الماتى قالاسى قازىر ەپيدەميالىق جاعداي بويىنشا "قىزىل ايماقتا" تۇر. سوڭعى تاۋلىكتە مەگاپوليستە كوروناۆيرۋس ينفەكتسياسىن جۇقتىرۋدىڭ 342 جاڭا جاعدايى تىركەلدى. پاندەميامەن كۇرەس اياسىندا قالادا حالىقتى ۆاكتسينالاۋ جۇمىستارى بەلسەندى جۇرگىزىلىپ جاتىر. ءبىرىنشى كەزەڭدە دارىگەرلەر مەن مەديتسينا قىزمەتكەرلەرىنەن 1750 ادام ۆاكتسينالاندى. ەكىنشى كەزەڭدە ەكپەنى 3300 مەديتسينا قىزمەتكەرى, 955 پوليتسيا قىزمەتكەرى مەن 523 مۇعالىم الدى.
مەديتسينا عىلىمدارىنىڭ دوكتورى, س.اسفەندياروۆ اتىنداعى قازۇمۋ جۇقپالى جانە تروپيكالىق اۋرۋلار كافەدراسىنىڭ پروفەسسورى راۆيليا ەگەمبەرديەۆا وڭىرلىك كوممۋنيكاتسيالار قىزمەتىندە بەرگەن سۇحباتىندا ۆاكتسينانىڭ جوعارى يممۋنوگەندىك الەۋەتى بار ەكەنىن, ونىڭ كوروناۆيرۋستىق ينفەكتسياعا قارسى انتيدەنەلەر شىعاراتىنىن اتاپ ءوتتى.
ناۋقاستان الىنعان انتيدەنەلەر مەن ۆاكتسينادان الىنعان انتيدەنەلەردىڭ ايىرماشىلىعى نەدە؟ ۆاكتسينالاۋدىڭ انتيدەنەلەرى تابيعي انتيدەنەلەردەن قانشا ەسە كۇشتى؟
كوروناۆيرۋستىق ينفەكتسيادان كەيىن يممۋنيتەت قالىپتاسادى, بىراق ول ۇزاققا سوزىلمايدى – قايتادان اۋىرعان جاعدايلار بار. كوروناۆيرۋس ينفەكتسياسىن جۇقتىرعاندار 3 ايدان كەيىن قايتا اۋرۋى مۇمكىن. سوندىقتان مەن ينفەكتسيادان كەيىن يممۋنيتەتتىڭ قانشالىقتى ۇزاق ەكەنىن ايتا المايمىن جانە ونى عالىمدار دا ءالى ناقتى ايتا الماي وتىر, بىراق ەڭ از كەزەڭ – 3 اي. قازاقستان اۋماعىندا قولدانىلاتىن سپۋتنيك V ۆاكتسيناسى اعزانى 1 جىلعا دەيىن يممۋنيتەتپەن قامتاماسىز ەتەدى. قازىر رەسەيدە جاسالعان باسقا ۆاكتسينالار بەلگىلى جانە عالىمداردىڭ ايتۋىنشا, بۇل ۆاكتسينالار 3 جىلعا دەيىن يممۋنيتەتتى قامتاماسىز ەتەدى, بىراق مەنىڭ ويىمشا, يممۋنيتەتتىڭ قانشالىقتى ۇزاق ساقتالاتىنى تەك ۆاكتسينالاۋ جۇرگىزگەننەن كەيىن ناقتى بەلگىلى بولادى.
قالادا ۆاكتسينالالۋ جوسپارلى تۇردە جۇرگىزىلىپ جاتىر. سوندا قالا تۇرعىندارى بەتپەردەسىز جۇرە الا ما؟ كارانتيندىك شارالاردىڭ ماڭىزدىلىعىن تاعى دا ءتۇسىندىرىپ بەرىڭىزشى.
ايتا كەتۋ كەرەك, حالىقتى ۆاكتسينالاۋدىڭ تەك 70%-ى ءتيىمدى دەپ سانالادى جانە كوروناۆيرۋستىق ينفەكتسيا اۋرۋىنىڭ تىركەلۋىن توقتاتۋعا ىقپال ەتەدى, الەم ۆاكتسينالاۋدىڭ مۇنداي دەڭگەيىنە ءالى جەتكەن جوق. قازاقستان رەسپۋبليكاسىندا ءوزىڭىز بىلەسىز, ۆاكتسينالاۋ تەك 1 اقپاننان باستالدى جانە ءبىز ۆاكتسينالاۋدى تولىق قامتاماسىز ەتپەدىك. سوندىقتان بەتپەردە رەجيمى, 1,5 مەترلىك قاشىقتىق سياقتى ەپيدەمياعا قارسى شارالاردى قاتاڭ ساقتاۋ قاجەت. ايتا كەتەرلىگى, 2 ۆاكتسينا ەكپەسىن العان تۇلعالاردىڭ ەپيدەمياعا قارسى شارالاردى تاعى 14 كۇن ساقتاۋى ءتيىس ەكەندىگىن اتاپ وتكىم كەلەدى.
بۇگىنگى ەپيدەميالىق جاعدايدى ەسكەرە وتىرىپ, قالا تۇرعىندارىنا ۇسىنىستار.
ەپيدەميالىق جاعداي ۇنەمى وزگەرۋدە. بۇگىنگى تاڭدا الماتى قالاسى "قىزىل ايماقتا", بۇل حالىقتىڭ قايتادان بوساڭسىپ, كوروناۆيرۋستىق ىندەتتەن قۇتىلدىق دەپ ويلايتىنىن بىلدىرەدى. مەن ينفەكتسيونيست رەتىندە كوروناۆيرۋستىق ينفەكتسيامەن اۋىراتىن ناۋقاستار ءالى دە كوپ ەكەنىن, ونىڭ ىشىندە اۋىر حالدە جاتقاندار بار ەكەنىن, دەرتتىڭ اسقىنۋى ولىممەن اياقتالعان جاعدايلار دا بار ەكەنىن مالىمدەيمىن. ءبىزدىڭ ەلىمىزدىڭ ازاماتتارىنا جۇگىنە وتىرىپ, وتىنە وتىرىپ سۇرايتىنىم – بەتپەردە تاعىڭىزدار, قولدارىڭىزدى مۇقيات جۋىڭىزىزدار, قاشىقتىقتى ساقتاڭىزدار, اۋرۋدىڭ العاشقى بەلگىلەرى پايدا بولعان كەزدە دەرەۋ جەرگىلىكتى دارىگەرگە حابارلاسىڭىزدار.
بۇگىنگى تاڭدا بۇل الدىن-الۋ شارالارى ءتيىمدى ءادىس بولىپ تابىلادى جانە, ارينە, ۆاكتسيناتسيانىڭ ءرولى زور, ءبىز وعان ۇلكەن ءۇمىت ارتامىز, دەدى.
