الايدا 3 ناۋرىز كۇنى قازاقستان قور بيرجاسىنداعى (KASE) دوللاردىڭ ورتاشا كۋرسى 419,83 تەڭگەنى قۇرادى. ارينە, ۆاليۋتا باعامىنىڭ قۇبىلىپ تۇرۋى بىزگە تاڭسىق ەمەس. سوندىقتان ونىڭ ءجيى قۇنسىزدانىپ نەمەسە نىعايۋىنا قاتىستى ۇلتتىق بانك وكىلىنىڭ مالىمدەمەسى قاي ساتتە دە ماڭىزدى بولماق.
ۇلتتىق بانك مونەتارلىق وپەراتسيالار دەپارتامەنتىءنىڭ ديرەكتورى نۇرجان تۇرسىنحانوۆتىڭ ايتۋىنشا, تەڭگەنىڭ السىرەۋى ءۇش باسىم فاكتورعا: وپەك+ وتىرىسى قارساڭىندا مۇنايعا باعا بەلگىلەۋدىڭ قۇلدىراۋىنا, دوللاردىڭ نىعايۋىنا جانە قازاقستانداعى سالىق تولەمدەرى كەزەڭىنىڭ اياقتالۋىنا بايلانىستى بولدى.
– اپتانىڭ باسىنان باستاپ مۇنايدىڭ باعاسى وتكەن اپتادا قول جەتكىزگەن ەڭ جوعارى كورسەتكىشتەردەن اۋىتقىپ, 5,1 پايىزعا تومەندەدى. كوروناۆيرۋسقا قارسى ۆاكتسينالاۋدىڭ ىلگەرىلەۋى, ساۋد ارابياسى تاراپىنان مۇناي ءوندىرۋدى ساۋىرگە دەيىن كۇنىنە 1 ملن باررەلگە ەرىكتى تۇردە قىسقارتۋ, سونداي-اق اقش-تا بۇرىن-سوڭدى بولماعان ايازعا بايلانىستى مۇناي ءوندىرۋدى ءماجبۇرلى تۇردە توقتاتا تۇرۋ جىل باسىنان بەرى مۇناي باعاسىنىڭ ءوسۋىن قولداي ءتۇستى, – دەيدى تۇرسىنحانوۆ.
ەندى الداعى ۋاقىتتا مۇناي وندىرىسىنە قويىلعان شەكتەۋلەر بىرتىندەپ الىنا باستايدى. ساراپشىلار وپەك+ مۇناي ءوندىرۋدى كۇنىنە شامامەن 0,5 ميلليون باررەلگە ۇلعايتادى دەپ بولجايدى
– كوكتەمنىڭ العاشقى كۇنىندە اقش پەن ەۋروپانىڭ قور بيرجالارى ايتارلىقتاي پايدامەن جابىلدى. سەنبى كۇنى اقش وكىلدەر پالاتاسى ەكونوميكاعا 1,9 ترلن دوللارعا كومەك شارالارىنىڭ توپتاماسىن بەكىتتى. پرەزيدەنت بايدەن دەمالىس كۇندەرى سەناتتى تەز ارەكەت ەتۋگە شاقىردى. پايىزدىق مولشەرلەمەلەردىڭ كوتەرىلۋىنە قاتىستى ينۆەستورلاردىڭ الاڭداۋشىلىعىن باسەڭدەتىپ, ءبىر اپتاعا سوزىلعان امەريكا مەملەكەتتىك وبليگاتسيالارىنىڭ كىرىستىلىك ءرالليى توقتادى. وسىعان بايلانىستى DXY دوللار يندەكسى 90,1-دەن 91,2-گە دەيىن نەمەسە 1,2 پايىزعا ءوستى. سونىمەن قاتار, وتكەن اپتادا قازاقستاندا شەتەل ۆاليۋتاسىن ساتۋدىڭ نەعۇرلىم جوعارى كولەمىن بولجايتىن جانە تيىسىنشە ۇلتتىق ۆاليۋتانىڭ نىعايۋىنا ىقپال ەتەتىن كەزەكتى سالىق كەزەڭى اياقتالعانىن اتاپ وتكەن ءجون, – دەلىنگەن تۇرسىنحانوۆ مالىمدەمەسىندە.
