ساۋالداماعا قاتىسۋشىلاردىڭ 50 پايىزى تەڭگە باعامىنىڭ قۇبىلۋى نارىققا تەرىس اسەر ەتكەنىن ايتسا, 36 پايىزى ايتارلىقتاي اسەرى بولماعانىن ايتادى. قاتىسۋشىلاردىڭ 57 پايىزى قازاقستاننىڭ ەاەو اياسىندا بولۋىن ىڭعايلى دەپ باعالاسا, 36 پايىزى ارمەنيالىق كولىكتەردى ەسەپكە قويۋدىڭ تەرىس اسەر بەرگەنىن ايتقان. سونداي-اق ديلەردىڭ 42 پايىزى 2020 جىلى ساتىلىم جوسپارلى كورسەتكىشتەن اسىپ تۇسكەنىن ءمالىم ەتكەن.
رەسپوندەنتتەردىڭ 93 پايىزى 2020 جىلى جاڭا اۆتوموبيلدەر باعاسىنىڭ وزگەرگەنىن اتاپ ءوتتى. ولاردىڭ 79 پايىزى بۇل فاكتوردىڭ ساتىلىمعا تەرىس اسەرى بولدى دەيدى. سوعان قاراماستان, باعا ايتارلىقتاي كوتەرىلمەگەن. ەگەر 2018 جىلدىڭ سوڭىندا باعالار ورتاشا العاندا 11 پايىزعا جوعارىلاسا, 2019 جىلدىڭ سوڭىندا 6,3 پايىزعا, 2020 جىلدىڭ سوڭىندا جەكەلەگەن برەندتەر مەن مودەلدەر ءۇشىن 5-7 پايىزعا كوتەرىلدى.
ديلەرلەر 2021 جىلى ساتىلىم بىلتىرعىدان دا جوعارى بولادى دەپ بولجايدى. 50 پايىزى بىلتىرعىدان 5-10 پايىزعا جوعارى دەڭگەيدە كولىك ساتۋدى جوسپارلاسا, 14 پايىزى 10-20 پايىزعا, 21 پايىزى 20-30 پايىزعا ارتىق ساتىلىم جاساۋعا نيەتتى.
قازاقستان اۆتوبيزنەس قاۋىمداستىعىنىڭ مالىمەتىنشە, 2020 جىلى جاڭا اۆتوموبيلدەر ساتىلىمى 93 371 بىرلىككە جەتكەن. ەلىمىزدە بىلتىر 75 235 جەڭىل اۆتوكولىك, جۇك جانە جولاۋشىلار اۆتوكولىكتەرى قۇراستىرىلعان. بۇل 2019 جىلمەن سالىستىرعاندا 52 پايىزعا جوعارى.
«نارىق پەن سالانىڭ دامۋ پەرسپەكتيۆاسىنا تالداۋ جاساي وتىرا, بيىل نارىقتاعى جەرگىلىكتى اۆتوموبيلدەر ۇلەسىنىڭ ءوسۋ تەندەنتسياسى جالعاسادى. ءوز كەزەگىندە ءاۆتووندىرىس سالاسى ءوندىرىس قۋاتتىلىعىن ارتتىرىپ, شىعارىلعان ءونىمدى لوكاليزاتسيالاۋ جانە ەكسپورتتاۋدى ۇلعايتپاق. 2021 جىلى قاۋىمداستىق 100-120 مىڭ جەڭىل جانە كوممەرتسيالىق اۆتوكولىكتەر ساتىلىمى بولادى دەپ بولجايدى» دەلىنگەن قاۋىمداستىق حابارلاماسىندا.
