وبلىستىق پوليتسيا دەپارتامەنتى ەسىرتكى قىلمىسىنا قارسى ءىس-قيمىل باسقارماسىنىڭ باستىعى, پوليتسيا پولكوۆنيگى اسقار جۇمابەكوۆتىڭ ايتۋىنشا, وتكەن جىلى وڭىردە 815 ەسىرتكى قىلمىسى تىركەلىپتى. ونىڭ قاتارىندا 120 دەرەك ەسىرتكى زاتتارىن ساتۋ بولسا, 68 دەرەك ونى اسا ءىرى مولشەردە ساقتاۋ بويىنشا انىقتالعان. سونداي-اق ايماقتا ەسىرتكى كونترابانداسىنىڭ 6 دەرەگى, قۇرامىندا ەسىرتكى زاتى بار وسىمدىكتەردى ءوسىرۋدىڭ 26 دەرەگى جانە ءۇي قابىرعالارىنا گراففيتي-جازۋلاردى جازۋ ارقىلى ەسىرتكى زاتىن ناسيحاتتاۋ مەن جارنامالاۋدىڭ 3 دەرەگى تىركەلگەن. ال زاڭسىز اينالىمنان 3 توننا 277 كيلو ءارتۇرلى ەسىرتكى زاتتارى تاركىلەنگەن.
سونىمەن قاتار جامبىل وبلىسىنىڭ اۋماعىندا شامامەن 251 گەكتار جەردى جىرتۋ, شابۋ, ورتەۋ جانە گەربيتسيدتەردى قولدانۋ ارقىلى 50 توننادان استام جابايى قارا سورا جويىلعان.
دەگەنمەن دە, قوعامدا ەسىرتكى دەيتىن ەستى الاتىن دەرتتىڭ جايىلىپ كەتۋى كوپشىلىكتى الاڭداتاتىن ماسەلە. بۇل ءبىر جاعىنان قۇمارلىق بولسا, ەكىنشى جاعىنان پايدا تابۋدىڭ دا توتە جولى بولىپ تۇرعانى جاسىرىن ەمەس.
ماسەلەن, جۋىردا عانا رەسپۋبليكالىق كەڭ اۋقىمدى «دوپينگ» جەدەل-ىزدەستىرۋ ءىس-شارالارى اياسىندا جامبىل وبلىسىنىڭ پوليتسيا دەپارتامەنتى ەسىرتكى قىلمىسىنا قارسى ءىس-قيمىل باسقارماسىنىڭ قىزمەتكەرلەرى شۋ اۋدانىنان 38 جاستاعى ايەلدى ۇستاعان بولاتىن. تەكسەرۋ بارىسىندا «بوني» اتتى قىزمەتتىك يت كۇدىكتىنىڭ تۇرعىن ءۇيىنىڭ اۋماعىندا ورنالاسقان سارايدان جالپى سالماعى ەكى كيلودان اساتىن وسىمدىك تەكتەس زاتتى تاپقان. تابىلعان ەسىرتكى زاتى تاركىلەنىپ, سوتقا دەيىنگى ساراپتاماعا جىبەرىلگەن. ۇستالعان ايەل كىناسىن مويىنداعان.
جالپى, وسى جىلى ءبىر جارىم ايعا جۋىق ۋاقىت ىشىندە وڭىردە ەسىرتكى بويىنشا قۇقىق بۇزۋشىلىقتىڭ 154 دەرەگى تىركەلىپتى. ونىڭ ىشىندە 34 دەرەك ەسىرتكىنى ساتۋ, 15 دەرەك ەسىرتكى زاتتارىن اسا ءىرى مولشەردە ساقتاۋ بولسا, ەسىرتكى قۇرالدارىنىڭ كونترابانداسى بويىنشا 2 دەرەك جانە 103 تەرىس قىلىقتار انىقتالعان. سونىمەن قاتار جەدەل ىزدەستىرۋ ءىس-شارالارىن جۇرگىزۋ بارىسىندا زاڭسىز اينالىمنان 95 كيلودان استام ءارتۇرلى ەسىرتكى زاتتارى تاركىلەنىپتى. ونىڭ ىشىندە 570 گرامم گەروين, 60 كيلودان استام گاشيش جانە 29 كيلودان استام ماريحۋانا بار.
«ەسىرتكى قىلمىسىنا قارسى ءىس-قيمىل بويىنشا ءبىزدىڭ باستى ماقساتىمىز – وبلىس تۇرعىندارى مەن جاستاردىڭ اراسىندا ناشاقورلىقتىڭ الدىن الۋعا نازار اۋدارۋ. بۇگىنگى تاڭدا كۇندەلىكتى مونيتورينگ جۇرگىزۋ بارىسىندا عالامتور كەڭىستىگىندە سينتەتيكالىق ەسىرتكى زاتتارىن تاراتۋمەن اينالىساتىن 6 عالامتور سايتى انىقتالىپ, بۇعاتتالدى. تاراز قالاسىنىڭ ۇيلەرى مەن عيماراتتارىنىڭ قابىرعالارىندا جازىلعان 260-تان استام گراففيتي-جازۋلارى جويىلدى», دەيدى باسقارما باستىعى اسقار جۇمابەكوۆ.
بۇگىندە ەل اراسىندا ەسىرتكى باقشاسى تۋرالى دا ءجيى ايتىلادى. بۇل ماسەلە توڭىرەگىندە اسقار جۇمابەكوۆ 733 ءتۇپ ەسىرتكى زاتى بار وسىمدىكتەردىڭ جويىلعانىن جەتكىزدى. ال ەسىرتكى قىلمىسىنا قارسى ءىس-قيمىل باسقارماسىنىڭ قىزمەتكەرلەرى «دوپينگ» رەسپۋبليكالىق جەدەل-الدىن الۋ ءىس-شاراسىن وتكىزگەن بەس كۇننىڭ ىشىندە 42 ەسىرتكى قىلمىسىن انىقتاعان. بۇل مالىمەتتەرگە قاراپ, وڭىردە ەسىرتكى ماسەلەسىنىڭ وزەكتى ەكەنىن بايقاۋعا بولادى. ايماقتا قاۋىپتى قۇبىلىستىڭ الدىن الۋ ماقساتىندا دا جوعارى وقۋ ورىندارىندا, كوللەدجدەر مەن مەكتەپتەردە جاستارمەن جيىندار ءجيى ۇيىمداستىرىلۋدا. ءوڭىر پوليتسەيلەرىنىڭ باستاماسىمەن باسقا دا شارالار قابىلدانۋدا. بىراق ەسىرتكى قىلمىسىنىڭ ءجيى تىركەلۋى ءالى دە وڭىردەگى وزەكتى ماسەلەنىڭ ءبىرى رەتىندە قالىپ وتىر.
جامبىل وبلىسى
