كورمە قابىرعاسىنا ىلىنگەن سەكسەن كارتينادا سەكسەن ءتۇرلى پايىم بار. بەينەلەۋ ونەرىنىڭ بارلىق جانرلارىن قامتىعان پەيزاجدار, ناتيۋرمورتتار, سيۋجەتتىك كومپوزيتسيالار زەردەلى كورەرمەندى وي تەرەڭىنە جەتەلەيدى. ەڭ باستىسى, ءار تۋىندىگەر كورمەگە قازاق حالقىنىڭ تاريحى مەن ءداستۇرلى مادەنيەتىنەن سىر شەرتەتىن شىعارمالارىمەن كەلگەن. زاماناۋي سۋرەتشىلەر كوركەمونەر سالاسىنا كيەلى تۇرمىس-سالت ەلەمەنتتەرىن, تاريح پەن ەجەلگى عۇرىپ-نانىمداردى, پەتروگليفتەردى, نىشان-بەلگىلەردى, اتا-اجەلەر وبرازدارىن, تاريحي داۋىرلەردەگى حالىق باتىرلارىنىڭ اسقاق بەينەسىن تۇسىندىرمە سيۋجەتتەرمەن بەرە بىلگەن. شەتەلدىك سۋرەتشىلەردىڭ قازاق جەرىنە دەگەن شىعارماشىلىق كوزقاراستارى دا سان قيلى كورىنىس تابادى. ولار تاقىرىپتى كوبىنە-كوپ ترانستسەندەنتالدى الەم, سۇلۋلىق جانە تابيعات ۇيلەسىمى ارقىلى اشۋعا تىرىسقان.
– ونەر ۇلتقا بولىنبەيدى. ول – ادامزاتقا ورتاق قۇندىلىق. قازاق دالاسىنىڭ كوركەم تابيعاتىنا, كوشپەلىلەر مادەنيەتىنىڭ باي داستۇرىنە قىزىعا قارايمىز. مۇندا شىعارماشىلىق ادامىنا ايرىقشا شابىت سىيلايتىن دۇنيەلەر وتە كوپ. تاۋ مەن دالا دا, وزەن مەن كول دە بار. بۇل سۇلۋلىقتى الدىمەن كوڭىلگە كوشىرىپ الىپ, كەنەپكە تۇسىرگەندە تىپتەن قۇلپىرا تۇسەدى, – دەيدى چەحيالىق تانىمال سۋرەتشى اندرەي لاتىنين.
ورتالىق مەملەكەتتىك مۋزەي ديرەكتورىنىڭ ورىنباسارى عاليا تەمىرتون ەل تاۋەلسىزدىگىنىڭ دوڭگەلەك داتاسىنا وراي بيىل كوپتەگەن كورمە جوسپارلانىپ وتىرعانىن, بۇل تۇرعىدا مادەنيەتتەردى بايلانىستىرۋ ماقساتىندا قازاقستان تاقىرىبىن قىلقالامعا ارقاۋ ەتكەن سۋرەتشىلەردىڭ ىرگەلى جۇمىستارىن جەرگىلىكتى كورەرمەنگە تانىستىرۋعا زور كوڭىل بولىنەتىنىن ايتادى. كورمە كۋراتورلارى قازاقستاننىڭ ونەر قايراتكەرى مارلان نىسانباەۆ پەن ليديا دروزدوۆا دا بۇل پىكىردى قوستادى. ويتكەنى الەمنىڭ عاجايىپ مۇراسىنا بالاناتىن ەلىمىزدىڭ سۇلۋ جەرلەرى سۋرەتكە سۇرانىپ تۇرادى. بۇل ءوز كەزەگىندە قازاق دالاسىنىڭ تۇمسا تابيعاتىن الەمگە تانىتۋعا دا سەپ بولماق.
كورمەنىڭ سيمۆولى – ماڭگىلىك – ۋاقىت, تابيعات جانە ادامنىڭ اجىراماس بىرلىگى, ادامنىڭ رۋحاني قۋاتىن ارتتىرۋ, توقتاۋسىز دامۋ, شىعارماشىلىق جانە جاسامپازدىق يدەيالار. الماتىلىقتار مەن قالا قوناقتارى ايتۋلى ونەر تۋىندىلارىن ناۋرىز ايىنىڭ سوڭىنا دەيىن تاماشالاي الادى.
الماتى
