كەزدەسۋ بەينەكونفەرەنتسيا فورماتىندا ءوتتى. ساۋدا جانە ينتەگراتسيا ۆيتسە-ءمينيسترى قايرات تورەباەۆتىڭ ايتۋىنشا, ۇكىمەتارالىق كوميسسيا – ءوزارا ىنتىماقتاستىق ماسەلەلەرىنىڭ كەڭ سپەكترى بويىنشا ناقتى شارالار قابىلداناتىن الاڭ رەتىندە تانىلدى. تاراپتار قازاقستان مەن چەحيا اراسىنداعى ساۋدا-ەكونوميكالىق ىنتىماقتاستىقتى ودان ءارى دامىتۋ ماسەلەلەرىن, الداعى وتىرىستىڭ كۇن تارتىبىندەگى ماسەلەلەردى, سونداي-اق COVID-19 پاندەمياسى (مەديتسينالىق تەحنيكانى, جابدىقتاردى, دارىلىك پرەپاراتتاردى جانە ت.ب. ونىمدەردى جەتكىزۋ) كەزەڭىندە دەنساۋلىق ساقتاۋ سالاسىنداعى ىنتىماقتاستىق مۇمكىندىكتەرىن تالقىلادى.
قازاقستاندىق ساراپشىلار ساۋدا ىنتىماقتاستىعىن دامىتۋ ماقساتىندا چەحيا نارىعىنا شىعارىلۋى مۇمكىن الەۋەتتى تاۋارلاردىڭ تىزبەسىن دايىنداعان. تىزىمگە مۇناي-حيميا, مەتاللۋرگيا, تاماق ونەركاسىبى, ماشينا جاساۋ, قۇرىلىس سالاسىنىڭ ونىمدەرى ەنگەن. كەزدەسۋ بارىسىندا قازاقستاندىق تاراپ چەحيانىڭ اتوم ەنەرگەتيكاسى كاسىپورىندارىنا «قازاتومونەركاسىپ» ۇاك» اق تابيعي ۋران كونتسەنتراتتارىن جانە ۋران ونىمدەرىن جەتكىزۋ; ستانوكتاردى جوندەۋ جانە جاڭعىرتۋ جانە ولاردىڭ جيىنتىقتاۋشى جانە قوسالقى بولشەكتەرىن ءوندىرۋ جونىندەگى ورتالىقتى (تەحنوپارك), سونداي-اق وتاندىق وندىرىستەردە ودان ءارى قولدانۋ ءۇشىن قازاقستاندا كومپونەنتتىك بازا ءوندىرىسىن دامىتۋ جونىندەگى عىلىمي-زەرتتەۋ ورتالىعىن قۇرۋ; قىتايدان ەۋروپاعا چەحيا رەسپۋبليكاسى ارقىلى كونتەينەرلىك جۇكتەردى (جۇك تاسىمالدارىن) دامىتۋ بويىنشا ناقتى ۇسىنىستار بىلدىرگەن.
مينيسترلىكتىڭ مالىمەتىنشە, ەكى ەل اراسىنداعى تاۋار اينالىمى 2019 جىلى 380,4 ملن دوللاردى قۇراعان. ال 2020 جىلدىڭ 11 ايىندا ءوزارا ساۋدا-ساتتىق 9,9 پايىزعا تومەندەپ, 312,4 ملن دوللاردى قۇراپتى. چەحياعا ەكسپورت ۇلەسى 4,5 پايىزعا, چەحيادان يمپورت ۇلەسى 11,2 پايىزعا قىسقارعان.
