قوعام • 12 ناۋرىز، 2021

حالىقتى تولىق ۆاكتسينالاۋ ارقىلى «ۇجىمدىق يممۋنيتەت» قالىپتاسادى

بۇگىن ورتالىق كوممۋنيكاتسيالار قىزمەتىندە دەنساۋلىق ساقتاۋ مينيسترلىگىنە قاراستى مەكەمە وكىلدەرىنىڭ قاتىسۋىمەن بريفينگ ءوتتى. وندا دارىگەرلەر كوروناۆيرۋس ينفەكتسياسىنا قارسى ۆاكتسيناتسيا جانە ونكولوگيالىق ناۋقاستاردى ۆاكتسينالاۋدىڭ ەرەكشەلىكتەرى تۋرالى ايتتى، دەپ حابارلايدى Egemen.kz.

Marzhan Tileubekova

قوعامدىق دەنساۋلىق ساقتاۋ ۇلتتىق ورتالىعى ديرەكتورىنىڭ ورىنباسارى ايناگۇل قۋاتباەۆا ايتۋىنشا، الەمدە ادامعا قاۋىپتى جۇقپالى اۋرۋلاردىڭ بارلىعىنا قارسى ۆاكتسينا جوق. ۆاكتسينانىڭ تيىمدىلىگى 50 پايىز عانا بولعان كۇندە دە ادام ءوز ءومىرىن ساقتاپ قالۋدان باس تارتپاۋى كەرەك. ەكپەنىڭ كومەگىمەن اۋىر اسقىنۋلاردىڭ، مۇگەدەكتىك، ءتىپتى ءولىمنىڭ الدىن الۋعا بولادى. حالىقتى تولىق ۆاكتسينالاۋ ارقىلى «ۇجىمدىق يممۋنيتەت» قالىپتاسادى، اۋرۋدى تاسىمالداۋ دەڭگەيى تومەندەيدى.

«بۇگىندە پلانەتانىڭ 99،9% پوليوميەليتتەن، ال قازاقستان بەزگەكتەن ارىلدى. قىزىلشا مەن قىزامىق، پاروتيت ۆيرۋستارىنان دا تۇبەگەيلى قۇتىلاتىن كۇن جاقىن. ەگەر ۇجىمدىق يممۋنيتەت قالىپتاستىرۋ ءۇشىن جاپپاي ۆاكتسينا سالدىرساق، ارقايسىمىزدىڭ Covid-19 پاندەمياسىن توقتاتۋعا ۇلكەن ۇلەس قوسقانىمىز بولار ەدى»، دەدى ايناگۇل قۋاتباەۆا.

قازاقستاندا قازىر ناۋقاس سانى ازايعانىمەن، الايدا اۋرۋحانالارداعى جاعدايى اۋىر پاتسيەنتتەر قاتارى وسۋدە. ويتكەنى كوروناۆيرۋس ينفەكتسياسى سوزىلمالى اۋرۋلاردى اسقىندىرۋدا. ال ونىڭ اعزاعا سالدارى اۋىر ەكەنى بەلگىلى.

«SARS-CoV-2 كوروناۆيرۋسى تۇماۋ ۆيرۋسى سياقتى مۋتاتسياعا ۇشىرايدى. ەگەر ءبىز تۇماۋعا قارسى ۆاكتسينانى مىسالعا الساق، وندا وندىرۋشىلەر ءار 6 اي سايىن ۆاكتسينالاردىڭ قۇرامىن ۋاقىتقا جانە ايماققا قاراي تۇماۋ شتاممىنا بايلانىستى وزگەرتەدى. ەگەر SARS-CoV-2 ۆيرۋسى ماۋسىمدىق ۆيرۋستار ساناتىنا اۋىسسا، وندا وندىرۋشىلەر ەپيدەميالىق بەلسەندى شتاممعا بايلانىستى وڭتۇستىك جارتى شاردا نەمەسە سولتۇستىك جارتى شاردا ۆاكتسينا قۇرامىن وزگەرتەدى»، دەدى فتيزيوپۋلمونولوگيا ۇلتتىق عىلىمي ورتالىعى ديرەكتورىنىڭ كلينيكالىق جانە عىلىمي جۇمىستار جونىندەگى ورىنباسارى ءلاززات ەراليەۆا.

كۇننىڭ ماڭىزدى جانە وزەكتى جاڭالىقتارىن «ەگەمەن قازاقستان» تەلەگرام كانالىنان وقىڭىز