ۇجىمدىق سايىستا قازاقستان قۇراماسىنىڭ سپورتشىلارى ءوز جانكۇيەرلەرىن قۋانتا المادى. ءۇش سەكىرۋدىڭ قورىتىندىسى بويىنشا ءبىزدىڭ سپورتشىلار 211.62 ۇپاي جيناپ, جەتى قۇرامانىڭ ىشىندەگى سوڭعى جەتىنشى ورىندا قالىپ قويدى. ءسويتىپ ءبىزدىڭ جىگىتتەر فينالدان تىس قالدى. ال نەگىزگى فينالعا ۇزدىك ناتيجە كورسەتكەن ءتورت قۇراما شىقتى. باس جۇلدە ءۇشىن وتكەن باسەكەدە ۇپايدان شاشاۋ شىعارماعان رەسەيلىك سپورتشىلار توپ جاردى. ەكىنشى ورىن شۆەيتساريا سپورتشىلارىنا, ءۇشىنشى ورىن اقش قۇراماسىنا بۇيىردى.
شاڭعى اكروباتيكاسىنان الەم چەمپيوناتىنىڭ جەكەلەي سىنداعى العاشقى كۇنىندە جارىس جولىنا شىققان قازاقستان قۇراماسىنىڭ سپورتشىلارى جانبوتا الدابەرگەنوۆا مەن اقمارجان قالمۇرزاەۆا تاڭعى باعدارلاماداعى ىرىكتەۋ كەزەڭىندە ءساتتى ونەر كورسەتىپ, ءبىرىنشى فينالعا جولداما العان بولاتىن. الايدا تۇسكى سەسسياداعى كىشى فينالدا جانبوتاعا دا, اقمارجانعا دا ساتتىلىك جولداس بولمادى. تالاي ءدۇبىرلى دودالاردا دارالانىپ, ەل قورجىنىنا جۇلدە سالىپ جۇرگەن تاجىريبەلى سپورتشىلار ەلىمىزدە وتكەن الەم چەمپيوناتىندا بىلگەندەرىنەن جاڭىلىپ, بولماشى قاتەلىكتىڭ سالدارىنان نەگىزگى فينالعا جولداما الا المادى. كىشى فينالدا ج.الدابەرگەنوۆا 81.36 ۇپاي جيناپ, سەگىزىنشى ورىن السا, ا.قالمۇرزاەۆا 80.91 ۇپايمەن توعىزىنشى ساتىعا تۇراقتادى.
بۇل سىندا 2015 جىلى اۋستريانىڭ كرايشبەرگ قالاسىندا ۇيىمداستىرىلعان الەم چەمپيوناتىندا ۇزدىك شىققان اۋستراليالىق لورا پيل توپ جاردى. ەكىنشى ورىندى ۆانكۋۆەر (2010) جانە سوچي وليمپيادالارىنىڭ (2014) جەڭىمپازى ەشلي كولدۋەلل (اقش) يەلەنسە, ۇزدىك ۇشتىكتى 2019 جىلعى الەم چەمپيوناتىنىڭ كۇمىس جۇلدەگەرى رەسەيلىك ليۋبوۆ نيكيتينا تۇيىندەدى.
وكىنىشكە قاراي, قازاقستان ەرلەر كومانداسى العاشقى ىرىكتەۋ كەزەڭىنەن ارىگە اسا العان جوق. ەل قورجىنىنا جۇلدە سالادى دەپ ۇمىتتەنگەن شەرزود حاشيرباەۆتىڭ ءوزى ىرىكتەۋدى 18-ورىنمەن تۇيىندەدى. ەستەرىڭىزدە بولسا, شەرزود جۋىردا عانا اقش-تاعى North American Cup تۋرنيرىندە التىن جۇلدە يەلەنگەن ەدى. سونداي-اق ەرلەر قۇراماسىنان سىنعا تۇسكەن نۇرلان باتىرباەۆ الەمدىك دودانى 25-ءشى, رومان يۆانوۆ 27-ءشى ورىنمەن اياقتادى.
ەرلەر جارىسىندا الەم چەمپيوناتىنىڭ ەكى دۇركىن جەڭىمپازى رەسەيلىك ماكسيم بۋروۆقا تەڭ كەلەر قارسىلاس تابىلمادى. الماتىداعى جارىستا ەڭ كوپ ۇپاي جيناعان ول تۇعىردىڭ بيىك ساتىسىنا جايعاستى. كەيىنگى ورىنداردى امەريكالىق كريستوفەر ليلليس جانە تاعى ءبىر رەسەيلىك سپورتشى پاۆەل كروتوۆ يەلەندى.
الماتىداعى الەم چەمپيوناتى مارەسىنە جەتكەن سوڭ وداقتاس مەملەكەتتەردىڭ ۇلتتىق شاڭعى قاۋىمداستىقتارى باسشىلارى مەن وكىلدەرىنىڭ كونفەرەنتسياسى ءوتتى. جيىنعا قاتىسقان قازاقستان ۇلتتىق وليمپيادالىق كوميتەتىنىڭ باس حاتشىسى اندرەي كريۋكوۆ الەم چەمپيوناتىن ۇيىمداستىرۋ ەلىمىزدىڭ حالىقارالىق ارەناداعى ءيميدجىن جاقسارتىپ قانا قويماي, ءبىزدىڭ سپورتشىلارىمىزعا تورەلىك جاساۋدا جانە وليمپيا ويىندارىنىڭ الدىنداعى رەيتينگتى تۇزۋدە ەرەكشە اسەرى بولعانىن اتاپ ءوتتى. ودان بولەك, الەم چەمپيوناتىن وتكىزۋ ارقىلى اتالعان سپورت ءتۇرىنىڭ ەلىمىزدە قارقىندى دامۋىنا جول اشىلىپ, تورەشىلەر مەن باپكەرلەر قۇرامىنىڭ بىلىكتىلىگىن ارتتىرۋعا كوڭىل بولىنەتىنىن ايتتى.
«بۇعان دەيىن ەلىمىزدە وتكەن الەم كۋبوگىنىڭ كەزەڭدەرى قازاقستانداعى فريستايلدىڭ دامۋىنا ايتارلىقتاي سەرپىن بەردى. موگۋل دا, شاڭعى اكروباتيكاسى دا قارقىندى تۇردە دامىپ جاتىر. ۇلتتىق قۇراماعا بىلتىر عانا قوسىلعان 15 جاستاعى اناستاسيا گورودكونىڭ قولا جۇلدەسى مۇنداي باسەكەلەردى ەلىمىزدە وتكىزۋدىڭ ماڭىزدى ەكەنىن دالەلدەيدى. بىلتىر كوپتەگەن جارىس وتكىزىلمەي, ءبىرازى كەيىنگە شەگەرىلدى. سوندىقتان بۇل جارىستىڭ ورنى ەرەكشە», دەدى قازاقستان ۇلتتىق وليمپيادالىق كوميتەتىنىڭ باس حاتشىسى.
ايتا كەتەيىك, الماتىدا فريستايلدان الەم چەمپيوناتىندا قازاقستاندىق سپورتشىلار موگۋل بويىنشا ءۇش مەدال جەڭىپ الدى. يۋليا گالىشەۆا كۇمىس جۇلدەگەر اتانسا, پاۆەل كولماكوۆ قولاعا قول سوزدى. ال 15 جاستاعى اناستاسيا گورودكو پاراللەلدى موگۋل بويىنشا ۇزدىك ۇشتىككە ەندى.
