قوعام • 04 ناۋرىز، 2021

پوليتسيا الاياقتاردان ساقتانۋدى ەسكەرتتى

8 رەت كورسەتىلدى

سوڭعى ۋاقىتتا قوعامدا ينتەرنەت ارقىلى جاسالاتىن الاياق ارەكەتتەر تىم كوبەيىپ بارا جاتىر. الداپ-ارباۋدىڭ ءتۇرلى ادىستەرى مەن سىزبالارىن جەتىك مەڭگەرىپ العان تەرىس پيعىلدىلار كوپ جاعدايدا تولەم كارتاسىنداعى قارجىنى ۇرلاۋدى قولاي كورەدى ەكەن. نۇر-سۇلتان قالاسى پوليتسياسى تومەندەگىدەي جاعدايلار كەزىندە الدانباي، مەيلىنشە ساۋاتتىلىق تانىتۋعا شاقىرادى.

ولار باعدارلامالىق جۇيەنى پايدالانا وتىرىپ بانكتەردىڭ رەسمي كولل-ورتالىقتارىنىڭ نومىرلەرىن قايتالاپ، كارتانى پايدالانۋشىلارعا قايتالاما نومىرلەردەن قوڭىراۋ شالادى. اڭگىمەلەسۋ بارىسىندا وزدەرىن بانك قىزمەتكەرىمىن دەپ تانىستىرادى. بانك قىزمەتكەرىنىڭ ءرولىن شەبەر سومداپ، الاياقتار بانك كارتاسى بويىنشا الاياقتىق ارەكەتتەر جاسالىپ جاتقانىن حابارلايدى جانە اقشانى ساقتاپ قالۋ ءۇشىن ساقتاندىرۋ ۇياشىعىنا اقشا قاراجاتىن اۋدارۋدى سۇرايدى. ءاڭگىمەنى ۇزبەۋگە تىرىسىپ، بوتەن ادامداردىڭ بانك كارتاسىنىڭ ءنومىرىن ايتادى.

«ەگەر سىزگە وسىلاي قوڭىراۋ شالاتىن بولسا ەشقاشان ءوز دەرەكتەرىڭىزدى بەرمەڭىز. ولار – الاياقتار. بانك قىزمەتكەرلەرى ەشقاشان قوڭىراۋ شالىپ، جەكە مالىمەتتەردى جينامايدى! رەسمي كولل ورتالىقنومىرىنە قايتا قوڭىراۋ شالىپ، اقپاراتتى تەكسەرىڭىز» دەلىنگەن پوليتسيا حابارلاماسىندا.

سونداي-اق ينتەرنەت جەلىسىندە الاياقتىقتىڭ باسقا دا تۇرلەرى، ماسەلەن مەسسەندجەر ارقىلى ساتىپ الۋشى رەتىندە حات الماسۋ ءجيى تاراپ جاتىر. سويلەسۋ كەزىندە «جەتكىزۋ» قىزمەتىن پايدالانۋدى سۇرايدى، سول ءۇشىن باسىپ كىرۋى ءتيىس سىلتەمە جىبەرەدى. ءبىر قاراعاندا ول سىلتەمە ەشقانداي كۇمان تۋدىرمايدى، الايدا ونى باسقان كەزدە پايدالانۋشى فيشينگ سايتىنا كىرەدى. بۇل سايتتا بانك كارتاسىن، CVV-كودتى جانە جسن-دى كورسەتە وتىرىپ ساۋالنامانى تولتىرىپ، اقشانىڭ اۋدارىلۋىن كۇتۋ ۇسىنىلادى. جوعارىدا كورسەتىلگەن دەرەكتەردى العان سوڭ، الاياقتار بىردەن كارتاداعى شوتتان بارلىق اقشا قاراجاتىن جىمقىرادى. ال الاياقتىق سايت بىرنەشە سەكۋندتاردان كەيىن بۇعاتتالىپ قالادى جانە ەشقانداي بەلگى قالمايدى.

مۇنداي كەزدە ازاماتتار جىبەرىلگەن سىلتەمەگە مۇقيات ءمان بەرىپ، سايتتىڭ تۇپنۇسقالىعىنا نازار اۋدارۋى قاجەت. فيشينگ سايتتار شىن مانىندە تۇپنۇسقا سايتتارعا ۇقساعانىمەن، اتاۋىندا ارتىق ارىپتەر مەن تاڭبالار بولادى.

سوڭعى جاڭالىقتار

ۇقساس جاڭالىقتار