مادەنيەت جانە سپورت مينيسترلىگىنىڭ باستاماسىمەن جۇزەگە اسقان الەۋمەتتىك ماڭىزى زور قايىرىمدىلىق جوباسى اياسىنداعى ءىس-شارالاردى تاماشالاۋعا كوپ بالالى وتباسىلاردىڭ بالدىرعاندارى شاقىرىلدى. مادەنيەت جانە سپورت ءمينيسترى اقتوتى رايىمقۇلوۆا مالىمدەگەندەي, جاڭا جوبا كورىسۋ كۇنىنىڭ ءتالىم-تاربيەلىك سيپاتىن كورسەتىپ, وسكەلەڭ ۇرپاققا ونەگەسى مول تۋىندىلاردى ۇسىنادى. «بارشا قازاقستاندىقتاردى اتا-بابامىزدىڭ ەجەلدەن كەلە جاتقان مەرەكەسى – كورىسۋ كۇنىمەن قۇتتىقتايمىن. بۇل مەرەكە – بارشا جۇرت ءبىر-بىرىمەن قاۋىشىپ, جاستار ۇلكەندەردىڭ باتاسىن الىپ, قىستان امان-ەسەن شىققانىن مەرەكەلەيتىن كۇن. ءبىز دە بۇگىن ءوسىپ كەلە جاتقان جاس بالدىرعاندارعا وسى ءداستۇرىمىزدى كورسەتۋدەمىز. بارشا قازاقستاندىقتارعا دۇنيە جۇزىندە ءورشىپ تۇرعان ىندەتتەن امان-ەسەن وتەيىك دەپ تىلەگىم كەلەدى. كورىسۋ كۇنى – دوستىقتىڭ, قايىرىمدىلىق پەن جاقسىلىقتىڭ مەرەكەسى. سوندىقتان بۇگىنگى ء«داستۇرىم – اسىل قازىنام» اتتى جوبانى ءبىز كوپ بالالى وتباسىلاردان شىققان كىشكەنتاي بالدىرعاندارعا ارنادىق», دەدى مينيستر.
جوبا حالقىمىزدىڭ بۇرىننان كەلە جاتقان «كورىسۋ» داستۇرىنەن باستاۋ الدى. كورىسۋ ءداستۇرىنىڭ ەرەكشەلىگى مەن تاربيەلىك ءمانىن ءىس-شاراعا جينالعان زيالى قاۋىم وكىلدەرى مەن قوعام قايراتكەرلەرى ءتۇسىندىرىپ, جاس بالدىرعاندارعا ۇلگى كورسەتتى. بۇل مەرەكەنى بالالاردىڭ كوزقۋانىشىنا اينالدىرۋ ماقساتىندا شاراعا كەلگەن قوناقتار بارشا بالدىرعاندارعا كامپيت, جەنت, قۇرت, ىرىمشىك سىندى ۇلتتىق تاعامداردان تۇراتىن ءتاتتى سىيلىقتار جيناعىن تابىستادى. قوناقتار قاتارىندا سەنات دەپۋتاتى نۇرتورە ءجۇسىپ, ءماجىلىس دەپۋتاتتارى بەكبولات تىلەۋحان, ازات پەرۋاشەۆ, پارلامەنت ءماجىلىسىنىڭ الەۋمەتتىك-مادەني دامۋ كوميتەتىنىڭ حاتشىسى دارحان مىڭباي جانە ايگۇل مۇكەي, ماقسات تولىقباي سىندى بەلگىلى تەلەجۇرگىزۋشىلەر مەن تانىمال بلوگەرلەر بولدى.
«قازاقكونتسەرت» مەملەكەتتىك ۇيىمىنىڭ ديرەكتورى جەڭىس سەيدوللا ۇلىنىڭ ايتۋىنشا, ۇلىستىڭ ۇلى كۇنى بالالاردىڭ اسىعا كۇتەتىن مەرەكەسى بولىپ قالىپتاسۋ كەرەك. «حالقىمىز بۇرىننان-اق كورىسۋ كۇنىن مەيىرىمدىلىك پەن قامقورلىق, بىرلىك پەن كەلىسىم سىندى ماڭگىلىك قۇندىلىقتاردى دارىپتەيتىن مەيرام رەتىندە تويلاعان. وسىعان وراي, ناۋرىزدىڭ باستاۋى – امال مەرەكەسىندە ءبىز مەيىرىمدىلىك شۋاعى مەن جۇرەك جىلۋىن سىيلاۋ ءداستۇرىن باستادىق. بۇگىنگى جوبا سونىڭ دالەلى. بۇل جوبا ارنايى جاس بالدىرعاندار ءۇشىن ۇيىمداستىرىلىپ وتىر. بالالار – ەلىمىزدىڭ بولاشاعى. ناۋرىز مەرەكەسىنىڭ باستاۋى وسىنداي داستۇرگە ساي تويلانىپ, بالالاردىڭ ساناسىنا كىرىكسە, ناعىز حالىقتىق مەيرامعا اينالادى», دەدى ول.
كونتسەرتتە «استانا سازى» مەملەكەتتىك فولكلورلىق ءانسامبلى مەن قۇرماش ماحان, ارداق بالاجانوۆا, قۇماربەك قالقاتاي, دىنيسلامبەك جايلاۋباي, گۇلنار كوشەنوۆا, ءبىرجان ايتاحمەتوۆ, ايدانا قارجاۋباەۆا سىندى بەلگىلى انشىلەر ونەر كورسەتتى. كونتسەرتتىك باعدارلاماعا كورەرمەن ءسۇيىپ تىڭدايتىن حالىق اندەرى مەن زاماناۋي تانىمال تۋىندىلار ەنگەن. مەرەكەلىك ءان مەن كۇي شاشۋدان كەيىن بالدىرعاندار ناۋرىز كوجەدەن ءدام تاتىپ, «استانا ميۋزيكل» مەملەكەتتىك تەاترى دايىنداعان «ناۋرىزبەكتىڭ وقيعاسى» ينتەراكتيۆتىك ەرتەگىسىن تاماشالادى. زاماناۋي فورماتتاعى قويىلىم جاس بالدىرعانداردىڭ ۇلتتىق قۇندىلىقتار مەن فولكلورلىق مۇراعا قىزىعۋشىلىعىن ارتتىرۋعا باعىتتالعان.
جوبا وتاندىق انيماتسيالىق فيلمدەردىڭ كورسەتىلۋىمەن اياقتالدى. بالالار «QAZAQSTAN» وكز ۇلكەن زالىندا «قازاقفيلم» اق ۇسىنعان «كۇلتەگىن» ءمۋلتفيلمىن تاماشالاپ, كوڭىلدى ۋاقىت وتكىزدى. ءىس-شارا سوڭىندا بالالار مەن اتا-انالار ۇيىمداستىرۋشىلارعا ءوز العىستارىن جەتكىزدى.
