سونىڭ ءبىرى – قازاق حالقىندا قالىپتاسقان, 14 ناۋرىزدان باستاۋ الاتىن «كورىسۋ كۇنى». قار كەتە باستاعان, جول اشىلعان, كوكتەمنىڭ نۇرى توگىلىپ تۇرعان شاقتا اۋىل-اۋىلداعى اعايىن, جەرلەستەر ەرتە تۇرىپ, تاڭ اتىسىمەن جاسى ۇلكەندەرگە سالەم بەرەدى. كورشىلەر, جاقىندار ءبىر-بىرىنە «جاسىڭ قۇتتى بولسىن!», «جاسىڭا جاس قوسىلىپ, عۇمىرىڭ ۇزاق بولعاي!» دەپ تە تىلەك, نيەت ءبىلدىرىپ جاتادى. بۇل كۇنى بۇرىنعى وكپە-رەنىشتەر بولسا كەشىرىلەدى, تۇسىنبەۋشىلىك ۇمىتىلادى, حالىق كوتەرىڭكى كوڭىلمەن جۇرەدى. تازا كيىمدەرىن كيىپ, ءبىر-بىرىنە قوناققا بارادى, كورىسىپ جاقسى تىلەكتەر ايتادى. «ايعا جەتپەس اسىڭدى, اۋىلداستان اياما» دەپ, ءدامدىسىن قازانعا سالىپ, قوناق كۇتەدى.
بۇل مەرەكەنىڭ تاعى ءبىر ەرەكشىلىگى – ول ءبىر كۇنمەن شەكتەلىپ قالمايدى, مۇمكىندىگىنشە جىل بويى جالعاسا بەرەدى. جالپى, بۇل ءداستۇر-مەرەكە ەرتە زاماننان حالقىمىزدا بولعان, بىراق وتكەن عاسىردا, كەڭەس كەزىندە ناۋرىز مەرەكەسى سياقتى تىيىم سالىنۋى سەبەبىنەن ۇمىتىلعان سالتتاردىڭ ءبىرى. ەلىمىز ەگەمەندىگىن الىپ, تاۋەلسىز مەملەكەت بولعاننان كەيىن ولگەنىمىز ءتىرىلىپ, جوعالعان سالتتارىمىز قايتا جاندانىپ, ورىن-ورنىنا كەلە باستادى. بۇگىن بۇكىل ەلىمىز بۇل مەرەكەنى تويلاۋدى باستاپ جىبەردى. بىراق, وكىنىشكە قاراي الەمدى شارپىعان كەسەلگە بايلانىستى اعايىن-تۋىس, دوس-جولداستار ءبىر-بىرىنە كوپتەپ بارۋعا, جۇزبە-ءجۇز كەزدەسۋگە مۇمكىنشىلىك بولماي تۇر. دەگەنمەن, سوعان قاراماستان, ءتۇرلى جەلىلەر ارقىلى قۇتتىقتتاۋلار جولداۋدا, جاقسى نيەت بىلدىرۋدە. جانە ءبىر تاڭ قالارلىق جاعداي, بۇگىن ءبىزدىڭ كورىسۋ مەرەكەسىمەن قاتار بۇكىل پراۆوسلاۆيە قاۋىمى «كەشىرىم جەكسەنبىسىن» (پروششەننوە ۆوسكرەسەنە) اتاپ ءوتىپ جاتىر ەكەن. قازاقستاندا تۇراتىن كوپتەگەن ەتنوس وكىلدەرىنىڭ ءبىر-ءبىرىنىڭ مەرەكەلەرىن تويلاۋى, اتاپ ءوتۋى ەلىمىزدەگى بىرلىك پەن تاتۋلىقتىڭ نەگىزگى نىشاندارىنىڭ ءبىرى دەپ ايتساق بولادى. اۋىز بىرلىگىمىز ماڭگىلىك بولسىن.
كەزدەسۋ, كورىسۋگە بايلانىستى ءبىر-ەكى مىسال كەلتىرە كەتەيىن. ءبىزدىڭ ەلباسى كىتاپحاناسى جىلدىڭ باسىنان باستاپ, سونىڭ ىشىندە وسى ناۋرىز ايىنىڭ باسىندا كارانتين تالاپتارىن ساقتاي وتىرىپ, بىرنەشە كەزدەسۋلەر وتكىزدى. اعىمداعى جىلدىڭ 4 ناۋرىزىندا پرەزيدەنتتىڭ «بولاشاق» باعدارلاماسىمەن وقۋ تامامداعان بىلىكتى وتىز تۇلەك» جوباسى وسى مەيرام قارساڭىندا ءبىزدىڭ مىقتى قارىنداستارىمىزدىڭ جەتىستىكتەرىنە ارنالدى. وعان ينتەراكتيۆتى جولمەن ەلىمىزدىڭ كوپتەگەن وقۋ ورىندارىنىڭ ستۋدەنتتەرى, شەت ەلدە وسى باعدارلاما اياسىندا وقىپ جۇرگەن تۇلەكتەر ونلاين قاتىستى. ءبىر-ءبىرىن كوپتەن كورمەگەن, كىتاپحاناعا كەلگەن تۇلەكتەردىڭ قۋانىشىندا شەك بولمادى دەپ ايتسا ارتىق ەمەس. شۇيىركەلەسىپ سويلەسكەن, جاڭالىقتارمەن ءبولىسىپ ارقا-جارقا بولىپ جاتقان كەيىپتەرى كورگەندەردى قۋانتتى.
سونداي-اق وسى كيەلى شاڭىراق استىندا «ەلىمىزدىڭ ماقتانىشى» جوباسى اياسىندا وليمپيادا جانە الەم چەمپيوندارىمەن, جۇلدەگەرلەرىمەن كەزدەسۋ وتكىزىلدى. ەلىمىزدى الەمگە تانىتىپ, كوك تۋىمىز بەن ءانۇرانىمىزدى جەر شارىنىڭ تالاي سپورت الاڭدارىندا اسقاقتاتقان سپورتشىلار وزدەرىنىڭ ماڭداي تەر, قاجىر-قايراتىمەن العان مەدالدارىن, سپورت قۇرالدارىن اق نيەتتەرىمەن ەلباسىنىڭ مۋزەيىنە تاپسىردى. قيىندىققا قاراماستان, وسىنداي ءىس-شارا وتكىزىلگەنىنە ريزاشىلىقتارىن ءبىلدىردى, ەلباسىنا جانە مەملەكەت باسشىسىنا العىستارىن جولداپ سۇحبات بەرىپ جاتتى. ءبىز كوپتەن كەزدەسە الماي جۇرگەن اتلەتتەردىڭ كورىسۋ قۋانىشىنا ءتانتى بولدىق, قۋانىشتارىنا قۋاندىق, العىسىمىزدى ايتتىق. تۇڭعىش پرەزيدەنت – ەلباسى كىتاپحاناسى الدىمىزدا دا كوپتەگەن كەزدەسۋ, كورىسۋدى جوسپارلاپ وتىر. توسىننان كەلگەن ىندەتتەن تەزىرەك ايىعىپ, جالپى حالقىمىزعا قۇشاق اشىپ كورىسۋدى جازسىن, جاقسى كۇندەر تەزىرەك كەلسىن دەپ تىلەيمىز! مەرەكەلەر كوپ بولسىن!
ەرسۇلتان بەكتۇرعانوۆ,
قازاقستان رەسپۋبليكاسىنىڭ تۇڭعىش پرەزيدەنتى – ەلباسى كىتاپحاناسىنىڭ ارنايى جوبالار قىزمەتىنىڭ جەتەكشىسى
