اۋىلداردا تۇرعىن ءۇي سالىنا باستايدى

قازاقستان • 05 ناۋرىز، 2021

اۋىلداردا تۇرعىن ءۇي سالىنا باستايدى

13 رەت كورسەتىلدى

2020 جىلى رەسپۋبليكا بويىنشا 15،3 ملن شارشى مەتر تۇرعىن ءۇي سالىنىپ، 140 مىڭنان استام پاتەر پايدالانۋعا بەرىلگەن. باسپانا قۇرىلىسىنا ينۆەستيتسيالار 2019 جىلمەن سالىستىرعاندا 33،6 پايىزعا ءوسىپ، 2 ترلن تەڭگەنى قۇراپتى. ونىڭ ىشىندە 9،6 مىڭ بىرلىك ارەندالىق، 18،4 مىڭ بىرلىك كرەديتتىك باسپانا سالىنعان.

اباي قازبەك ۇلى

يندۋستريا جانە ينفراقۇرىلىمدىق دامۋ ۆيتسە-ءمينيسترى قايىربەك وسكەنباەۆتىڭ ايتۋىنشا، ۇكىمەت ۇلتتىق بانكپەن بىرلەسىپ الەۋمەتتىك-كرەديتتىك تۇرعىن ءۇي سالۋ جانە «وتباسى بانك» ارقىلى «5-10-20» شارتتارى بويىنشا كەزەكتە تۇرعان ادامدارعا كرەديت بەرۋ ءۇشىن 390 ملرد تەڭگە بولگەن. قوسىمشا «جۇمىسپەن قامتۋ جول كارتاسى» شەڭبەرىندە جوبالاردى دامىتۋ ءۇشىن شامامەن 1 ترلن تەڭگە بولىنگەن.

– «بيزنەستىڭ جول كارتاسى» جانە «قاراپايىم زاتتار ەكونوميكاسى» باعدارلاماسىنا قاتىسۋ ءۇشىن شەكتەۋلەر الىنىپ تاستالدى. بۇل شارالار قۇرىلىس كومپانيالارىنىڭ كاسىپكەرلىك بەلسەندىلىگىن جانە حالىقتىڭ جۇمىسپەن قامتىلۋىن قامتاماسىز ەتۋگە مۇمكىندىك بەردى. 2020 جىلدىڭ قورىتىندىسى بويىنشا قۇرىلىس ەكونوميكاداعى جەتەكشى سالالاردىڭ بىرىنە اينالدى. ءجىو-دەگى قۇرىلىس ۇلەسى 5،9 پايىز بولدى. رەسپۋبليكا بويىنشا قۇرىلىس جۇمىستارىنىڭ كولەمى 4،9 ترلن تەڭگەگە ورىندالدى. بۇل 2019 جىلمەن سالىستىرعاندا 11،2 پايىزعا ارتىق، – دەيدى ءمينيستردىڭ ورىنباسارى ۆەدومستۆونىڭ القا وتىرىسىندا سويلەگەن سوزىندە.

بيىل بارلىق قارجىلاندىرۋ كوزدەرى ەسەبىنەن 17 ملن شارشى مەتر تۇرعىن ءۇي سالۋ جوسپارلانىپ وتىر. بۇل – 163 مىڭ پاتەر. كەزەكتە تۇرعان 31 مىڭنان استام ادام مەملەكەتتىك ينۆەستيتسيالار ارقىلى قامتىلماق.

– كرەديتتىك تۇرعىن ءۇي قۇرىلىسى بويىنشا اكىمدىكتەر اينالىمىندا 387 ملرد تەڭگە بار. قۇرىلىس كولەمىن ۇلعايتۋ ءۇشىن بىرىڭعاي وپەراتور نارىقتىق شارتتارمەن قوسىمشا 61،5 ملرد تەڭگە تارتا الادى. بۇل جەرگىلىكتى اكىمدىكتەردىڭ جىلدىق 4،25 پايىز مولشەرىندە وبليگاتسيالار ساتىپ الۋىنا مۇمكىندىك بەرمەك. ءوز كەزەگىندە بۇل باستاما قاراجات اينالىمىن 448،5 ملرد تەڭگەگە ارتتىرىپ، 2،5 ملن شارشى مەتر تۇرعىن ءۇي نەمەسە 41،5 مىڭ كرەديتتىك پاتەر سالۋعا مۇمكىندىك بەرەدى. جالپى، بيىل نارىقتىق شارتتارمەن 300 ملرد تەڭگە تارتۋ جوسپارلانىپ وتىر، – دەدى وسكەنباەۆ.

الەۋەتتى ينۆەستورلار رەتىندە ىشكى جانە رەسەيلىك نارىقتارداعى كوممەرتسيالىق بانكتەر، ساقتاندىرۋ جانە قارجى ۇيىمدارى قاراستىرىلىپ وتىر ەكەن. ءمينيستردىڭ ايتۋىنشا، ءبىرىنشى توقساندا ەۋرازيالىق دامۋ بانكىمەن جانە سبەربانكپەن كەلىسسوزدەر اياقتالادى. سونداي-اق «وتباسى بانكى» نەگىزىندە تۇرعىن ۇيمەن قامتۋ ورتالىعى قۇرىلادى. ورتالىق جەكە تۇلعالاردىڭ دەرەك قورلارىمەن ينتەگراتسيالانادى.

