كوروناۆيرۋس • 15 ناۋرىز، 2021

قاۋىپتىڭ بەتى قايتقان جوق

245 رەت كورسەتىلدى

اتىراۋدا 9 ناۋرىزدان بەرى مۇعالىمدەرگە كوروناۆيرۋس ينفەكتسياسىنا قارسى ۆاكتسينا سالۋ باستالدى. ماسەلەن، سوڭعى ءۇش كۇندە 605 اتىراۋلىق ۆاكتسينا الدى. ونىڭ ىشىندە 408 پەداگوگ، 183 مەديتسينا قىزمەتكەرى، 14 مەملەكەتتىك قىزمەتشى بار. 

قازىر وڭىردە ءبىلىم سالاسىنىڭ قىزمەتكەرلەرى اراسىندا كوروناۆيرۋسقا قارسى ۆاكتسيناعا قاتىستى ءتۇسىندىرۋ جۇمىستارى جۇرگىزىلىپ جاتىر. قاۋىپتى ۆيرۋسقا قارسى رەسەيلىك «سپۋتنيك V» ۆاكتسيناسىن العاشقىلاردىڭ قاتارىندا وبلىستىق ءبىلىم بەرۋ باسقارماسى باسشىسىنىڭ ورىنباسارى ايناگۇل دۇيسەكەنوۆا، اتىراۋ قالاسىنداعى №16 قاراجىگىتوۆ اتىنداعى ورتا مەكتەپتىڭ ديرەكتورى المابەك ابدولوۆ، № 20 پۋشكين اتىنداعى ورتا مەكتەپ-ليتسەيىنىڭ ديرەكتورى گۇلنار قوجاحمەتوۆا، اتىراۋ قالالىق ءبىلىم ءبولىمى باسشىسىنىڭ ورىنباسارى قايرات قۋانىشەۆ پەن IT مەكتەپ-ليتسەيى ديرەكتورىنىڭ ورىنباسارى ايگۇل سەيىتوۆا سالدىردى.

– كەز كەلگەن ىندەتتەن قورعانۋدىڭ، الدىن الۋدىڭ بىردەن-ءبىر جولى – ۆاكتسينا. بۇعان دەيىن وبلىستىق دەنساۋلىق ساقتاۋ باسقارماسى مەن ەمحانالاردىڭ قىزمەتكەرلەرى كوروناۆيرۋس ينفەكتسياسىنا قارسى ەكپەنىڭ پايداسى، ونىڭ اسەرى تۋرالى اقپاراتتار بەردى. مۇنداي ۆاكتسينا قاۋىپتى ۆيرۋستان قورعايدى. ەكپە العان سوڭ قورقىنىشسىز جۇرۋگە بولادى. ءوزىمنىڭ ساۋلىعىم، جاقىندارىمنىڭ اماندىعى ءۇشىن ۆاكتسينا الدىم، – دەيدى وبلىستىق ءبىلىم بەرۋ باسقارماسى باسشىسىنىڭ ورىنباسارى ايناگۇل دۇيسەكەنوۆا.

ونىڭ ايتۋىنشا، قازىر ءبىلىم بەرۋ سالاسىندا 11 مىڭنان استام ادام جۇمىس ىستەيدى. سولاردىڭ قاتارىنداعى №16 قاراجىگىتوۆ اتىنداعى ورتا مەكتەپتىڭ ديرەكتورى المابەك ابدولوۆتىڭ پىكىرىنە سۇيەنسەك، مۇعالىمدەر ەلدىڭ كەلەشەكتەگى وركەندەۋىنە ۇلەس قوساتىن جاس بۋىن وكىلدەرىمەن تىعىز بايلانىس جاسايدى. «سول سەبەپتەن، «سپۋتنيك V» ۆاكتسيناسىن ەرىكتى تۇردە سالدىرۋعا بەكىندىم. ويتكەنى، بىرىنشىدەن، ءوزىمنىڭ دە، جاقىندارىمنىڭ دا ساۋلىعىن ويلادىم. ەكىنشىدەن، مەكتەپ وقۋشىلارىنا قاۋىپتى ۆيرۋستى تاسىمالداۋشى بولعىم كەلمەيدى. ۆاكتسينا سالدىرعاننان كەيىن جاناما اسەرى بايقالعان جوق» دەيدى ول.

