«استانا بالەتتەگى» عاجايىپ گالا-كونتسەرت

ەكى بولىمنەن قۇرالعان كەش باعدار­لا­ماسى نەگىزگى ون التى نومىرگە توپتاس­تىرىلعان. تەاتر ارتىستەرى كلاسسي­كا­لىق مۇراعا اينالعان سپەكتاكل­دەر­دىڭ ۇزىندىلەرىن كوركەم حورەوگرافيا تىلىندە شەبەر ورىنداپ شىقتى.

باعدارلامامىزدىڭ وتە مازمۇندى ءارى سان الۋان بولۋىنا بارىنشا نازار اۋداردىق. ءتىپتى كەيبىر پارتيالاردىڭ ساحنامىزدا العاش ورىندالعانىن اتاپ ءوتۋىمىز كەرەك. وسى باعدارلامانى دايىنداعان كەزدە، ءوز باسىم، كەلىپ جەت­كەن كوكتەم شۋاعىن – جاڭا ءومىر تىنىسىن، ماحاببات پەن ىڭكار سەزىم­دى جەتكىزگىم كەلدى. سوندىقتان ءار بي قۇشتارلىق، رومانتيكالىق، مەلان­حو­ليالىق سەزىم يىرىمدەرى سىندى ماحاب­بات­تىڭ سان قىرىن سۋرەتتەيدى، – دەدى «استانا بالەت» تەاترىنىڭ كوركەمدىك جەتەكشىسى نۇرلان قانەتوۆ.

كونتسەرتتىڭ ءبىرىنشى بولىمىندە تس.ءپۋني­دىڭ «ەسمەرالدا»، پ.چاي­كوۆس­كي­دىڭ «اققۋ كولى»، ب.اسافەۆتىڭ «پاريج الاۋى»، ك.گليۋكتىڭ «اۋەن»، ا.اداننىڭ «كورسار»، پ.ماسكانيدىڭ «Diversity»، پ.چايكوۆسكيدىڭ «Divine» سىندى بالەت­تەرىنەن ءۇزىندى ورىندالدى. اسىرەسە، ال­عاش­قى ءبولىمدى تۇيىندەگەن ءۇش تەاتردىڭ جە­تەكشى سوليستەرى، ۇزدىك تريو – فارحاد بوريەۆ، باحتيار ادامجان مەن جانەل توكەەۆانىڭ ادولف ادان مۋزىكاسىنا قويىلعان «كورسار» بالەتىنەن كورسەتكەن كوركەم ىزدەنىسى كورەرمەن قاۋىمنىڭ زور ىقىلاسىنا بولەندى.

 ال عالامات كەشتىڭ ەكىنشى بولىمىن­دە «جيزەل» بالەتىنەن گراند-پا، «كارمەن-سيۋيتا» بالەتىنەن دۋەت، «اققۋ كولى» با­لە­تىنەن اداجيو، فەدور لوپۋ­حوۆ حورەو­گرا­فياسىنداعى «گو­پاك»، «سپارتاك» بالەتىنەن دۋەت، «شوپە­نيانا» بالەتىنەن ۆالس، Love Fear Loss بالەتىنەن دۋەت جانە «دون كيحوت» بالەتىنەن پا-دە-دە ۇسىنىلدى. بي كەشىنىڭ جارقىن كورىنىسىنىڭ ءبىرى ا.حاچاتۋريان مۋزىكاسىنا حورەوگراف گەورگي كوۆتۋن قويعان «سپارتاك» بالەتىنەن اداجيو ەدى. ەلوردالىق تەاتر ساحناسىنا سپەكتاكل ءۇزىندىسىن «استانا بالەت» تەاترىنىڭ كوركەمدىك جەتەكشىسى، رەسەيدىڭ ەڭبەك سىڭىرگەن قايراتكەرى نۇرلان قانەتوۆ كوشىردى. سپارتاك پەن فريگيانىڭ بەينەسىن فارحاد بوريەۆ پەن اينۇر ابىلعازينا سومدادى.

سونداي-اق اڭىزعا اينالعان ايتۋلى گالا-كونتسەرتتە تاتيانا تەن، قازبەك احمەدياروۆ، ديلارا شوماەۆا، ايجان مۇقاتوۆا، ۋەسلي كارۆالو، ەلدار سارسەمباەۆ، بالجان ءابدىراحمانوۆا باس­تاعان «استانا بالەت» تەاترىنىڭ جە­تەكشى سوليستەرى مەن شاقىرىلعان ارتىستەر قاتا­رىن­دا ونەر كورسەتكەن – «استانا وپەرا» تەاترىنىڭ پرەمەرى باحتيار ادامجان، اباي اتىنداعى قازاق ۇاوبت-نىڭ بىرەگەي بيشىلەرى جانەل توكەەۆا، راحىم دايىروۆ پەن ماليكا ەلشىباەۆا ونەرى ەلوردالىق كورەرمەن كوڭىلىنە كوكتەمنىڭ عالامات شۋا­عىن دارىتقانداي ەستەن كەتپەس ەرەكشە اسەر سىيلادى.

ءوزىنىڭ جاڭاشىل قويىلىمدارىمەن كوپشىلىكتىڭ ىستىق ىقىلاسىنا بولەنىپ جۇرگەن «استانا بالەت» ترۋپپاسىنىڭ كورەرمەنىنە ناۋرىز ايىندا ۇسىنار تارتۋى مۇنىمەن استە شەكتەلمەك ەمەس. ۇجىم وسى ايدا «ۆالپۋرگيەۆ ءتۇنى» جانە «گايا» ءبىر اكتىلى بالەتتەرى مەن ۇلىس­تىڭ ۇلى كۇنى – ناۋرىز مەيرامى قارساڭىندا «ۇلتتىق حورەوگرافيا كەشىن» ەلوردالىق كورەرمەندەر مەن قالا قو­ناقتارى نازارىنا ۇسىنۋدى جوسپارلاپ وتىر. سونىمەن قاتار سۇحبات بارىسىندا تەاتردىڭ كوركەمدىك جەتەكشىسى ءساۋىر ايىنداعى قويىلىمدار جايلى دا ايتىپ قالدى. كوپ ۇزاماي كورەرمەن كوزايىمىنا اينالعان – «بەيبارىس سۇلتان»، «ماحاببات تۋرالى اڭىز» جانە «جيزەل» بالەتتەرى كورەرمەنىمەن ساحنا تورىندە قايتا قاۋىشاتىن بولادى.