسىنىڭ مىندەتىن اتقارۋشى ارمان قاليبەكوۆتىڭ ايتۋىنشا, وبلىسقا 4 ناۋرىزدا 6500 دوزادان تۇراتىن ۆاكتسينانى ەكىنشى پارتياسى جەتكىزىلگەن. جالپى 1 اقپاننان بەرى وبلىستا مەديتسينا سالاسىنىڭ 2210 قىزمەتكەرى, 322 پەداگوگ, كۇشتىك قۇرىلىمداردىڭ 40 وكىلى ەكپە الىپ ۇلگەردى. «ۆاكتسينالاۋ كۇن سايىن, بارلىق اۋداندا ءجۇرىپ جاتىر» دەپ حابارلايدى دەنساۋلىق ساقتاۋ باسقارماسىنىڭ ءباسپاسوز قىزمەتى.
سوڭعى مالىمەتتەرگە قاراعاندا, وڭىردەگى ينفەكتسيالىق 7 ستاتسيونارداعى جالپى توسەك سانى 591 بولسا, بۇگىندە وندا 275 ناۋقاس ەم الۋدا. ياعني كەرەۋەتتەردىڭ 53,5%-ى بوس. كارانتيندىك ستاتسيونارلاردا 38 ادام بار. جانساقتاۋ بولىمدەرىندە 16 ناۋقاس جاتىر. وبلىس بويىنشا ينفەكتسيالىق اۋرۋحانالاردا – 1221, كارانتيندىك ستاتسيونارلاردا – 765 كەرەۋەت رەزەرۆتە تۇر.
ناۋرىزدىڭ 16-سى كۇنگى مالىمەت بويىنشا وسى وقۋ جىلىندا وقۋشىلار جانە بالاباقشا تاربيەلەنۋشىلەرى اراسىندا 563 وقيعا تىركەلىپتى. ماسەلەن, وتكەن جىلدىڭ قىركۇيەك ايىندا – 4, قازاندا – 5, قاراشا ايىندا – 102, جەلتوقساندا – 78 وقۋشى كوروناۆيرۋس جۇقتىرعان. مەكتەپكە دەيىنگى ۇيىمداردان 16 ءبۇلدىرشىن اۋىرعان. ال 2021 جىل باستالعالى ۆيرۋس جۇقتىرعان وقۋشىلاردىڭ سانى 358-گە جەتكەن.
ءىرى ءوندىرىس ورىندارىنداعى احۋال دا قاتاڭ باقىلاۋدا. ماسەلەن, «جايىق مۇناي» مەكەمەسىندە 2020 جىل بويىنا كوروناۆيرۋس جۇقتىرعان 61 وقيعا تىركەلسە, ولاردىڭ ءبارى دە ۆاحتاعا كىرەر الدىنداعى تەكسەرىس كەزىندە انىقتالعان ەكەن. ال بيىلعى قاڭتاردان بەرى مۇندا تاعى 35 ادامنان ۆيرۋس انىقتالدى. كەن ورنىندا قىزمەت ەتىپ جۇرگەن جۇمىسشىلار اراسىنان ۆيرۋس شىققان جوق.
قاراشىعاناق پەترولەۋم وپەرەيتينگ كومپانياسىندا دا 2020 جىلى قاۋىپتى ۆيرۋس جۇقتىرعان قىزمەتكەرلەر سانى 86-عا جەتكەن بولاتىن. ال بيىل جاڭا جىل باستالعالى 48 وقيعا تىركەلگەن. ونىڭ 16-سى – ۆاحتاعا كىرەر الدىندا, 12-ءسى – ۆاحتا كەزەگى اياقتالعان كەزدە انىقتالسا, 20 ادام جۇمىس ۋاقىتىنان تىس جۇرگەن كەزىندە تەكسەرىلىپ, ۆيرۋس جۇقتىرعانى بەلگىلى بولعان.
ورال قالاسىنىڭ اكىمى ابات شىنىبەكوۆ ءوڭىردىڭ قىزىل ايماققا ەنۋىنە بايلانىستى قوعامدىق تاماقتانۋ ورىندارىنىڭ جۇمىس كەستەسىن كەشكى 22.00. ساعاتقا دەيىن شەكتەۋدى ۇسىندى. ال وبلىس باسشىسى عالي ەسقاليەۆ الدا كەلە جاتقان مەرەكە كەزىندە كوپشىلىك شارالاردى بارىنشا شەكتەۋدى تاپسىردى.
18 ناۋرىز كۇنى باتىس قازاقستان وبلىستىق سانيتارلىق-ەپيدەميولوگيالىق باقىلاۋ دەپارتامەنتى باسشىسى, وبلىستىڭ باس سانيتارى مۇحامعالي ارىسپاەۆتىڭ جاڭا قاۋلىسى شىعاتىنى بەلگىلى بولدى. ەگەر ءوڭىر «قىزىل ايماقتان» شىقپاسا, كارانتيندىك شارالاردىڭ كۇشەيەتىنى انىق.
باتىس قازاقستان
