حالىقارالىق دزيۋدو فەدەراتسياسىنىڭ (IJF) ەرەجەسىنە سايكەس, جارىس جەڭىمپازدارى مەن جۇلدەگەرلەرىنە وليمپيادالىق رەيتينگتە ۇپاي ۇلەستىرىلەدى. اتاپ ايتقاندا, جەڭىمپازدار 100 ۇپايعا يە بولسا, ەكىنشى ورىنعا – 70, ءۇشىنشى ورىنعا – 50 ۇپايدان قوسىلادى.
IJF كۇنتىزبەسى بويىنشا وتكەن باسەكەدە حالىقارالىق دزيۋدو فەدەراتسياسىنىڭ جارىس بويىنشا ديرەكتورى ليسا الان, حالىقارالىق دزيۋدو فەدەراتسياسىنىڭ سپورتتىق كوميسسيانىڭ حاتشىسى ابدۋللو مۋرادوۆ جانە ازيا دزيۋدو وداعىنىڭ دامۋ بويىنشا ديرەكتورى دەراكشان موحامماد قوناق بولىپ, جارىستىڭ ۇيىمداستىرىلۋىن جوعارى باعالادى.
«حالىقارالىق دزيۋدو فەدەراتسياسىنىڭ جانە ونىڭ پرەزيدەنتى ماريۋس ۆيزەردىڭ اتىنان تۇرار جولدىباەۆتى ەسكە الۋعا ارنالعان ازيا دزيۋدوسىنا قاتىسۋ ءبىز ءۇشىن ۇلكەن مارتەبە. ءبىز قازاقستان ۇلتتىق وليمپيادالىق كوميتەتىنە, قازاقستان دزيۋدو فەدەراتسياسىنا, ماڭعىستاۋ وبلىستىق اكىمشىلىگىنە, ماڭعىستاۋ وبلىسىنىڭ دزيۋدو فەدەراتسياسىنا جانە جەرگىلىكتى دەمەۋشىلەرگە وسى ءىس-شارانى وتكىزۋگە ايانباي تەر توگىپ, قولداۋ كورسەتكەندەرى ءۇشىن شەكسىز العىس ايتامىز. جارىستى جوعارى دارەجەدە وتۋىنە كومەكتەسكەن بارلىعىنا كوپ راحمەت. ءبىز قازاق حالقىنىڭ, اسىرەسە اقتاۋ قالاسىنىڭ تۇرعىندارىنىڭ ەرەكشە قوناقجايلىلىعىن باعالايمىز», دەدى حالىقارالىق دزيۋدو فەدەراتسياسىنىڭ جارىس بويىنشا ديرەكتورى ليسا الان.
ازيا اشىق كۋبوگى حالىقارالىق دزيۋدو فەدەراتسياسىنىڭ كۇنتىزبەسى بويىنشا ءۇشىنشى جىل قاتارىنان ۇيىمداستىرىلىپ وتىر. قازاقستان دزيۋدو فەدەراتسياسىنىڭ باس حاتشىسى اسحات جيتكەەۆ بيىلعى جارىستىڭ ماڭىزى زور ەكەنىن اتاپ ءوتتى.
«وزدەرىڭىز بىلەتىندەي, جىل وتكەن سايىن جارىستىڭ دارەجەسى كوتەرىلىپ كەلە جاتىر. ت.جولدىباەۆتى ەسكە الۋعا ارنالعان تۋرنير 2017 جىلى تۇڭعىش رەت ازيا دزيۋدو وداعى اياسىندا وتكىزىلدى. حالىقارالىق ماماندار تاراپىنان جوعارى باعالانعاندىقتان 2018 جىلدان باستاپ حالىقارالىق دزيۋدو فەدەراتسياسىنىڭ كۇنتىزبەسىنە ەنگىزىلدى. حالىقارالىق دزيۋدو فەدەراتسياسى مەن قازاقستان دزيۋدو فەدەراتسياسىنىڭ, سونداي-اق, ماڭعىستاۋ وبلىسى دزيۋدو فەدەراتسياسى تىعىز-قارىم قاتىناس ورناتىپ, ىنتىماقتاستىقتا اتقارعان جۇمىسىنىڭ ارقاسىندا جارىستىڭ مارتەبەسى كوتەرىلدى. جوسپار بويىنشا, وسى ازيا كۋبوگى ءداستۇرلى تۇردە جازدا وتكىزىلەتىن. رەيتينگتىك جارىس بولعاندىقتان بيىل وليمپيادانىڭ الدىندا وتكىزۋدى دۇرىس دەپ شەشتىك. جەڭىمپازدار مەن جۇلدەگەرلەرگە وليمپيادالىق رەيتينگتە ۇپاي بەرىلەدى. قازىر كەز كەلگەن سپورتشى ءۇشىن رەيتينگتەگى ءاربىر ۇپاي ماڭىزدى», دەدى باس حاتشى.
سپورتشىلار دا بيىلعى باسەكەنىڭ سالماعى ارتقانىن جاسىرمادى. ازيا اشىق كۋبوگىنىڭ 2021 جىلعى جەڭىمپازى ماعجان شامشادين قارسىلاستارىنىڭ وسال بولماعانىن جەتكىزدى.
«جاسىراتىنى جوق, ءبىز ءبارىمىز كۇرەستى ساعىنىپ ءجۇرمىز. پاندەميا كەزىندە رەسپۋبليكالىق جارىستار از, الەمدىك باسەكەلەردە وليمپياداعا ليتسەنزيا تارتىستى ءوتىپ جاتىر. بۇگىنگى ۇيىمداستىرىلعان باسەكە ءبىز سياقتى جاس سپورتشىلار ءۇشىن شەبەرلىگىن شىڭداپ, باق سىناۋعا وتە جوعارى مۇمكىندىك بولدى. وزبەكستان مەن رەسەي قۇرامالارىنىڭ قارسىلاستارى وڭاي بولعان جوق. قازاقستاندىق سپورتشىلار ءۇشىن قازاقستاننىڭ «ماستەرس» ءتۋرنيرى بولدى. الەمدىك «ماستەرستە» رەيتينگتەگى ۇزدىك 16 دزيۋدوشى قاتىسسا, قازاقستاندا دا سولاي تەك كىل مىقتىلار جينالدى», دەيدى ماعجان.
ايتا كەتەرلىگى, ماعجان شامشادين 60 كەلىگە دەيىنگى سالماقتا 2020 جىلدىڭ جەلتوقسانىندا قازاقستان چەمپيوناتى اتانعان.
