اكتسياعا قاتىسۋشىلار كاسىبي سپورتشىلارعا الەۋمەتتىك جەلىلەردە وسى وقيعا تۋرالى ءۇنسىز قالماۋىن سۇرادى.
نارازى توپتىڭ ۆيدەوسى وپپوزيتسيالىق ساياساتكەر حالمۋراد سويۋنوۆتىڭ Youtube كانالىندا جاريالاندى.
بۇعان دەيىن بۇل اكتسيانى 19 اقپاندا نيۋ-يوركتە بۇۇ شتاب-پاتەرىنىڭ الدىندا وتكىزۋ جوسپارلانعان بولاتىن, بىراق اۋا رايىنىڭ قولايسىزدىعى مەن قالىڭ قاردىڭ سالدارىنان ءىس-شارا توقتاتىلدى.
ەستەرىڭىزدە بولسا, 15 اقپاندا 14 جاسار تۇرىكمەن دزيۋدوشىسى سۇلەيمەن تۇرسىنباەۆ اۋىر سوققى سالدارىنان قايتىس بولعانى تۋرالى حابارلانعان ەدى.
بيىلعى جىلدىڭ اقپان ايىنىڭ باسىندا سۇلەيمان باحاردەندە وتكەن دزيۋدودان جارىستا باق سىناعان. شەشۋشى جەكپە-جەكتىڭ الدىندا وعان قارسىلاسى - تۇركىمەنستان ىشكى ىستەر مينيسترلىگى جوعارى وقۋ ورنىنىڭ جاس كۋرسانتى جەڭىلۋىن سۇراعان. الايدا, سۇلەيمان جەكپە-جەكتە جەڭىسكە جەتىپ, ءوز سالماعىندا چەمپيون اتانادى.
تۋرنير اياقتالعاننان كەيىن بىردەن بەلگىسىز بىرەۋلەر جەڭىمپاز جىگىتتىڭ جاتتىقتىرۋشىسىن ۇرىپ-سوققان. ال سۇلەيمان تۇرسىنباەۆتى بەلگىسىز باعىتقا الىپ كەتكەن. سوققىعا جىعىلعان سۇلەيمەندى ء وتىپ بارا جاتقان ادامدار كورىپ, جەدەل-جاردەم شاقىرعان. ولار ونى اشحابادتاعى اۋرۋحانالاردىڭ بىرىنە اپارادى. بىراق دارىگەرلەر سۇلەيمەنگە كومەكتەسۋدەن باس تارتىپ, استانادان 500 شاقىرىم جەردەگى تۇرعىلىقتى مەكەن جايىنا جەتكىزگەن. جاس جىگىت اۋداندىق اۋرۋحاناعا تۇسكەن سوڭ, بىرنەشە كۇننەن كەيىن قايتىس بولدى.
كوز جۇمعان بالانىڭ اتا-اناسى وپپوزيتسيالىق ساياساتكەر حالمۋراد سويۋنوۆتىڭ Youtube كانالى ارقىلى پرەزيدەنت گۋربانگۋلى بەردىمۇحامەدوۆكە ءوتىنىش ءبىلدىرىپ, ءىستى تەرگەۋدى جانە كىنالىلەردى جازالاۋدى cۇراعان بولاتىن.
