قوعامدىق تاماقتاندىرۋ قاۋىمداستىعىنىڭ دەرەگى بويىنشا, ەگەر پاندەمياعا دەيىن ەلىمىزدە 95 مىڭ نىسان جۇمىس ىستەسە, قازىر سولاردىڭ 27 مىڭى عانا جۇمىسىن قايتا جالعاستىرعان. قاۋىمداستىقتىڭ باسقارما توراعاسىنىڭ كەڭەسشىسى ۆەرونيكا نۇرپەيىسوۆانىڭ ايتۋىنشا, 1 ناۋرىزدان باستاپ بوۋلينگ, بيليارد زالدارىنىڭ اشىلۋىنا رۇقسات ەتىلدى. بىراق زالدىڭ سىيىمدىلىعى 50 پايىزدان, كەلۋشىلەر سانى 50 ادامنان اسپاۋى كەرەك. 2020 جىلدىڭ قورىتىندىسى بويىنشا مەگاپوليستەگى قوعامدىق تاماقتاندىرۋ ورىندارىنىڭ قارىزى اي سايىن 10-11 ملن تەڭگەنى, شاعىن قالالاردا 5 ملن تەڭگەنى قۇرايدى. وعان ءبىر جىل ىشىندە 38-دەن 42 پايىزعا دەيىن قىمباتتاعان كوممۋنالدىق قىزمەت قۇنى دا كىرەدى.
«كوممۋنالدىق قىزمەتتەر شاعىن جانە ورتا بيزنەسكە كومەكتەسۋى كەرەك. شوب-تى سۋ مەن جارىقتان اجىراتىپ تاستاماس ءۇشىن كانيكۋلدىق تۇسىمدەر مۇمكىندىگىن ۇسىنۋ قاجەت. ءبىر جىل بويى جۇمىس ىستەمەگەن بيزنەس ەلەكتر قۋاتى مەن سۋدى قاشان وشىرگەنىڭىزدى بىلمەيدى جانە كوبىنە توقتاتۋ تۋرالى حابارلاما المايدى», دەيدى ۆ.نۇرپەيىسوۆا.
ونىڭ ايتۋىنشا, تاعى ءبىر تۇيتكىل, كاسىپكەرلەردىڭ بانك الدىنداعى بورىشى بولىپ تۇر. كوبى ارەندالىق تولەم كەلىسىمى بويىنشا جۇمىس ىستەپ, جەكە تۇلعا رەتىندە نەسيە راسىمدەگەن. سوندىقتان ەلىمىزدەگى زاڭناماعا «جەكە تۇلعالاردىڭ بانكروتتىعى» تۋرالى تۇسىنىك ەنگىزىلۋى كەرەك دەپ ەسەپتەيدى.
«ەگەر ادام بيزنەستەگى ارەكەتى سالدارىنان بانكروت بولسا, ونىسىن قۇجاتى راستاپ تۇرسا وندا قارىزى, نەسيەسى ءىشىنارا نەمەسە تولىقتاي كەشىرىلەدى. بۇل بۇكىل الەمدە بار تاجىريبە. مۇنىڭ باستى ماقساتى – جەكە تۇلعانىڭ بانك قارىزى سالدارىنان جەكە مۇلكىنەن ايرىلۋىنا جول بەرمەۋ. ستاتيستيكا بويىنشا, كاسىپكەرلەر كوپ جاعدايدا جەكە مۇلكىن كەپىلگە قويىپ جەكە تۇلعا رەتىندە نەسيە الادى. سوندىقتان بۇل زاڭنىڭ جەكە كاسىپكەرلەرگە قاتىستى قولدانىلۋىن قۇپتايمىز. ويتكەنى ولار زاڭدى تۇلعا ەمەس جانە «زاڭدى تۇلعالاردىڭ بانكروتتىعى تۋرالى» زاڭ ولارعا جۇرمەيدى», دەيدى ساراپشى.
