ەلوردادا وتەتىن العاشقى ماتچ قارساڭىندا ۇكىمەت جانىنداعى ۆەدومستۆوارالىق كوميسسيا (ۆاك) قازاقستان اۋماعىندا كوروناۆيرۋستىڭ تارالۋىنا جول بەرمەۋ بويىنشا بىرقاتار قوسىمشا قورعانۋ شارالارىن جەڭىلدەتىپ, سپورتتىق ويىنداردى ستاديوندى كورەرمەن سانىن 30 پايىزدان اسپايتىن كولەمدە تولتىرا وتىرىپ وتكىزۋگە رۇقسات ەتتى. ءسويتىپ پاندەمياعا بايلانىستى ءبىر جىلعا جۋىق جانكۇيەرلەرسىز ويناعان «بارىس» العاش رەت پلەي-وفف كەزەڭىندە كورەرمەندەرىنىڭ قولداۋىمەن ونەر كورسەتتى.
6 ناۋرىزدا وتكەن ەكى كوماندا اراسىنداعى ءۇشىنشى كەزدەسۋدە جەرلەستەرىمىز جەڭىپ تۇرعان ويىندا قارسىلاستارىنا جول بەرىپ قويدى. نۇر-سۇلتاندا وتكەن باسەكەنى «بارىس» جاپ-جاقسى باستاعان ەدى. 15-مينۋتتا لينۋس ۆيدەللدەن تاماشا پاس العان ياكوب ليليا ەسەپ اشىپ, ايدىن يەلەرىن العا شىعاردى. ۇزىلىستەن كەيىن جاعداي كۇرت وزگەردى. 24-مينۋتتا نيكولاي گولدوبين تارازى باسىن تەڭەستىرسە, ارادا ءۇش مينۋت وتكەن سوڭ ەگور مارتىنوۆ ەكىنشى شايبانى قاقپاعا ەنگىزدى – 1:2. ال ءۇشىنشى كەزەڭدە «بارىس» ويىنشىلارى ەسەپتى تەڭەستىرۋگە قانشا ۇمتىلعاندارىمەن, ماتچ سوڭىنا دەيىن تابلوداعى ەسەپ وزگەرگەن جوق.
اراعا ەكى كۇن سالىپ ەكى كوماندا ويىنشىلارى «بارىس-ارەنادا» ءتورتىنشى ويىنىن وتكىزدى. ەلوردالىق كوماندا كەزدەسۋدى قارقىندى باستاعانىمەن, ەسەپتى قوناقتار اشتى. پاۆەل اكولزين ءتارتىپ بۇزىپ, مۇزايدىننان قۋىلعان سوڭ سان باسىمدىعىنا يە بولعان «مەتاللۋرگ» نيكولاي پروحوركين گولىنىڭ ارقاسىندا ەسەپتە العا شىقتى. كەيىننەن «بارىس» ويىنشىلارىندا دا گول سوعىپ, تابلوداعى كورسەتكىشتى تەڭەستىرەتىن بىرنەشە مۇمكىندىك بولعانىمەن, شابۋىلدى ناتيجەلى تۇيىندەي المادى. ابىروي بولعاندا ءبىرىنشى كەزەڭنىڭ اياقتالۋىنا ءبىر سەكۋند قالعاندا سان باسىمدىعىنا يە بولعان جەرلەستەرىمىز گول سوعىپ, ۇزىلىسكە تەڭ ناتيجەمەن اتتاندى. گول اۆتورى – مەتتيۋ فرەتتين. ەكىنشى كەزەڭدە دە كوماندالار ءبىر-ءبىر شايبامەن الماستى. 25-مينۋتتا قوناقتاردىڭ شابۋىلشىسى نيكولاي گولدوبين مەرگەندىگىمەن كوزگە ءتۇسىپ, ەسەپتى 2:1-گە جەتكىزسە, ارادا ەكى مينۋت وتكەندە قورعاۋشى دجەسسي بلەكەر پلەي-وفف كەزەڭىندەگى العاشقى شايباسىن سوقتى.
ءۇشىنشى كەزەڭ تولىق «بارىستىڭ» باسىمدىعىمەن ءوتتى. 52-مينۋتتا تاعى دا سان باسىمدىعىنا يە بولعان جەرلەستەرىمىز «مەتاللۋرگ» قاقپاشىسى يۋحو ولكينۋورانى قاپى قالدىردى. كيورتيس ۆولك پەن نيكيتا ميحايليستەن پاس العان رومان ستارچەنكو ءوز اتىن تابلوعا جازدىرتتى. ال ويىننىڭ سوڭعى مينۋتىندا قوناقتاردىڭ باس باپكەرى ەسەپتى تەڭەستىرۋ ءۇشىن قاقپاشىنىڭ ورنىنا الاڭعا التىنشى ويىنشى شىعاردى. التى حوككەيشىمەن ماتچ سوڭىندا ۇستەمدىك قۇرماق بولعان قوناقتاردىڭ ماقساتى جۇزەگە اسپادى. 59-مينۋتتا قاقپاشى يوني ورتيونىڭ پاسىنان كەيىن كيريلل پانيۋكوۆ قوناقتاردىڭ بوس قالعان قاقپاسىن ءدال كوزدەپ, ماتچتىڭ نۇكتەسىن قويدى. قورىتىندى ەسەپ – 4:2. پانيۋكوۆتىڭ مۇنىڭ الدىندا دا بوس تۇرعان قاقپاعا گول سوعاتىن تاماشا مۇمكىندىگى بولعان. الايدا الىستان جاساعان سوققىسى قاقپادان ءسال قيىس كەتتى.
ماتچتان كەيىن پىكىر بىلدىرگەن كيريلل پانيۋكوۆ مانسابىندا تۇڭعىش رەت بوس قاقپاعا گول سوققانىن ايتتى. ونىڭ پىكىرىنشە بوس قالعان قاقپاعا گول سوعۋ ويىن ساتىندەگى گولعا قاراعاندا قيىن كورىنەدى.
ەكى ۇجىم اراسىنداعى بەسىنشى كەزدەسۋ كەشە كەشكىسىن ماگنيتوگورسك قالاسىندا ءوتتى. وندا قانداي ناتيجە تىركەلەتىنىنە قاراماستان, التىنشى ماتچ 12 ناۋرىزدا ەلورداداعى «بارىس-ارەنادا» ۇيىمداستىرىلاتىن بولادى.