ح.دوسمۇحامەدوۆ اتىنداعى اتىراۋ مەملەكەتتىك ۋنيۆەرسيتەتىنىڭ رەكتورى سالامات يدريسوۆ تا وسىنداي پىكىردى ۇستانادى. ول ءوزى باسقاراتىن ۋنيۆەرسيتەتتىڭ 20 قىزمەتكەرىمەن بىرگە ۆاكتسينا سالدىردى.

– حالقىمىزدا ء«بىرىنشى بايلىق – دەنساۋلىق» دەپ تەگىن ايتپاعان عوي. قاۋىپتى ۆيرۋستىڭ قاۋپىن ۆاكتسينا الۋمەن عانا تەجەي الامىز. سوندىقتان ۆاكتسينا سالدىرۋ ارقىلى ءوزىمنىڭ عانا ەمەس، وتباسىم مەن ارىپتەستەرىمنىڭ دە ساۋلىعىن ساقتاۋعا ۇلەسىمدى قوسۋدى كوزدەدىم. سول ماقساتپەن №1 قالالىق ەمحانادا ۆاكتسينانىڭ ءبىرىنشى دوزاسىن قابىلدادىم. ۆاكتسينادان سوڭ جاناما اسەر بايقالمادى. ەكىنشى دوزادان 21 كۇن وتكەن سوڭ سالدىرامىن، – دەيدى س.يدريسوۆ.

دەگەنمەن، وڭىردە ءالى دە ەپيدەميالىق احۋال تۇراقتالار ەمەس. ماسەلەن، وبلىستىق سانيتاريالىق-ەپيدەميولوگيالىق باقىلاۋ دەپارتامەنتىنىڭ باسشىسى – باس سانيتار دارىگەر مادەنيەت تاناۋوۆتىڭ مالىمەتىنە سۇيەنسەك، بىلتىرعى 28 ناۋرىزدان بيىلعى 11 ناۋرىزدى قوسا العاندا كوروناۆيرۋس ينفەكتسياسىن جۇقتىرعان 17 582 دەرەك تىركەلىپ وتىر. ونىڭ ىشىندە قاۋىپتى ۆيرۋسقا شالدىققان 14 جاسقا دەيىنگى 662 بالا بار. سونداي-اق، 18 جاسقا تولماعان 300 جاسوسپىرىمدە دە كوروناۆيرۋس انىقتالىپتى.

– وتكەن جىلعى ناۋرىزدان بەرى مەديتسينا سالاسىنىڭ 1 073 قىزمەتكەرى قاۋىپتى ۆيرۋسقا شالدىقتى. ارنايى كوميسسيانىڭ شەشىمىمەن 777 قىزمەتكەرگە 2 ملن تەڭگە كولەمىندە وتەماقى تولەندى. وكىنىشكە قاراي، 14 مەديتسينا قىزمەتكەرى كاسىبي مىندەتىن ورىنداۋ كەزىندە كوروناۆيرۋس ينفەكتسياسىن جۇقتىرعاننان قايتىس بولدى. قاۋىپتى ۆيرۋستان قايتىس بولعان ارىپتەستەرىمىزدىڭ تۋىستارىنا 10 ملن تەڭگەدەن استام وتەماقى تولەندى، – دەيدى وبلىستىق دەنساۋلىق ساقتاۋ باسقارماسىنىڭ باسشىسى اسحان بايدۋاليەۆ. – مۇناي كومپانيالارىنىڭ دەمەۋشىلىك كومەگىمەن 60 ملن تەڭگەنىڭ ماتەريالدىق كومەگى كورسەتىلدى. بۇل قارجى ارنايى كوميسسيانىڭ شەشىمىمەن 260 مەديتسينا قىزمەتكەرىنە تولەندى.

