اتىراۋ وبلىسى بويىنشا قىلمىستىق اتقارۋ جۇيەسى دەپارتامەنتىنە قاراستى ۋگ-157/1 (تەرگەۋ يزولياتورى) مەكەمەسىندە شارۋاشىلىق جۇمىسىنا قالدىرىلعان سوتتالعاندار انالارىن 8 ناۋرىز مەرەكەسىمەن قۇتتىقتاۋ جولدادى.
تۇرمەدەن قۇتتىقتاۋ جولداعانداردىڭ ءبىرى – ەسىرتكى ساتقانى ءۇشىن سوتتالعان اندرەي.
«وڭاي جولمەن اقشا تاۋىپ, تۇرمىسىمىزدى جاقسارتقىم كەلدى. الايدا, بۇل ويىمنىڭ قاتە بولعانىن تەك تۇرمەدە ءتۇسىندىم. قازىر ۇيدە ءوزىڭىز قالدىڭىز. مەنىڭ دوستارىم 8 ناۋرىز مەرەكەسىنە وراي سىزگە ارناعان سىيلىعىمدى جەتكىزەدى», دەپ حات جولداپتى اندرەي.
ال دوستارى اندرەيدىڭ اناسىنا جولداعان گۇل مەن كوكتەمدە كيەتىن اياق كيىمدى جەتكىزىپ بەردى.
ال ۇرلىق جاساپ سوتتالعان باۋىرجان كەلەسى جىلعى 8 ناۋرىز مەرەكەسىن اناسىمەن بىرگە قارسى الاتىنىنا ۇمىتتەنىپ وتىر. سول كەزدە اناسىنا 300 گۇل سىيلاۋدى جوسپارلاپتى.
قاراقشىلىق ءۇشىن ءتورت جىلعا سوتتالعان تاعى ءبىر جىگىت اناسىنىڭ ومىردەن وتكەنىن وكىنىشپەن ەسكە الدى.
«مەنىڭ تۇرمەگە تۇسكەنىم سىزگە وڭاي بولمادى. ءسىز ومىردەن ءوتتىڭىز. سول ءۇشىن ءوزىمدى ءومىر بويىنا كەشىرە المايمىن. بۇل جەردەن شىققاننان كەيىنگى ءومىرىمدى ءسىزدىڭ ارماڭىزدى ورىنداۋعا ارنايمىن», دەپ جازىپتى ول.