قايىربەك وسكەنباەۆتىڭ سوزىنشە، تۇرعىن ءۇي كەزەگىنە تۇراتىن ازاماتتار سانى جىل سايىن ورتا ەسەپپەن 50 مىڭعا ءوسىپ وتىر. بۇگىنگى كۇنى 548 مىڭ ادام كەزەكتە تۇر. ولاردىڭ ماسەلەسىن ەكى تەتىك نەگىزىندە شەشۋ ۇسىنىلادى دەيدى. ءبىرىنشىسى – تابىسى ەڭ تومەنگى كۇنكورىس دەڭگەيىنەن تومەن وتباسىلاردى جەكە جالعا بەرىلەتىن تۇرعىن ءۇيدى سۋبسيديالاۋ ارقىلى تۇرعىن ۇيمەن قامتاماسىز ەتۋ. ونداي وتباسىلارعا جەتىم بالالار، I، II توپتاعى مۇگەدەكتەر، كوپبالالى وتباسىلار جانە مۇگەدەك بالاسى بار وتباسىلار، حالىقتىڭ وزگە دە الەۋمەتتىك ءالسىز توپتارى جاتادى. ەكىنشىسى – تابىسى ەڭ تومەنگى كۇنكورىس دەڭگەيىنەن جوعارى وتباسىلاردى جاڭا تۇرعىن ۇيگە جەڭىلدەتىلگەن زايمدار بەرۋ ارقىلى تۇرعىن ۇيمەن قامتاماسىز ەتۋ. ونداي وتباسىلارعا مەملەكەتتىك قىزمەتكەرلەر، بيۋدجەت قىزمەتكەرلەرى، تولىق ەمەس جانە كوپبالالى وتباسىلار، وزگە دە كەزەكتە تۇرعاندار جاتادى.

مينيسترلىك وكىلى اۋىلدا تۇرعىن ءۇي سالۋ تەتىگى دە ۇسىنىلىپ وتىرعانىن مالىمدەدى.

– مەملەكەت باسشىسىنىڭ تاپسىرماسىنا سايكەس اۋىلداردا جۇمىسكەرلەر ءۇشىن تۇرعىن ءۇي سالۋ كەزىندە جۇمىس بەرۋشىنىڭ شىعىندارىن 50 پايىزعا دەيىن سۋبسيديالاۋدى كوزدەيدى. تۇرعىن ءۇي ساياساتىنىڭ جاڭا تاسىلدەرىن ىسكە اسىرۋ ماقساتىندا قولدانىستاعى زاڭناماعا قاجەتتى وزگەرىستەر مەن تولىقتىرۋلار ەنگىزۋ پىسىقتالىپ وتىر، – دەيدى وسكەنباەۆ.

ۆيتسە-مينيستر «نۇرلى جەر» باعدارلاماسى شەڭبەرىندە حالىقتى اۋىز سۋمەن قامتۋ شارالارىنىڭ دا بەلسەندى جۇرگىزىلىپ جاتقانىن ايتادى. 2020 جىلى وڭىرلەردە 113 ملرد تەڭگەگە 300-دەن استام جوبا ىسكە اسىرىلعان. بۇل قالا حالقىنىڭ ورتالىقتاندىرىلعان سۋمەن قامتاماسىز ەتۋ دەڭگەيىن 97،5 پايىزعا، اۋىل حالقىن 90،1 پايىزعا دەيىن ارتتىرماق.

– جىلدىڭ قورىتىندىسى بويىنشا سۋمەن جابدىقتاۋ قىزمەتىنە رەسپۋبليكا حالقىنىڭ 94،6 پايىزى قول جەتكىزەدى. 4500 شاقىرىم سۋ قۇبىرى جانە كارىز جەلىلەرى سالىندى. بيىل سۋمەن جابدىقتاۋ جانە سۋ بۇرۋ جۇيەلەرىن دامىتۋ بويىنشا 125 ملرد تەڭگەگە 319 جوبا ىسكە اسىرىلىپ جاتىر. وسى جوبالاردى ىسكە اسىرۋ ەسەبىنەن سۋمەن جابدىقتاۋ قىزمەتتەرىنە قولجەتىمدىلىكتى قامتاماسىز ەتۋ كورسەتكىشىن قالا حالقى ءۇشىن 98، اۋىل حالقى ءۇشىن 91،8 پايىزعا جەتكىزۋ جوسپارلانعان، – دەدى وسكەنباەۆ.

كۇننىڭ ماڭىزدى جانە وزەكتى جاڭالىقتارىن «ەگەمەن قازاقستان» تەلەگرام كانالىنان وقىڭىز