ال باس سانيتار دارىگەر م.تاناۋوۆ ءوڭىر تۇرعىندارىن ەپيدەميالىق احۋال تۇراقتالعانعا دەيىن ادامدار كوپ شوعىرلاناتىن جەرگە بارماۋعا شاقىردى. بۇعان اتىراۋداعى ەپيدەميالىق احۋالدىڭ ءالى دە تۇراقتالماي، كۇردەلەنە ءتۇسۋى سەبەپ بولىپ وتىر. سول سەبەپتەن، الەۋمەتتىك اراقاشىقتىقتى، مەديتسينالىق بەتپەردە تاعۋ رەجىمىن ۇستانۋ ساقتالا بەرەدى. ادامدار كوپ جينالاتىن جەرگە بارماۋعا دا كەڭەس بەرىلدى.

–  وڭىردە كۇن سايىن كوروناۆيرۋس ينفەكتسياسىن جۇقتىرۋ دەرەگى ازايماي وتىر. 14 ناۋرىزدا كورىسۋ مەرەكەسى باستالدى. ودان سوڭ ناۋرىز مەرەكەسى دە جاقىندادى. وسىعان بايلانىستى تۇرعىندارعا جاسى ۇلكەن ادامداردى تەلەفونمەن، ۆيدەوقوڭىراۋ شالۋ ارقىلى قۇتتىقتاۋعا كەڭەس بەردىك. ويتكەنى، جاسى ۇلكەن قاريالار قاۋىپتى ۆيرۋس جۇقتىرۋ مۇمكىندىگى باسىم توپقا جاتادى. ونداي ادامداردىڭ كوپشىلىگىندە سوزىلمالى سىرقاتى بولۋى مۇمكىن، – دەيدى باس سانيتار دارىگەر. – سول سەبەپتەن، اركىم الدىمەن ءوزىنىڭ، اعايىن-تۋىسىنىڭ ساۋلىعىن ساقتاۋدى ويلاعانى ءجون. ارينە، ەجەلدەن كەلە جاتقان كورىسۋ مەرەكەسىندە ۇلكەندەردى سىيلاۋ، ولارعا قۇرمەت كورسەتىپ، ىزەت تانىتۋ سەكىلدى قۇندىلىقتاردى جوعالتپاۋىمىز قاجەت-اق. الايدا ءار اۋلەتتەگى سىيلى قاريالاردىڭ امان جۇرگەنىن قالايتىن بولساق، بۇل جولى ولارعا ارنايى بارىپ، قول بەرىپ كورىسۋدى ازىرگە قويا تۇرعاننىڭ سوكەتتىگى جوق. جاسى ۇلكەن ادامدار تەلەفونمەن، ۆيدەوقوڭىراۋمەن قۇتتىقتاعاندى تۇسىنىستىكپەن قابىلدايدى دەپ ويلايمىن. قازىرگى ەپيدەميالىق احۋال ءبىزدى وسىنداي قادامعا بارۋعا ءماجبۇر ەتىپ وتىر.

وبلىستىق دەنساۋلىق ساقتاۋ باسقارماسى ءباسپاسوز قىزمەتىنىڭ مالىمەتىنشە، قازىر وڭىردەگى جەتى اۋرۋحانادا ورتالىقتاندىرىلعان وتتەگى ستانساسى جۇمىس ىستەپ تۇر. ونىڭ ەكەۋى قۇرمانعازى مەن قىزىلقوعا اۋدانىندا ىسكە قوسىلدى. بۇعان قوسا اتىراۋ قالاسىنداعى وبلىستىق پەريناتالدىق جانە كارديولوگيالىق ورتالىقتاردا، وبلىستىق اۋرۋحانا مەن №2 ينفەكتسيالىق، سونداي-اق بىلتىر اشىلعان ءمودۋلدى ينفەكتسيالىق اۋرۋحانادا وتتەگى ستانساسى بار. ەندى سەگىزىنشى وتتەگى ستانساسى يندەر اۋداندىق اۋرۋحاناسىندا جۇمىس ىستەي باستادى. الداعى ۋاقىتتا جىلىوي اۋدانىنىڭ ورتالىعى – قۇلسارى قالاسىندا سالىنىپ جاتقان ءمودۋلدى ينفەكتسيالىق اۋرۋحاناعا دا وتتەگى ستانساسىن ورناتۋ جوسپارلانىپ وتىر.

سوڭعى جاڭالىقتار

دوللار ارزاندادى

قارجى • كەشە

ۇقساس جاڭالىقتار